1. Aval avé bia yene fane ya ye’elane Yéhôva?

 BI BILI fo’o beta mvom amu bi ne ngule ya ye’elane Nté ya yôp a si. Tame ve’ele fase jame di: Bi ne yoé Yéhôva minleme miangan éyoñ ése bia yi a nkobô ôse bia yi, teke na bia taté nye sili ôva’a ngule ya laan a nye. Bi ne ye’elane nye bi bôô énoñ ôkon, nge ke nda mimbôk, bi too ndi na Ésaa wongan a vô’ôlô bia. Ve bia nyoñe ki mvom éte éngbwemese.

2. Aval avé Njô bôte David a nga liti na a nyane mvome ya ye’elan?

² Njô bôte David a mbe a nyane’e mvome ya ye’elan. A nga jô Yéhôva na: “Kañese’e na, meye’elane mam me tebe asu dôé aval ane encens.” (Bs. 141:1, 2) Melu me David, beprêtre be mbe be nyoñe’ éyoñe ya kôme encens be mbe be bela’ane nye asu nya ékaña’a. (Nk. 30:34, 35) Éyoñe David a nga kobô ajô encens, a nga liti na a kômbô nyoñ éyoñe ya kôme fas mam a zu kate Ésaa wé ya yôp. Nne bia fe bia yi nalé. Bia yi na meye’elane mangan me ve Yéhôva nlem avak.

3. Jé bia yiane bo éyoñe bia ye’elane Yéhôva, a amu jé?

³ Éyoñ bia ye’elane Yéhôva, bia yiane belane bifia bia liti na bia semé nye nya nseman. Tame simesane miñyenan Ésaïe, Ézékiel, Daniel, a Jean be nga bi. Miñyenan mite mise mia selan fo’o, ve mia funan mfa’a éziñ. Bôte bete bese be nga yene Yéhôva ane Njô bôt a to étôto’o été. Ésaïe a nga yene Yéhôva “a to éto njôô, é mbe yôp  a mbetane yôp.” (És. 6:1-3) Ézéchiel a nga yene Yéhôva a to char wé ya yôp, mbôma’ane a “éfufup . . . aval ane ndutum.” (Éz. 1:26-28) Daniel a nga yene “Nnôme ya melu” ô be’e mengômesan me too éfumulu, a nduan é so’o éto njôan jé. (Dn. 7:9, 10) Jean a nga yene Yéhôva a to éto njôane jé, mbôma’ane a jôm é yené ane abeñe ndutum é funa’an émeraude. (Nli. 4:2-4) Éyoñe bia simesan abim étôto’o Yéhôva a bili, bia tu’a yemelane na bi bili beta mvome ya subu nye bebé a zene ya meye’elan. Bia yene fe mfi ya bo de a ésemé ése. Nde, aval avé bia yiane ye’elan?

4. Jé bi ne yé’é éyoñe bia fombô atata’a ya meye’elane me Yésus bia koone me Matthieu 6:9, 10?

⁴ Lañe’e Matthieu 6:9, 10. Nkañete Yésus a nga bo nkôle yôp, a nga ye’ele beyé’é bé avale be ne ye’elane Yéhôva a ve nye nlem avak. Éyoñe Yésus a maneya jô be na “ye’ela’ane Zambe,” a nga taté kobô ajô beta be mam be tii a nkômbane Yéhôva: Jôé dé da yiane bo étyi; Éjôé jé ja yiane so asu na é tyame besiñe bé bese, a bibotan a mbe a yi na môta binam a bu’ubane bie si va. Éyoñe bia kobô ajô mam mete meye’elane mangan été, bia liti Zambe na nkômbane wé ô ne mfi mise mangan.

5. Ye e ne mvo’é na bi ye’elane Yéhôva asu mam me tii a binyiñe biangan?

⁵ Ngabe baa ya meye’elane mete, Yésus a nga liti na e nji bo abé na bi ye’elan asu mam ma fombô binyiñe biangan. Bi ne sili Yéhôva na a ve bia bidi ya môs, na a jamé bia bikobe biangan, na a kamane bia éyoñe ya meve’ele, a na a kôté bia mo be mbia môt. (Mt. 6:11-13) Éyoñe bia ja’é Yéhôva avale mam ete, bia liti nye na bi nga ve nye binyiñe biangan, a na bi bili nkômbane ya ve nye nlem avak.

