Éyoñ nalé a kui, bobejañ a besita ya akônda ba yene na alu’u dé ôsu e maneya a na mimfefé beluk mi ne nlatan. Asu na bi tu’a wô’ô amu jé bia jô nalé, bi tame yene jame Yésus a nga jô a lat a môt a tyam alu’u dé a ke lat éfe.

E Kalate Matthieu 19:9, Yésus a nga kate susu’a jam é ne bo na Kristen é tyam aluk. A nga jô na: “Môt a ye suu nga, te yen a za ji’an, a lu’u mfe, a boya mejian.” Mejô me Yésus mete ma ye’ele bia mam mebaé: (1) Mejian étam mme me ne ve fane ya tyam aluk, (2) fam ja suu ngal a too ke na mejian me nji boban, a ke lu’u minga mfe, ja bo mejian. *

Ye mejô mete ma tinane na, Kalate Zambe a ve fam ja te bo mejian a tyam alu’u dé ôva’a ngule ya beta lu’u minga mfe? Bi vo’o de jô. Éyoñe nnôm a te bo mejian, minga a ne te bijô a ne tyi’i na a jamé nnôm nge momo. Nge minga a bene jamé nnôm, éyoñe te ba mane tyam alu’u dap mise bijôé, môt ase ya be be a nto fili ya lu’u môte mfe.

Ve minga a ne te bijô a ne kômbô a nlem wé ôse na a ba’ale nda alu’u jé, a tyi’i na a jamé nnôm. Jé ñhe ja ye boban nge nnôm a te bo mejian a bene na ngal a jamé nye, éyoñe te a tyi’i na a ke tyam aluk? Mbôle ngal a te kañese jamé nye, nnôm a nji bo fili ya beta lu’u minga mfe. Nge nnôm ate a ke ôsu a nsôñane wé ya lu’u minga mfe, a too ke na Kalate Zambe a nji kañese na a bo de, a bo mejian éyoñe baa. Ajô te, bemvendé ya akônda ba ye bôndé émo’o asu melep asu na be volô nye.​—1 Bec. 5:1, 2; 6:9, 10.

Nde, éyoñe mojañ a ke lu’u minga mfe a too ke na Kalate Zambe a nji ve nye ôva’a ngule ya bo de, akônda da ye yene mfefé alu’u wé a alu’u dé ôsu aya? Ye ba minga wé ôsu be ngenan nlatan mise me Yéhôva? Ye minga wé ôsu a ne beta tyi’i na a jamé nye nge momo? Ye akônda da ye jô na mojañ ate ba mfefé minga wé ba bo mejian?

Melu mvus, bi mbe bi taté ye’ele na akônda da ye yene mojañ ate ba mfefé minga wé ane bebo mejian, nté ôse minga wé ôsu a ngenan a vee, nge na a ngenan nkoé, nge ke na a ngenan teke bo mvine mam ya bisôk. Ve Yésus a nji ke kobô ajô minga a ne te bijô éyoñ a nga kobô ajô môt a tyam aluk a ke lat alu’u afe. Ve a nga liti na nnôm a tyam aluk, teke na mejian ma te boban, éyoñe te a ke lu’u minga mfe, a bo mejian. Éyoñe nalé a kui, Yésus a jô na môt a te tyam aluk éyoñe te a ke lat alu’u a minga mfe, a bo mejian, a jam ete da tyam alu’u dé ôsu.

Éyoñe fam ja te tyam alu’u dé, éyoñe te a ke lu’u minga mfe, minga ôsu a vo’o beta jamé nye nge bene jamé nye. Ajô te, minga ôsu a bili ke fe na a beta fas nge é jamé nnôm nge momo. Nde fe, akônda da ye yene mojañ ate ba minga a te beta luk ane bôte be ne nlatan mise m’éjôé, to’o minga  ôsu a ngenan a vee, to’o a ngenan nkoé nge momo, a to’o a boya mvine mam ya bisôk nge momo. *

Éve’ela bi ndôme yene yôp ja liti nnôm a ke tyam alu’u dé a too ke na nnye a te bo mejian. Ve jé ja ye boban nge nnôm a nji bo mejian, ve a tyame alu’u dé a ke lu’u minga mfe? A jé ja ye boban nge nnôm a nji bo mvine mam ya bisôk ôsusua na a tyam aluk, ve a bo je éyoñ a maneya tyam aluk, éyoñe te a ke lu’u minga mfe a too ke na minga wé ôsu a ne nkômesane ya jamé nye? Bive’ela bite bise bibaane, nnôm a te bo mejian. Nde fe, mbôle nnôm a te ke lu’u minga mfe, alu’u dé ôsu e maneya. Ba minga wé baa be ne nlatan mise m’éjôé. Nkume mmombô a bete ya Ngone awôm a jia é to melu 15, mbu 1979, afep 32, a mbe a jô’ô na: “A lateya mfefé aluk. Ajô te, a nji bo ngule ya beta kôlô be minga wé baa, a ke be minga wé ôsu. Alu’u ôsu é nga man éyoñ a nga tyam étas, a bo mejian a beta lu’u minga mfe.”

Mfefé ñye’elane wu ô nji liti na mejian me ne zezé nsem nge ke na aluk e ne zezé jôm. Fam ja tyam aluk a too ke na mejian me nji boban, éyoñe te ja ke lu’u minga mfe, teke na Kalate Zambe a te ve nye ôva’a ngule ya bo jam ete, bemvendé ya akônda ba ye bôndé émo’o asu melep asu na be volô nye, amu a te bo mejian. (Nge minga a ke luk a ne Kristen, bemvendé ba ye fe bôndé émo’o asu melep asu na be volô nye, amu nye fe a te bo mejian.) Akusa bo na alu’u baa e nji bo alu’u ya mejian, fam ja ye bo abui mimbu teke be’e mbe’e éziñ akônda. Nde fe, a vo’o bo de nté ôse bôte bese jam ete e nga ndeñele be ngenan be wô’ô de abé, a nge ba semé ke nye. Ôsusua na bemvendé ba beta tyi’i na ba ve mojañ ate mbe’e éziñ akônda, ba yiane kôme taté fas été minga wé ôsu, nnye ate nnôm a nga wo’o ôsone nyul. Ba yiane fe simesane bone bap be ngenane bongô, mbe bete be nga yiane li’i be bili’i nyui amu mbia jam ésaa wop a nga bo.​—Mal. 2:14-16.

Éyoñ bia simesane mbia be mam bese ba kui éyoñe môt a vañe tyam alu’u dé, éyoñe te a ke lu’u môte mfe, nalé a bo na Bekristen be bo fek, be vu Yéhôva, a na be yen aluk ane jôm é ne édima.​—Éc. 5:4, 5; Beh. 13:4.