BOO môt a ne kili 1 a mvuk. Ve jame da, môt a binam a be tame yene jôm é to ayaé a lôte nye. Boo a ne fo’o jôm ya semé. Abime bia ye bo ngule ya yeme nye, abime te nde fe bia ye ve Yéhôva Zambe duma, amu mam a nga bo, me ne “teke’e akañete.” (Bs. 139:14, Mfefé Nkôñelan) Bi tame zu fase jame da ya mame boo môt a ne ngule ya bo​—ôsimesan.

Jé é ne ôsimesan? Kalate éziñ a jô na, ôsimesan ô ne, “ngule môt a bili na, a yene mam, bive’ela, nge mimfefé mi mam, nlô wé été. A ne fe ngul môt a bili na, a simesane mam me ngenan teke boban ényiñe jé.” Nga wo yen éyoñe te na, wo simesane mam éyoñ ése? Ye ô lañeya nge ke na, ye ô wô’ôya be kobô’ô ajô ya vôm ô ngenane teke kui môs éziñ? Ye nalé a kamane wo na, ô bo teke simesan avale vôm ate a ne bo? É ne été na, éyoñ ése bia simesan jôm bi se ngule ya yen, e wôk, e tyek, e nambe, nge ke e nyumulu, ôsimesane wongan wo saé.

Kalate Zambe a volô bia na bi yeme na, Zambe a nga té bôt éve’ela jé. (Met. 1:26, 27) Ye nalé a nji liti bia na, Yéhôva émien a bili ngule ya simesan? Nge a nga té bia a ngule ya simesan, a ne amu a yi na, bi belane ngul éte na bi yeme nkômbane wé. (Ecc. 3:11) Aval avé bi ne belan ôsimesane wongan a fek? A aval asimesan avé bia yiane sa’ale?

(1) E yeme biyeyem bi vee mbia éyoñ, nge ke na e simesane mbia be mam.

Ñyemane biyeyem bi vee, ôbien ô nji bo abé. Abui mam da liti na, e yem biyeyem ô vee, a ne bo mfi. Ve kalate Ecclésiaste 3:1 a volô bia na bi yeme jame te éyoñ a jô na, “jam ése . . . é bili éyoñ.” Nge bia ke bia simesan mam mefe bi to ésulan, nge ke éyoñe bia bo ayé’é étam dangan, jé ôsimesane wongan wo bo? Ye wo kolé bia ôbak? Ye wo volô bia? Yésus émien a nga jô bia na, bi tabe ntyele ya jô’é na, ôsimesane wongan ô bo na, bi fas mbia be mam. Éve’an é ne na, bi ne bi ôsimesane ya bo mam bisôk. (Mt. 5:28) Mam méziñ bi ne simesan, me ne bo mam Yéhôva a vini. Nge ô bili ôsimesane ya bo mam bisôk, ô ne su’ulan bo jame te. Nyoñe ntyi’ane ya bo na, ôsimesane wôé ô bo teke bo na, mia Yéhôva mi kandan!

(2) E simesane na, biôm bi mo bi ne ba’ale bia nya mba’alane.

Biôm bi mo bi ne mfi. Ve bi ne ku ébé nge bi taté na bia simesane na, biôm bi mo, mbie bi ne kôme ba’ale bia a ve bia benya mevak. Mfefe’e môt, Salomon a nga tili na: “Akum nkukum e ne tison é ne ngu, ôsimesane wé été akume te e ne mfine mekok, jôm é se nguleya fô’ô wô.” (Mink. 18:11, Mfefé Nkôñelan) Tame ve’ele yene jam é nga kui bôte 80% ya Manila, e Philippines, éyoñ  ndône mendim é nga kui e ngon ébulu ya mbu 2009. Ye bôt be mbe be bili abui akum be nga nyiñ? Nkukum môt éziñ ô nga jañele abui akum ô nga jô na, “Ndône mendim é nga telé bôte bese, minkukum a minzôzoé e minju’u été.” É ne tyi’ibi ya simesane na, biôm bi mo bia ba’ale môt nya mba’alane. Nya ajô a ne na, biôm bi mo bi nji de bo.

(3) E tyele nleme yôp mfa’a ya bivôlevôla bi mam.

Yésus a nga lebe bia na, bi bo te ‘tyele minleme yôp.’ (Mt. 6:34) E bi fulu ya tyele nleme yôp a bo na bi fas abui. Ô ne jañele éyoñe jôé na, wo simesane bivôlevôla bi mam. Kalate Zambe a kate bia na, aval asimesane te é ne te’e bia, nge bo na bi kon. (Mink. 12:25) Bia ye yene beta mfi, nge bia tôñe melebe Yésus a nga ve bia a jô’ô na, bi bo teke dañe tyele minleme yôp a na, bi nyoñe jam ése éyoñe jé.

(1) E yeme yene mbia be mam, a sa’ale be.

