NGE môt wo too ô nye’e a te wu, wo fe ô ne wô’ô nlem mbia mintaé; ô ne fe taté na wo wô’ôtane na ô ne étam a na be vo’o volô wo. Éko éziñ ôlun ô n’été, woñ, a wo ve womiene bijô. Wo yiane fe sili womien nge wo ye fo’o beta bu’uban ényiñ.

Tabe’e ndi na, mintaé wo wôk mi nji ve’ele tinane na ô ne atek. Mia viane liti abim avé môte wo too ô nye’e a mbe dia mise môé. Ve jé é ne volô wo na, ô jibi mintaé wo wôk?

Ja’a da yené v’ane mintaé miôé mia ye ke man, melebe ma me ne volô wo:

NYOÑE’ ÉYOÑE YA YÔNE MÔTE WÔÉ

Awu da nambe ki môt ase avale da. Ve miñyôn mi ne boone sili mintaé wo wôk. Vanessa bia te jôô nye atata’a a jô na: “Me mbe me yônôk asu na mintaé mi boone sis.” Sofía, nnye ate monyañ a nga wu atemetem a jô na: “Ma wô’ô nlem mintaé éyoñ ése ma simesane jam é nga boban; a ne ane éyoñe ba yoé aveñ na be sôb a saé de. Mintaé mi ne fo’o te ke’ajibi ve, nalé a volô na aveñ e mane yet.”

KATE’ AVALE WO WÔ’ÔTAN

Biyoñ biziñ ô ne kômbô tabe étam, bi ne wô’ô jam ete. Ve ba’ale’e na, ô vo’o be’e abime mbe’e te  étam. Jared a bili mimbu awôm a zangbwal; ésa wé a nga wu; a jô na: “Me nga kate bôte bevo’ avale ma wô’ôtan. Me nji tu’a buni na be nga mane wô’ô mam mese me nga jô be, ve nalé a nga volô ma abui.” Janice bia te jôô nye nlô ajô ya atata’a, a liti mvolan ôfe bi ne bi, a jô na: “E laan a bôte bevok a nga volô ma nlem nya abuii. Me mbe me wô’ôta’ane na ba tebe été jam, a na me se ke étam.”

KAÑESE’E MVOLAN

Dokita éziñ a jô na: “Éyoñ bôte ba te bi awu ba ji’a kañese na bemvôé bap a bivuvumane biap bi volô be, e wô’ô bo tyi’ibi na be jibi mintaé ba wôk a dañe mie.” Kate’e bemvôé bôé jam be ne bo asu dôé; be ne kômbô volô wo, ve teke yeme vôme be taté.​—Minkana 17:17.

SUBU’U ZAMBE BEBÉ

Tina a jô na: “Éyoñe nnôme wom a nga wu cancer atemetem, Zambe étam nnye me nga li’i me bili na me kate minju’u miam a mam mese ma tyele ma nleme yôp. Tyé ése éyoñ me mbe me kôlô’ si, me mbe me ja’é nye na, a volô ma na me kee ényiñe jam ôsu. A nga volô ma adañ abim me mbe me simesa’an.” Tarsha nnye ate a mbe mimbu 22 éyoñe nyia a nga wu a jô na: “Nlañane Kalate Zambe môs ôse ô nga ve ma ngule nyul. Ô nga ve fe ma mbamba be mame ya fas.”

SIMESA’AN ÉYOÑ WO YE BETA YENE MÔTE WÔÉ

Tina a ke ôsu a jô na: “Atata’a, ndi nleme ya ñwômane miñwuan é nji be é volô’ô ma, amu me mbe me yi nnôme wom, bone bame ki ésa wop. Ve den, mvuse mimbu minyin, ma bi ndi nlem éte a mo mebaé. Ja volô ma na me jibi. Ma simesan éyoñ ma ye beta yene nye, a nalé a ve ma mvo’é ya nlem a mevak!”

Mintaé mi aye ke fo’o man été été. Ve jam é nga kui Vanessa e ne ve wo ngule nyul. A jô na: “Ô ne taté buni na wo ye beta bo mvo’é môs éziñ, ve ôte’ete’ ôte’etek, mintaé mii ke mia sis.”

Ba’ale’e na, ja’a môte wôé a ye k’ôsu a jembane wo, ô ne beta bu’uban ényiñ. Zambe ya nye’an a ne volô wo na ô k’ôsu a bu’uban mbamba bemvôé, a na ô bi nsôñan ényiñ. Ana’ana Zambe a ye wômôlô miñwuan. A yi na ô beta wubane môte wo too ô nye’e. Éyoñ éte nje ñhe mintaé mi ne wo nlem mia ye man éyoñe jia ya biyoñe bise!