Éyôlé Zambe é ne aya? Zambe émien a jô na: “Ma me ne Yéhôva, jôé dame le.” (Ésaïe 42:8) Bia koene éyôlé Zambe bebé biyoñ 7 000 e Bible. Ve, abui minkôñelane ya Bible mi nga vaa éyôlé Zambe, a futi biyôlé mese’esa ane “Tate.” Zambe a yi na ô bo mvôé jé, jôm ete nje a jô wo na ô “lo’ene jôé dé.”​—Besam 105:1.

Biyôlé mese’esa bi Yéhôva. Bible a wô’ô belane biyôlé mese’esa bi, na a kobô ajô Yéhôva: “Zambe,” “Nyô a ne ngul ése,” “Nté biôm,” “Ésaa,” “Tate,” a “Njôô ya biôm bise.” Éyoñ bia lañe Bible, bia yene na bôte be nga ye’elane Yéhôva be bela’ane éyôlé mese’esa jé a éyôlé jé ébien, Yéhôva.​—Daniel 9:4.

 Avale Zambe a né. Zambe a ne nsisim. (Jean 4:24) Bible émien a jô na: “Teke môt éziñ a nga tameya yene Zambe.” (Jean 1:18, Mfefé Nkôñelan) Bible a kat avale Zambe a wô’ôtane mam. Bôte be ne ve nye nlem abé, nge ve nye nleme “mvaé.”​—Minkana 11:20; Besam 78:40, 41.

Beta mefulu Zambe a bili. Zambe a nji bo ôbangam, a mvamane bôte ya meyoñe mese. (Mam Minlôman 10:34, 35) A ne fe “Zambe a ko éngôngo a liti mvam, te ji’a yaa, njalan a mboone mvaé a nye’an.” (Nkôlan 34:6, 7, Mfefé Nkôñelan) Ve jame da, beta mefulu mé menyine ma, mme ma dañe yené.

Ngul. Mbol a ne “Zambe ya Ngul Ése,” a ne ngule ya tôé bengaka’a bé bese.​—Metata’a 17:1.

Fek. Teke môt éziñ a ne fek a dañe Zambe. Jôm ete nje Bible a jô na a ne “susu’a mfefek.”​—Beromain 16:27, Mfefé Nkôñelan.

Zôsôô. Mam mese Zambe a bo me ne zôsôô. Mimboone mié mise mi ne “zôsôô,” a a ne te bo “mbia jam.”​—Deutéronome 32:4.

Nye’an. Bible a jô na “Zambe a ne nye’an.” (1 Jean 4:8) Zambe a nji su’u ve na a liti bôte nye’an, émien a ne ne nye’an. Beta nye’ane wé a wulu mam mese a bo, a bia bu’ubane nye’an ôte abui mezen.

Amvôé é ne zañe Zambe a bôt. Zambe a ne Ésaa wongan a nye’e bia. (Matthieu 6:9) Nge bi too nye mebun, bia ye bo bemvôé bé. (Besam 25:14) Ajô te nde, Zambe émien a jô wo na, ô subu nye bebé a zene ya meye’elan, a na ‘ô ve nye mam mese me atyelé wo nleme yôp, amu nnye a ba’ale wo.’​—1 Pierre 5:7; Jacques 4:8.

Yésus a nji bo Zambe. Yésus a ne avale dé étam, amu nnye étam Zambe émien a nga té. Jôm ete nje Bible a loene nye na Mone Zambe. (Jean 1:14) Éyoñ a téya Yésus, Yéhôva a nga belane ntôle Mone wé ôte ane “mie mbo ésaé” na a té biôm bise bivok.​—Minkana 8:30, 31; Becolossien 1:15, 16.

 Yésus a nji jô môs éziñ na a ne Zambe. A nga viane jô na: “Me nga so be [Zambe], Nnye a nga lôme ma.” (Jean 7:29) Môs éziñ éyoñ a mbe a laan a ñyé’é wé wua, Yésus a nga loene Yéhôva na “Ésa wom a Ésa wônan,” a “Zambe wom a Zambe wônan.” (Jean 20:17) Mvus awu Yésus, Yéhôva a nga wômôlô nye na a ke nyiñe yôp, a ve fe nye beta éto mbo nnôme Wé.​—Matthieu 28:18; Mam Minlôman 2:32, 33.

Yésus a ne volô wo na ô subu zambe bebé

Yésus a nga so si va na a zu ye’ele bia mam a lat a Ésaa. Yéhôva émien a nga kobô ajô Yésus a jô’ô na: “Nyina a ne Mone wom me anye’e: vô’ôla’ane nye.” (Marc 9:7) Yésus a yeme Zambe a lôte môt ase. A nga jô na: “Te ke môt a yeme Mon, ve Ésa; Te ke môt a yem Ésa, ve Mon, a môt Mon a kômbô liti nye.”​—Luc 10:22.

Yésus a nga tune mefulu me Zambe. Yésus a nga tune mefulu m’Ésaa, jôm ete nje a mbe ngule ya jô na: “Môt a nga yene ma a yeneya fe Tate.” (Jean 14:9) Mejô me Yésus a mimboone mié mi nga liti na a vu nye’an Yéhôva; a zen éte, Yésus a nga volô bôt na be subu Zambe bebé. A nga jô na: “Ma me ne zen, me ne fe benya mejôô, a ényiñ: te ke môt a zu be Tate, ve amu ma.” (Jean 14:6) A nga beta fe jô na: “Bôte ba kañe Zambe nya nkañane ba ye kañe Tate a nsisim a [benya mejôô]; amu Tate a yi na avale bôte te e kañe nye.” (Jean 4:23, Mfefé Nkôñelan) Za avale mbamba jam ete! Yéhôva a jeñe bôt ba kômbô tu’a yeme nye, ane wo.