Amu jé bia yiane tabe bisulan?
“Be nga tabe nnôm éto . . . a tabe nlatan ñbwa.”—MAM MINLÔMAN 2:42.
BIA: 20, 119
1-3. (a) Aval avé Bekristen ba liti na, ba nye’e ba tabe bisulan? (Fombô’ô fôtô ya atata’a ya ayé’é di.) (b) Jé bia zu yen ayé’é di?
ÉYOÑE Corinna a nga bi fo’o ve mimbu 17, ane be nga bi nyia wé a lôme nye vôme ba loone fulasi na, camp de travail soviétique. Mvuse ya valé, be nga kee Corinna e si ba loone na Sibérie, betoyini bekilimita a vôm a mbe a to. A mbe a nyiñi wôé ane ôlo. Be mbe be tindi’i nye na, a ke saé nseñ, avebe été a biyé bi ne ôkekep. Akusa bo mbia ényiñ ate, Corinna ba sita mfe, be nga nyoñe ntyi’ane ya tabe bisulane ya akônda.
2 Corinna a jô na: “Bi mbe bi telé’é ésaé jangan mame ngô’é, a wulu bekilimita 25, na bia ke été beminsini minkoñ. Minsini minkoñ a mbe a té’é mewolo 2 ya mame tyé. Bi mbe bi wulu’u e minsini minkoñ mewolo 6. Éyoñe bia ke sis, bi mbe bi beta wulu a mebo bekilimita 10 na, bi ke kui vôme bisulane bia boban. Amu jé be nga wu abime nju’u te? Corinna a jô na: “Ésulan, bi mbe bi yé’é Nkume mmombô a bete, bi yia fe bia. Biyoñ bite bi mbe bi va’a bia ngule nyôl, bi yemete’e fe mbunane wongan.” Corinna ba sita mbok, be mbe bu’i ésaé tañe melu melal, môt a mbe a tebele ésaé teke yeme na be nji bo.
Mam Minlôman 2:42) Aval ane be, wo fe, ô bili nkômbane ya tabe bisulan éyoñ ése. Ve Bekristen bese ba tôbane minjuk. Asu ésaé jangan, abui mam ya bo, nge ke ate’e nyôl amu bisaé ya môs, bi ne bo na, bi yen ayaé ya tabe bisulan. Jé ja ye tindi bia na, bi jeñ a mezene mese na, bi dañe minju’u mite a ke ôsu a tabe bisulan? [1] Aval avé bi ne volô bôte bia bebe bia yé’é Kalate Zambe, a bôte bevok, na be yene mfi ya tabe bisulan? Ayé’é di, bia zu yene beamu 8 ba tindi bia na bi tabe bisulan. Bi ne ta’a beamu bete tañe mengabe melal: mfi ôvé wo yene bisulan? Mfi ôvé bôte bevo’o ba yene bisulan? Aval avé ntabane wo tabe bisulan, wo ve Yéhôva nleme mevak? [2]
3 Bebo bisaé be Yéhôva be ne kom ése, ba yene biyoñe ya tôban ane jôm é ne édima. Nné ane be nga telé akônda Bekristen, beyé’é be Yésus be nga taté na, ba bo mbane ya tabe vôme wua “a tabe nlatane ñbwa.” (MFI ÔVÉ WO YENE BISULAN?
4. Aval avé bisulan biangan, bia volô bia na, bi yem abui mam ma lat a Yéhôva?
4 Bisulan bia ye’ele bia. Ésulan ése ya akônda, ja volô bia na, bi yeme mam ma lat a Yéhôva, Zambe wongan. Éve’an é ne na, mimbu mibaé mi ndôme lôte mi, abui mekônda é nga yé’é kalate ba loone na, Approchez-vous de Jéhovah ayé’é Bible y’akônda. Ye mam ô nga yé’é mfa’a ya mefulu me Zambe, a mbamba biyalane bobejañ a bekal be nga ve, bi nji yemete nye’an wo nye’e Ésa wôé ya yôp été? Bia kô’ôlane fe ñyemane bia yeme Kalate Zambe, éyoñe bia kôme baa alo minkañete ba bo Aba Éjôé, besisia, a nlañane Kalate Zambe. (Néh. 8:8) Tame simesane mbamba be mam wo bi sondô ase, éyoñe wo kômesan, a wô’ô minlô mejô mi ngônô ya nlañane ya Kalate Zambe!