Kalate Zambe a jô bia na, bi yeme yene mam ma zu bia ôsu. (Mink. 22:3) E belan ôsimesane wongan a ne volô bia na, bi yeme yene mam me ne so e mintyi’ane bia kômbô nyoñ ôsusua na, bia nyoñe mie. Bi tame nyoñ éve’an. Nge ba bañete wo abô’ô éziñ, aval avé ôsimesane wôé ô ne volô wo na, ô yeme nge wo yiane ke abô’ô te nge momo? Éyoñ ô maneya fas avale bôte da ye tabe abô’ô te, abime bôt da ye tabe, vôm a éyoñ abô’ô te da ye boban, sili’i ñhe womiene na: Jé ja ye bobane wôé? Ye wo simesane fo’o na, abô’ô te da ye boban avale Kalate Zambe a ye’ele? Mfasane te ô ne volô wo na, ô yene nlô wôé été ane abô’ô te da boban. Éyoñe wo belan ôsimesane woé mfa’a ya nyoñe mbamba mintyi’an, nalé a ne volô wo na, ô sa’ale mbia jam ase a ne telé wo meve’ele été.

(2) E simesan avale bi ne kôm mejô.

E belan ôsimesane wongan, a ne fe “ngule ya jibi, a dañe minju’u bia tôbane mie.” Tame simesane na, mia môt éziñe ya akônda mi bili bone mejô. Aval avé mi ne kôme mejô mete? Sili’i womiene na: ‘Môt ate a nye’e na be kôme mejô aya? Éyoñ évé nje é ne  mvô’é na, bi kôme mejô mangan? Bifia bivé, a tyiñe nkobô fé ma yiane belane je?’ Éyoñe wo kôme fas, ô ne yen abui mezene ya kôme mejô mete nlô wôé été. Mvuse ya valé, ô ne tobe zene jia wo simesane na, ja ye volô wo na, ô kôme mejô mete. (Mink. 15:28) Avale mfasane te da ye volô wo na, ô jeñe na, ô kôm aval ajô ése ô ne bi asu mvo’é ya akônda. A ne fo’o mbamba zene ya belan ôsimesane wongan.

(3) E belan ôsimesane wongan éyoñe bia lañ a yé’é Kalate Zambe.

E lañe Kalate Zambe môs ôse a ne mfi. Ve nalé a nji tinane na, bia yiane lañe Kalate Zambe ane kôs. Bia yiane jeñe na bi yeme ñye’elane wo so bifuse bia lañ, a bia yiane bi nkômbane ya bo mam bia lañ ényiñe jangan. Éyoñe bia lañe Kalate Zambe, bia yiane kui na, bi nye’e mezene mé. E belan ôsimesane wongan, a ne volô bia na bi bo de. Aval avé? Ô ne belane kalate ba loone na, Imitez leur foi. Éyoñe bia lañe minkañete ya été, bia yene bevôm, a avale bôte ya melu mvus be mbe be nyiñi ôsimesan wongan été. Bi ne belane mis mangan, bi vô’ôlô biduñ, bi wô’ô binyum, bi wô’ôtane fe avale bôte ya éyoñ éte be mbe be wô’ôtan. Nalé aye bo na, bi nyoñe mbamba miñye’elan, a asimesan da so minkañete ya Kalate Zambe bia to bi buni’i na, bia yem. E belan ôsimesane wongan nalé, e lañ a yé’é Kalate Zambe étam, aye volô bia abui.

(4) E bi, a e liti fulu ya yeme tebe été bôte bevok.

E yeme tebe été bôte bevok, a ne abeñe fulu ja liti na, bia wô’ô be mintaé nleme wongan été. Bia bo mvo’é éyoñe bia vu Yéhôva ba Yésus amu, be fe ba yeme tebe été jangan. (Nk. 3:7; Bs. 72:13) Aval avé bi ne bi fulu te? Beta zene wua bi ne bi fulu te a ne na, bi belan ôsimesane wongan. Bi se ngule ya tôban minju’u mise bobejañ a bekal ba tôban. Ve ô ne sili womiene na: ‘Ma ye wô’ôtan aya nge ma me tele été ji? Jé me ne kômbô na bôt be bo ma?’ E belan ôsimesane wongan na bi yalane minsili mite aye volô bia na, bi beta dañe yeme tebe été bôte bevok. É ne fo’o été na, mam mese ya ényiñe Kristen jangan, ma ye bo mfi éyoñe bia yeme tebe été bôte bevo’o ésaé nkañete, a éyoñe bi ne a bobejañe ya akônda.

(5) E simesan aval ényiñe ya mfefé émo ja ye bo.

Kalate Zambe a kate bia aval ényiñe ya mfefé émo ja ye bo. (És. 35:5-7; 65:21-25; Nli. 21:3, 4) Bekalate bangan be bili abui befôtô da liti ényiñe ya mfefé émo. Amu jé? Befôtô bete ba yoé ôsimesan wongan, a volô bia na, bi yen avale bia ye nyiñe wôé. Yéhôva, Nté ôsimesan, a yeme ngule ya ôsimesan. Mbelane bia belan ôsimesane wongan na, bi yen ane bengaka’a be Yéhôva ba ye tôéban, ô ne volô bia na, bi wulu ba’aba’a a nye, ja’a bi tele e minju’u été.

Amu Yéhôva a nye’e bia, a nga ve bia ngule ya simesane mam. Ngule te é ne kôme volô bia na, bi ke ôsu a kañe nye môs ôse avale da yian. Ngo’o nge bia ke ôsu a ve Yéhôva, Nyô a bo bia beta das ate akéva, a belan ôsimesane wongan a fek, môs ôse.