1. Nkômbane Yéhôva ô ne ôvé den?

 DEN, nkômbane Zambe ô ne na mbamba foé ya Éjôé Zambe a katebane si se. (Marc 13:10; 1 Tim. 2:3, 4) Ésaé éte é ne ésaé Yéhôva a é ne nya mfii mise mé aval e ne na, a nga telé Mone wé na nnye a tebele je. Bi ne tabe ndi na mbôle Yésus nnye a tebele ésaé éte, ésaé nkañete ja ye boban avale Yéhôva a yi, ôsusua na asu’ulan da so.​—Mt. 24:14.

2. Jé bia zu yen ayé’é di?

² Ayé’é di, bii yen aval Yésus a belan “ôlo ô ne mewôk a fek” asu na a ve beyé’é bé bidi ya nsisim, a tebele beta ésaé nkañete ja boban si se. (Mt. 24:45) Bii yene fe jam môt ase ya be bia a yiane bo asu na a suk Yésus ba ôlo ô ne mewôk a fek.

3. Éjôé évé be nga ve Yésus?

³ Yésus nnye a tebele ésaé nkañete. Aval avé bi ne tabe de ndi? Mone éyoñ ôsusua na a bulane yôp, Yésus a nga sulan beyé’é bé béziñ nkôle ya Galilée. A nga kate be na: “Me maneya nyoñ ngul ése ya yôp a si.” Ve tame yen jam a nga jô be mvuse ya valé: “Ajô te kelan, mi bo meyoñe mese beyé’é.” (Mt. 28:18, 19) Nalé a tinane na Yéhôva a nga ve Yésus éjôé asu na a bo abui mam, to’o ésaé nkañete.

4. Amu jé bi ne tabe ndi na Yésus a ngenan a kele’ ôsu a tebele ésaé nkañete?

 ⁴ Yésus a nga jô na ésaé nkañete ja ye boban “meyoñ mese,” a na é tabe a beyé’é bé “melu mese, akekui asu’ulane ya si nyô.” (Mt. 28:20) Mejô mete ma liti ne sañesañe na Yésus é tebele ésaé nkañete éte azukui melu ma.

5. Aval avé bia tôé nkulan ajô ya Besam 110:3?

⁵ Yésus a nji tyele nleme yôp na bekañete mbamba foé bé bo tyôtyoé melu ma su’ulan. A mbe a yeme’e na nkulan ajô ya Besam wu wé tôéban: “Bôte bôé ba nye’e be va’a bebien môse ya ngule jôé.” (Bs. 110:3) Nge wo nyoñ ngab ésaé nkañetane mbamba foé, yeme’e na wo su’u Yésus a ôlo ô ne mewôk a fek, a na wo tôé nkulan ajô ôte. Ésaé éte ja ke ôsu, ve mam mese ma wulu ki nkone nkon.

6. Nju’u ôvé bekañete mbamba foé ba tôbane wô den?

⁶ Beta nju’u wua bekañete mbamba foé ba tôbane nye a ne mewosan. B’apostat, betebe ôsu ya miñyebe, a bôt ba bo pôlitik be wô’ô laane bôt minsos a lat a ésaé nkañete jangan. A nalé a ne bo na bivuvumane biangan, bôt bia yem, a bôt bia be be bia saé, be taté na ba yemete bia na bi jô’é ésaé bia bo Yéhôva a ésaé nkañete. Mesi méziñ, besiñ bangan ba bo mam méziñ asu na bi koo woñ, ba wosane bia, a ba bi bobejañ a besita a wua be mimbôk. Bia vembe ki éyoñ bôt ba bo bia nalé. Yésus a nga kuli ajô na: “Meyoñe mese ma ye vini mia amu jôé dam.” (Mt. 24:9) Étibela’a éte ése ja kôme liti na bia tôñ éve’ela Yésus a na Yéhôva a wô’ô bia mvaé. (Mt. 5:11, 12) Diable nnye a ne étibela’a éte mvus. Ve Yésus a ne ngul a lôte nye! A mvolane Yésus, ésaé nkañete ja nambe bôte ya si se. Bi tame zu yene mam ma bo’olô de.

7. Jé ja liti na nkulan ajô ya kalate Nlitan 14:6, 7 wo tôéban?

⁷ Beta nju’u mfe bia tôbane nye den a ne na bôt ba kobô abui minkobô. Ñyenan Yésus a nga ve nlômane Jean, a nga jô na ésaé nkañete ja ye boban akusa bo nju’ ôte. (Lañe’e Nlitan 14:6, 7.) Aval avé jam ete da boban? Bia ve bôte bese fane ya vô’ôlô mbamba foé. Den, bôte ya si se be bili fane ya lañ bekalate ba kobô ajô Zambe anjeñe mefoé dangan, amu é ne nkôñelan minkobô e lôte 1 000! Tin ékôan é nga ve ôva’a ngul na be kôñelane kalate Bu’uban ényiñ nnôm éto!, ékpwelé bia dañe belane je asu na bi bo meyé’é, minkobô e lôte 700! Bia kuli fe bevidéo asu mindôndok a bekalate asu mindindim nkobô braille. Bia yene fo’o ane minkulan mejô ya Kalate Zambe mia tôéban. Bôte “be so’o minkobô mise ya meyoñ” ba yé’é “nkobô ô ne mfuban,” benya mejôô ya Kalate Zambe. (Zac. 8:23; Soph. 3:9) Mam mete mese ma boban amu Yésus a ne éwôlô ntebe ôsu.