5. Aval avé bisulan bi ye’eleya wo na, ô belane mam wo te yé’é e Kalate Zambe été asu ya na ô yeme kañete?
5 Bisulan bia ye’ele bia avale bia yiane tôñe miñye’elane ya Kalate Zambe, e mefase mese ya ényiñe jangan. (1 Bet. 4:9, 10) Éve’an é ne na, ayé’é ya Nkume mmombô a bete, da jalé miñyiane bebo bisaé be Zambe. Ye ayé’é te é tindiya wo na, ô beta fas minsôñane miôé, na ô jamé monyoñe ya mbunan, nge na ô tu’a yeme ye’elan? Ésulane ya zañe sondô, ja ye’ele bia avale bia yiane kañete mbamba foé, a avale bia yiane volô bôte na, be wô’ô miñye’elane ya Kalate Zambe.—Mt. 28:19, 20.
6. Aval avé bisulane biangan bia ve bia ngule nyôl a wônô bia?
6 Bisulane bia ve bia ngule nyôl. Mbia émo Satan nyi, a ne te’e bia mimfa’a mise. Ve bisulane ya akônda ki, bia wônô, a ve bia ngule nyôl. (Lañe Mam Minlôman 15:30-32.) E bisulane biangan, bi wô’ô yé’é avale minkulane mejô ya Kalate Zambe mia tôéban. Nalé a bo na, bi yemete ndi nlem bi bili na, bengaka’a be Yéhôva ba lat a melu ma zu, be fe, ba ye tôéban. É ne été na, sa ke ve bôt be tele e pôsmôden, mbe étam, ba ve bia ngule nyôl. Ja’a Bekristen ba ve biyalan a yia bia, a nlem ôse, be fe ba bo de. (1 Bec. 14:26) Ja’a éyoñe bia laan a bobejañ a bekale bangan ôsusua na bisulane bia taté, a éyoñe bi maneya, bia wô’ôtane fo’o na, bi ne a bobejañ, a bia wô’ô benya meva’a.—1 Bec. 16:17, 18.
7. Amu jé é ne mfi na bi tabe bisulane ya akônda?
7 Bisulan bia bo na, bi bi mbamba nsisim. Éyoñe Yésus a mbe a keya yôp, a nga jô na: “Nyô a bili alo, a wô’ô mam nsisim wo ajô [mekônda, MN].” (Nli. 2:7) Yaa, Yésus a wulu akônda Bekristen a zene ya mbamba nsisim. Bia yi mbamba nsisim na, bi dañe meve’ele, bi bo ayo’o nlem a na, bi bo nkômesan asu ésaé nkañete. Mbamba nsisim a volô fe bia na, bi nyoñe mbamba mintyi’an. Nga bi lôô na, bia yiane jeñe na, bi bu’uban a minta’ane mi mam mise mia volô bia na, bi bi mbamba nsisim?
MFI ÔVÉ BÔTE BEVO’O BA YENE BISULAN?
8. Éyoñe bobejañe ba yen ane bia tabe bisulan, be wô’ô biyalan bia ve, a avale bia yia bia, jame te da volô be aya? (Fombô’ô fe nka’ale ô ne nlô ajô na, “Éyoñ ése a kôlô ésulan, a wô’ô nyôl éveves.”)
8 Bisulane bia ve bia fane ya liti bobejañe na, bia nyoñe ngap a be. Tame kôme fas avale minju’u bobejañe ya akônda dôé ba tôbane de. Nlômane Paul ô nga tili na: “Nsimesa’an, môt ase a simesa’ane nyô mbok.” Nde fe Paul a nga jô na, bi ne liti na bia nyoñe bobejañe ngap, éyoñe bi ne te ‘jô’é nsula’ane wongan ya vôme wua.’ (Beh. 10:24, 25.) Ntabane wo tabe bisulane wo liti na, éyoñe wo tyi’i na wo tabe a bobenyoñ, é ne dia mise môé. A fe na, wo nyoñe ngap a be, a mam ma fombô be. Nde fe, biyalan wo ve ésulan a nleme wôé ôse, a avale wo yia bia, bia ve bobenyoñ ngule nyôl.—Bec. 3:16.
9, 10. (a) Kate aval avé mejô me ne kalate Jean 10:16 ma volô bia na, bi yem amu jé é ne mfi na bi tabe bisulan. (b) Nge bi ne mban bisulan, aval avé bi ne volô, môte nda bôte jé é beneya?
