Yésus a nga jô na: “Ayoñ de aye wosan ayoñ afe, a njô bôt a ye wosan njô bôt mfe; si je aye dañe fô’ôsan, a mfumbale ya zaé a mbia be akon bi aye bo mimfa’ abui.” (Luc 21:10, 11) Mam mete mese ma ye bo ndem Yésus a nga jô je. Éyoñe mam mete mese ma ye yené éyoñe jia, a ye bo ndeme ja bo’olô na “Éjôé Zambe é ntoo bebé.” Ye mam mete mese ma bobane fo’o éyoñe jia mefôla mese ya si? Tame yen bive’ane bi:

1. BETA BITA

Bita bi nga boban mbu 1914 bi nga bômane abui mesi a wôé abui bôt a dañe bita bise bivok. Bôte ba fas minkañete ya émo milañ ba jô na, mbu 1914 ô mbe étua mbu, amu mbu ôte ñwô Beta Bita bi ôsu bi nga bômane si ése bi nga taté. Bijôé bi nga belane beta beminsini ba wôé bôt éwôé wôé aval ane bechar, bebombe, bitua mengal. Mvuse ya valé, bôte be nga bebelane bombe atomique Beta Bita bi baa. Ataté éyoñ ete, bita bia boban bevôm bevôm a wôé bemillion be bôt.

2. MIMFÔ’ÔSANE MI SI

Kalate Britannica Academic a liti na mbu ôse, mimfô’ôsane mi si bebé 100 mia bobane si ése a mia “ndaman abui biôm.” Centre américain d’études géologiques (USGS) a liti na “ataté mbu 1 900, beta mimfô’ôsane mi si bebé 16 mia boban mbu ôse.” Beyeme mam béziñ ba jô na, tañe mimfô’ôsane mi si é ne ve bet amu beminsini ba volô na be ji’a mie yen be nto abui. Akusa bo nalé, beta mimfô’ôsane mi si mia soo abui minjuk a wôé abui bôt aval é ngenan te tame boban éyoñ éfe.

 3. BEMFUMBALE YA ZAÉ

Bemfumbale ya zaé ba dañe so amu bita, ébotezel, azoé, amu ba ve ki bôte bese bidi avale da yian, nge ke amu ba bé ki bidi éyoñe ja yian. Programme alimentaire mondial (PAM) ya “mbu 2018” a liti na: “Bôte million 821 si se ba di ki abime da yian, wônaa bôte million 124 y’été ba bômbô si môs ôse teke bone fiamesan.” Mbu ôse, bongô bebé million 3,1 ba wu amu ba di ki avale da yian, jôm ete nje mbu 2011, bebé bongô 45 ntet ôse be nga wu étome zaé.

4. AKON

Organisation mondiale de la santé (OMS) a liti na: “Bibubua bi akon bi nga jaé si ntet mimbu 21. Minnôme mi akon ane choléra, peste a zôñ mi beteya so, a mimfefé mi akon ane ôkone wo nambe bisaa bi nlem ba loone na syndrome respiratoire aigu sévère (SRAS), ôkone wo nambe bisaa bi nleme wo so Moyen-Orient, ébola a ôkon ba loene Fulasi na Zika, mi soya.” Akusa bo beyeme mam a bedokita be yemeya abui mam a lat a akon, be ngenane teke kui na be saé akon ése.

5. ÉSAÉ NKAÑETE JA BOBANE SI ÉSE

Yésus a nga kobô ajô jam afe da ye liti na Éjôé Zambe é nto bebé; a nga jô na: “Mbamba foé ya [Éjôé] Zambe nyô a ye katebane si se, a ye bo meyoñe mese ndem; wôna asu’ulane de aye bo.” (Matthieu 24:14) Nté bôte ba tôbane minju’u mevale meva, bôte million mwom a mvuk ba kañete mbamba foé ya Éjôé Zambe mesi 240, a minkobô a lôte 1 000. Avale jam ete é ngenane te tame boban môs éziñ.

Mam Yésus a nga jô a lat a ndeme a nga ve ma kôme yené melu ma ne fômelé. Amu jé jam ete da fombô bia? Amu Yésus a nga jô na: “Éyoñ mi ayene mam mete me bo’ok, yemekane na [Éjôé] Zambe é nto bebé.”​—Luc 21:31.

Éyoñe bia fombô avale mam me nga boban ane mimbu mia lôt, bi lôbô’ô fe ndeme Yésus a nga ve, bi ne jô teke si’ibi na mbu 1914 * ñwô Éjôé Zambe é nga teléban yôp. Mbu ôte ñwô Yéhôva a nga telé Mone wé Yésus Krist Njôô ya Éjôé Zambe. (Besam 2:2, 4, 6-9) Ana’ana, Éjôé Zambe ja ye jôé si, a tyame bijôé bise ya si nyô, a bo na bone be bôt be nyiñe nnôm éto Paradis.

Ana’ana bifia ya meye’elane Yésus a nga ye’ele bia bi, bia ye tôéban: “Éjôé jôé é za’ak, nkômbane wôé ô boba’ane si nyô aval ane wo bobane yôp.” (Matthieu 6:10, Mfefé Nkôñelan) Jé Éjôé Zambe é boya nté ane é nga telébane yôp mbu 1914? A bibotan bivé bia ye bi éyoñ Éjôé ete ja ye jôé si ése?