8. Bibuma bivé ésaé nkañete jangan é wumeya?

⁸ Den, bôt e lôte million 8 be ne ékôane Yéhôva mesi 239, a mbu ôse bôt 100 000 ba duban! Jame da dañ e ne mbamba mefulu be bili. Be jaéya “mfefé môt.” (Beco. 3:8-10) Be jô’éya mbia be mam be mbe be bo’o melu mvus ane mvine mam ya bisôk, évô, ôbangam, a nkañan ayoñ. Nkulan ajô  ya kalate Ésaïe 2:4 wo tôéban, amu ‘ba beta ki fe yé’é mewosan.’ Éyoñe bia ve ngule ya jaé mfefé môt, bia dutu bôt ékôane Yéhôva, a bia liti na bia tôñe Ntebe ôsu wongan, Yésus Krist. (Jean 13:35; 1 P. 2:12) Jé ja volô bia na bi bo mintyendan mite? Yésus a ve bia mvolan wo sili.

9. Jé Matthieu 24:45-47 a nga jô a lat a melu ma su’ulan?

⁹ Lañe’e Matthieu 24:45-47. Yésus a nga jô na melu ma su’ulan, é telé “ôlo ô ne mewôk a fek” asu na a ve beyé’é bé bidi. Bi ne wôk amu jé ôlo ôte wo saé a ngul ése melu ma. Ntebe ôsu wongan a nga belan mone nsamba bobejañ be ne miñwo’on asu na a ve bebo bisaé bé a bôte ba nye’e mejô me Zambe “bidi éyoñ a yiane ve.” Bobejañ bete ba simesane ki na be ne bejôô ya mbunan wongan. (2 Bec. 1:24) Ve ba kôme yeme na Yésus nnye a ne “ntebe ôsu a njôô” ya ékôane jé.​—És. 55:4.

10. Bekalate bevé be ne fôtô nyi be nga volô wo na ô wulu zene ya ényiñe ya melu mese?

¹⁰ Ataté mbu 1919, ôlo ô ne mewôk a fek wo kuli bekalate meval meva. Bekalate bete be nga ve bôte ba kômbô vô’ôlô mejô me Zambe fane ya di bidi ya nsisim éyoñ ôsu. Mbu 1921, ôlo ôte ô nga kuli La Harpe de Dieu asu na ô volô bôte ba nye’e mejô me Zambe na be yé’é minten miñye’elane ya Kalate Zambe. Ane mimbu mi nga lôt, bekalate befe be nga kui. Kalate mbé a nga volô wo na ô yeme Yéhôva a nye’e nye? Éko éziñ a mbe kalate wua ya bekalate ba: “Que Dieu soit reconnu pour vrai,” La  vérité qui conduit à la vie éternelle, Vous pouvez vivre éternellement sur une terre qui deviendra un paradis, La connaissance qui mène à la vie éternelle, Jé Kalate Zambe a tu’a ye’ele? Jé Kalate Zambe a ne ye’ele bia? Nge ke Bu’uban ényiñ nnôm éto! mfefé kalate ô ndôme kui. Kalate ase ya été a nga jalé mingum miñyian éyoñ a nga kui.

11. Amu jé e ne nya mfii na bia bese bi bi bidi ya nsisim?

¹¹ Sa ke bôte be ndôme yem benya mejôô mbe étam ba yiane di bidi ya nsisim bi ne ayet. Bia bese bia yiane bo de. Nlômane Paul ô nga jô na: “Ayete bidi e ne jôme ya benya bôtô.” Paul a nga ke ôsu a jô’ô na éyoñ bia tôñe mam bia yé’é Kalate Zambe, nalé a volô bia na bi bi “mefe’e ya yemelan mvaé a abé.” (Beh. 5:14) Mbôle bia nyiñ mbia biyoñ a bôte ba bo angôndô ya mbia be mam, e ne bo angôndô ya ayaé na bi tôñ memvinda me Yéhôva. Ve Yésus a véé mise na bi bi bidi ya nsisim bii volô bia na bi yemete mbunan wongan. Bidi bite bia so Kalate Zambe été. Ôlo ô ne mewôk a fek wo tôñ mebendé me Yésus éyoñ wo kômesan a kabe bidi bite.