9 Bisulan bia bo na bi bo nleme wua. (Lañe Jean 10:16.) Yésus a nga jô na a ne mba’ale mintômba, a na beyé’é bé be ne mbame mintômba. Tame fas: Nge mintômba mibaé mi ne abôbône nkôl, mi mivo’o mibaé ki, mi to nkôle si, a wua, ô ja’a vôm éziñe valé, ye wo ye jô na, mintômba mite mitan, mi ne mbame wua? Mbam mintômba ô wô’ô wulu nsamba, ô tôñe zene mba’ale mintômba a liti be. Avale da fe, bia vo’o ke tôñe mba’ale wongane nge môt ase ya bebia, a tobe na a tabe étame vôme wé. Bia yiane bi fulu ya sulan a Bekristen bevok, ndemben, bia ye bo “mbame wua,” bi to éjôé “mba’ale wua” si.
10 Ntabane bisulan wo volô na bi bo nleme wua. (Bs. 133:1) Bobejañe béziñe be ne na, bivuvumane biap, bi beneya be. Ve Yésus a nga ka’a na, a ye ve be nda bôt ya nsisim ja ye nye’e be, a nyoñe ngap a be. (Marc 10:29, 30) Éyoñ ô ne mbane bisulan, ô ne kôme bo ésa, nyia, monyañ, nge ke kale môte wua ya bôte bia nye’e bete! Ye jame te, é nji tindi bia na, bi jeñ a mezene mese na bi tabe bisulane bise?
AVAL AVÉ NTABANE WO TABE BISULAN WO VE YÉHÔVA NLEM MEVAK?
11. Aval avé bisulan bia volô bia na, bi ve Yéhôva jôm ja yiane nye?
11 Ntabane bia tabe bisulan wo bo na, bi ve Yéhôva jôm ja yiane nye. Mbôle Yéhôva a ne Nté wongan, bia yiane ve nye duma a ékaña’a. Bia yiane fe nye ve akéva. (Lañe Nlitan 7:12.) Éyoñe bia ye’elan, a yia bia, a kobô ajô Yéhôva bisulan, bia ve nye jôm ja yiane nye—ékaña’a jangan. Bia yene mvaé ya ve Nyô a nga bo abui mam asu dangan, duma.
12. Yéhôva a wô’ôtan aya éyoñ a yen ane bia bo nye mewôk, a ntabane bia tabe bisulan?
12 Bia yiane fe bo Yéhôva mewôk. A nga jô bia na, bi bo teke bu’i bisulan, e dañe dañe melu ya asu’ulane ma. Éyoñe bia bo Yéhôva mewôk a nleme wongan ôse, a ne mevak. (1 Jean 3:22) Yéhôva a yen, a nye’e fe, ngule bia ve na bi tabe bisulan bise.—Beh. 6:10.
13, 14. Aval avé bia subu Yéhôva ba Yésus bebé éyoñe bi ne bisulan?
13 Ntabane bia tabe bisulan wo liti Yéhôva na, bia kômbô subu ba Mone wé bebé. E bisulane biangan, Beta Ñye’ele wongan a ye’ele bia, a zene ya mejô mé, Kalate Zambe. (És. 30:20, 21) Ja’a bôte be nji bo Bengaa be Yéhôva ba tabe bisulan, be ne jô na: “Zambe a to fo’o be mia.” (1 Bec. 14:23-25) Yéhôva a botane bisulan a zene ya mbamba nsisime wé, a mam mese bia yé’é wôé, ma so be nye. Yéhôva a kobô bia, a liti fe bia nye’ane wé éyoñe bi ne ésulan. Nalé a bo na bi subu nye bebé.
14 Yésus a nga jô na: “Amu vôm bôte bebaé nge bela be asulan a jôé dam, me ne be zañe vôm ate.” (Mt. 18:20) Bi ne jô na, vôme nyi, Yésus a kobô ajô ya bisulan biangan. Mbôle Krist a ne nlô ya akônda, a “wulu ézezañ” mekônda bebo bisaé be Zambe. (Nli. 1:20–2:1) Te vuane de! Yéhôva ba Yésus ba ve bia ngul a zene ya bisulan. Nde ñhe, wo simesane na Yéhôva a wô’ôtan aya, éyoñ a yen avale bia ve ngul ése na, bia subu ba Mone wé bebé?
