Paul a tili na: “Amu metiñ, me nto ñwuan mfa’a ya metiñ, nde ma ye nyiñ mfa’a ya be Zambe.”​—Beg. 2:19.

Jame Paul a nga tili e mbe e tii a ñye’elan a mbe a yi’ na a ve mekônda ya Galatie. Bivuse beye’ele bi nga kômbô wone Bekristene ya wôé. Be mbe be ye’ele’e bôte na asu na môt a bi ényiñ, a yiane tôñe metiñ me Moïse, e dañedañ ma me mbe me tii a ntyi’an atyel. Paul nye a mbe a yeme’e na Zambe a beta ki fe yemete bebo bisaé bé na be tyi’iban atyel. Nde a nga kulane bivuse miñye’elane mite a ayo’o ese, a liti Bekristen mfi ya buni ntañ.​—Beg. 2:4; 5:2.

Kalate Zambe a kôme ye’ele na éyoñe môt a wu, a nji beta yeme mam mese ma bobane si ndôn. (Éc. 9:5) Éyoñe Paul a jô na “Me nto ñwuan mfa’a ya metiñ,” a mbe a kômbô’ô jô na a tôñe ki fe Atiñe Moïse. A mbe a too ndi na mbôle a buni ntañ, a “nyiñ mfa’a ya be Zambe.”

Jam ete e nga boban “amu metiñ.” Aval avé? Paul a nga taté jô na: “Môt a nji kabe amu mimboane mi mame ya metiñ, ve amu mbunan a buni Yésus Krist.” (Beg. 2:16) Teke vaa nge beté, Atiñe Moïse e nga tôé beta nsôñan. Paul a nga kate Begalate na: “[Metiñ] me mbe nkô’ôlan amu mimboan mi abé akekui éyoñ mvoñe bôt éte ja ye so, nje [ngaka’a é] mbe ntiñetan.” (Beg. 3:19) Ôwé, Atiñe Moïse e nga kôme liti ne fômelé na bôte be be’e metyi ya abé be nji bo ngule ya tôñ Atiñ ete ne tiññ, a na be mbe be yi’ mvolan. Atiñ e nga volô bôte na be yemelane na Yésus nnye a ne ‘mvoñe’ Zambe a nga ka’ale be. Ajô te, môt ase a mbe a buni’i Yésus, a mbe zôsôô mise me Zambe. (Beg. 3:24) Paul a mbe ngule ya ve be ñye’elan ôte amu émien a nga kui na a buni Yésus a zene ya Atiñe Moïse. Jôme te nje a mbe a nto “ñwuan mfa’a ya metiñ,” ve a nyiñi’i “mfa’a ya be Zambe.” Sa ke Atiñe Moïse nde e mbe e ngenan e wulu’ ényiñe jé, ve Zambe.

Paul a nga ve fe Bekristene ya Rome avale miñye’elan ete. A nga jô be na: “A bobejañe bam, mia fe mi nga [wu] mfa’a ya metiñ amu nyôle Krist . . . Bi [kôtébaneya] mfa’a ya metiñ, amu bi nga wu mfa’a ya jam nde bi nga vaa été.” (Bero. 7:4, 6) Bifuse ya kalate Beromain bite, to’o ji ya Begalate 2:19, bi nji be bi jô’ô na Paul a nga wu amu Atiñe Moïse e nga liti na a ne mbo mam abé, ve bia liti aval avé Paul a nga kôlô minkôme ya Atiñ ete. Paul a nji be a bili na a beta tôñ Atiñe Moïse, to’o Bekristen. Mbôle be mbe be buni’i ntañ, mbunan ôte ñwô ô nga kôté be.