12. Ane Yésus, aval avé bi nga ve éyôlé Zambe duma?

¹² Ane Yésus, bia ve éyôlé Zambe duma ja yiane je. (Jean 17:6, 26) Bi nga nyoñ éyôlé jangan, Bengaa be Yéhôva, e Kalate Zambe été. Bi nga taté na bia looban a éyôlé éte mbu 1931, nalé a nga liti abim avé éyôlé Zambe é ne mfi mise mangan, a na bia yi na bôte be yeme bia a zene ya éyôlé Ésaa wongane ya yôp été. (És. 43:10-12) Ataté  Ngon awômô ya mbu ôte, éyôlé Zambe é nga taté na ja kui ékô’ôla ya Nkume mmombô a bete ase. Nde fe na, Traduction du monde nouveau a nga beta futi éyôlé Zambe vôm ase é mbe Kalate Zambe. Jam ete da kôme liti na bia selan a miñyebe mia jô na mi ne Bekristen a too ke na, mia vaa éyôlé Yéhôva abui minkôñelane bekalate Zambe bap!

13. Jé ja liti wo na Yésus a belan “ôlo ô ne mewôk a fek” den? (Jean 6:68)

¹³ A zene ya “ôlo ô ne mewôk a fek,” Yésus a nga bo nta’ane mam asu na a telé ngum aval ékôane si va mfa’a ya wumulu nya ékaña’a. Wo wô’ôtan aya éyoñ wo yen ékôan éte? Éko éziñ wo wô’ôtan ane nlômane Pierre, ñwô ôte ô nga jô Yésus na: “Bia ye ke be za mfe? Wo ô bili mejô ya ényiñ ya melu mese.” (Jean 6:68) Nge bi nji ye yem ékôan Yéhôva, ve bi telé été évé den? Yésus a belan ékôan éte asu na a ve bia mam mese ma sili, ndemben bii ba’ale ngul élate a Zambe. A yañele bia asu na bi bo atyeñ ésaé nkañete. A volô fe bia na bi jaé “mfefé môt,” asu na bi ve Yéhôva nlem avak.​—Beép. 4:24.

14. Bibotan bivé ô nga bi éyoñe ya ébubua ôkon COVID-19 amu ô ne ébu’a ya ékôane Yéhôva?

¹⁴ Yésus a ve bia mbamba melep éyoñ ébubua éziñe ja kui. Jam ete e nga tu’a yené éyoñ ébubua ôkon COVID-19 é nga taté. Nté abui bôt e nji be e yeme’e jam be bo, Yésus a nga véé mise na bi bi melebe me ne volô bia na bi ba’ale binyiñ biangan. Be nga ye’ele bia na bi jaé bemasque éyoñe bia kui nseñ, a na bi bo teke budan a bôte bevok. Be nga  lebe fe bemvendé na be laan a bibu’a ya akônda éyoñ ése asu na be yem nge be ne mvo’é minsôn a nsisim. (És. 32:1, 2) Bi nga bi fe ngule nyul a abui melep afe a zene ya mefoé me mbe me so’o Tin ékôan.

15. Melebe mevé bi nga bi a lat a ntaban bisulan a ésaé nkañete éyoñe ya ébubua ôkon, a bibotan bivé bi nga bi?

¹⁵ Éyoñe ya COVID-19, be nga ve bia mebendé a lat a aval bia yiane bo bisulan a ésaé nkañete. Bi nga ji’a beta taté na bia tabe bisulan, bitôkan, a beta bitôkan a zene ya nkol. Bi nga beta fe taté na bia bo ésaé nkañete, e dañedañ a zene ya bekalate a téléfôn. Yéhôva a nga botane ngul ése bi nga ve. Abui Bebéthel e nga jô na, tañe bekañete mbamba foé é nga nen abui mesi. Abui bekañete mbamba foé e nga saé nya abuii éyoñe ya ébubua ôkon ôte abui bevôm.​—Fombô’ô nka’ale ô ne nlô ajô na “ Yéhôva a botan ésaé nkañete jangan.”

16. Ndi nleme fé bi ne bi?

¹⁶ Bôte béziñ be nga jô na ékôane Yéhôva ja beté ôdo’é éyoñ é nga ve mebendé a lat a COVID-19. Ve e nga kôme yené abui biyoñ na mebendé mete me nga veeban a fek. (Mt. 11:19) Nté bia bindi aval avé Yésus a wulu beyé’é bé a nye’an ôse, bia tu’a tabe ndi na to’o jé ja kui melu ma zu, Yéhôva ba Mone wé ba ye ke bia li’i étam môs éziñ.​—Lañe’e Behébreu 13:5, 6.

17. Wo wô’ôtan aya éyoñ wo simesane na Yésus nnye a wulu ékôane jangan?

¹⁷ Ngo’o abim meva’a bia wôk amu Yésus a ne Ntebe ôsu wongan! Bi ne mevak amu bi nji bo ékôan é ne nkandan amu metum, ayoñ, nge ke minkobô. Bi bili mbamba bidi ya nsisim, a bi bili bikpwelé asu ésaé nkañete. Môt ase ya be bia a yé’é aval ane jaé mfefé môt, a bia yé’é aval avé bi ne nye’esan. Ôwé, bi bili abui beamu ya vak, Yésus a ne Ntebe ôsu wongan!