15. Aval avé ntabane bisulan, wo liti Zambe na, bia kômbô bo nye mewôk?
15 Ntabane bia tabe bisulan wo liti na, bia su’u ngule Zambe a bili na a yiane jôé bôt. Éyoñe Yéhôva a jô bia na, bi tabe bisulan, a nji tindi bia a ngule na bi bo de. (És. 43:23) Nde ñhe, a ne zene ya liti Yéhôva na, bia nye’e nye a nleme wongan ôse, a na bia su’u éjôé jé. (Ber. 6:17) Éve’an é ne na, masa wongan a ne tindi bia na bi bu’i bisulan amu asu ésaé dangan. Éjôé é ne sili bia moné, nge wua bia mimbôk, nge tibili bia amu bia tabe bisulan. É ne fe kui na, bia bebien bia kômbô wo’on awolo ésulan. Éyoñe bi tele été jia ya bité bi, bia yiane top: Za nye bia ye kañ? (Mam Minlôman 5:29) Éyoñe bia tobe na bia su’u ngule Yéhôva a bili na a yiane jôé, bia ve nye nleme mevak.—Mink. 27:11.
BO’O MBANE YA TABE BISULAN
16, 17. (a) Aval avé bia yeme na, bisulan bi mbe beta mfi asu Bekristen ya ntete mimbu ôsu? (b) Mojañe George Gangas, a yene ntabane bisulan aya?
16 Mvuse Pentecôte 33 ya É.J, Bekristen ya ntete mimbu ôsu, be nga ke ôsu a sulan. Kalate Zambe a jô na: “Be nga tabe nnôm éto ve bo mam minlômane mi nga ye’ele be, a tabe nlatane ñbwa.” (Mam Minlôman 2:42) Éfia Grek ba kôñelane na, “tabe nnôm éto” ja tinane na, e ve ngule ya bo mban, nge ke e jibi nté wo mate. Mbôle Bekristen bete be mbe éjôé Beromain si, é nji be tyi’ibi asu dap na be tabe bisulan. Betebe ôsu ya miñyebe be mbe bejuif, be mbe fe, be wosa’ane be. Akusa bo nalé, be nga bo mbane ya tabe bisulan.
17 Abui bebo bisaé be Yéhôva ya melu ma, é nga liti na, da nye’e bisulane nya nye’ane. Bi bili éve’ane George Gangas, nnye a nga bo mimbu 22 a mvuk a to ébu’a ya Tin Ékôan. A nga jô na: “Mfa’a wom, e tabe a bobejañ a ne jame da ya mam ma ve ma meva’a nlem, a mam ma ve ma ngule nyôl. Ma nye’e me bo’o môt ôsu a kui Aba Éjôé a nyô a su’ulane kôlô, éyoñe me ne ngule ya bo de. Me ne meva’a été éyoñe ma laan a bebo bisaé be Yéhôva. Éyoñe bia be be bi ne, ma wô’ôtan ane me ne nda jam a bôte ya nda bôte jam, e Paradis ya nsisim. Aval ane boussole a ne kôm ése a liti akôé, avale te da, asimesane dam a nkômbane wom, bi ne kom ése na, me tabe bisulan.”
18. Jé wo wô’ôtan, éyoñe wo tabe bisulane biangan, a ntyi’an ôvé wo nyoñ?
18 Ye wo fe, wo wô’ôtane nalé éyoñe wo tabe bisulan? Nde, nyoñe ntyi’ane ya bo mbane bisulan. Wo ye liti na ôsimesane wé, wo lu’an a wu Njô bôte David, nnye a nga jô na: “A Yéhôva, m’anye’e ntabane ya nda jôé.”—Bs. 26:8.
^ [1] (abeñe 3) Bobejañe béziñ be nji kui na be tabe bisulan éyoñ ése, amu mam ma kui be atemetem, aval ane ngul ôkon. Be ne tabe ndi na, Yéhôva a yem été be tele, nde fe, a wô’ô mvaé ya yen ane ba kañe nye a nleme wop ôse. Bemvendé be ne volô bôte bete na, be fe be nyoñe ngap e bisulan. Be ne volô be éyoñe ba bo na, be wô’ô bisulan a zene ya téléfôn, nge na be mane nyoñ ésulan ése, éyoñe te ba ke ve bôte bete na, be wô’ô je menda map.
^ [2] (abeñe 3) Fombô’ô nka’ale ô ne nlô ajô na, “Beamu ya tabe bisulan.”