6. Ye mam bia yiane sili Yéhôva me ne fo’o ve ma Yésus a nga tote meye’elan mé? Timi’in.

⁶ Yésus a nji be a yi na beyé’é bé be belane fo’o ve bifia a nga ye’ele be éyoñe ba kômbô ye’elan. Éyoñe Yésus  émien a nga ye’elan, biyoñe biziñ a mbe a kobô’ô ajô mam mefe me mbe nye mfi awolo ete. (Mt. 26:39, 42; Jean 17:1-26) Avale te da da, bi ne ye’elan asu mam ma fombô binyiñe biangan. Éyoñe bi bili ntyi’ane ya nyoñ, bi ne sili Yéhôva fek a mbamba ñyenane mam. (Bs. 119:33, 34) Éyoñe bia kômbô taté na bia bo ésaé éziñ é ne ayaé, bi ne sili Yéhôva mvolan asu na bi yem aval avé bi ne bo je. (Min. 2:6) Bebiaé be ne ye’elan asu bon bap. Bon be ne ye’elan asu bebiaé bap, a bia bese bi ne ye’elan asu beyé’é Bible bangan a bia yiane bo de, to’o asu bôte bia kañete. E ne été na, éyoñe bia ye’elane Zambe, bia yiane ki lôt éyoñe jangan ve na bia sili nye mam.

7. Amu jé bia yiane ve Yéhôva duma éyoñe bia ye’elane nye?

⁷ Éyoñe bia ye’elane Yéhôva, bia yiane ki vuane ve nye duma. Teke môt mfe a yiane duma ane Zambe wongan. A ne “mvaé, a avôle ya jamé.” A ne fe njalan a “nkoone bôt éngôngol a mvam, [a] ne te ji’a yaa, a abui mvam a benya mejôô.” (Bs. 86:5, 15) Bi bili fo’o mbamba beamu ya ve Yéhôva duma amu aval Zambe a ne, a bitua bi mam a nga bo.

8. Mam mevé me ne bo na bi ve Yéhôva akiba? (Besam 104:12-15, 24)

⁸ Ane ô vaa na bia yiane ve Yéhôva duma éyoñe bia ye’elane nye, bia yiane fe nye ve akiba asu mbamba be mam a nga ve bia. Éve’an é ne na, bi ne ve Yéhôva akiba amu a nga ve bia mesam mevale meval, angôndô ya mbamba bidi, a mbamba bemvôé. Ésaa wongan a ve bia mam mete a abui mam afe fo’o ve asu na bi bo meva’ été. (Lañe’e Besam 104:12-15, 24.) Jame da dañe mfi e ne na, bia ve Yéhôva akiba amu bidi ya nsisim a noo bia ne vôô nat, a amu mbamba ndi nlem bi bili asu melu ma zu.

9. Jé é ne volô bia na bi bo te vuane ve Yéhôva akiba? (1 Bethessalonicien 5:17, 18)

⁹ Bi ne ji’a vuane ve Yéhôva akiba asu  mam mese a bo asu dangan. Jé é ne volô bia na bi bo te vuan? Ô ne tili mam méziñ ô nga ja’é Yéhôva afep, éyoñe te wo bo ô nyoñe’ éyoñe ya fombô afeb ete asu na ô yen aval avé Yéhôva a yalane meye’elane môé. Éyoñ ô yeneya na Yéhôva a yalane wo, bo’o meye’elan asu na ô ve nye akiba. (Lañe’e 1 Bethessalonicien 5:17, 18.) Tame fase jame di: Éyoñe bôte bevo’o ba ve bia akiba, bi ne mevak a bia wô’ôtane na ba nye’e bia. Avale te da da, éyoñe bia bo te vuane ve Yéhôva akiba éyoñ a yalane meye’elane mangan, bia ve nye nlem avak. (Beco. 3:15) Ve jam avé afe da dañe ve bia nkômbane ya ve nye akiba?

10. Bela’ane 1 Pierre 2:21 asu na ô liti amu jé bia yiane ve Yéhôva akiba asu Mone wé.

¹⁰ Lañe’e 1 Pierre 2:21. Bia yiane ve Yéhôva akiba amu a nga lôm atyi’i Mone dé na é zu ye’ele bia. Éyoñe bia bindi nkañete Yésus, bia yé’é angôndô ya abui mam a lat a Yéhôva a avale bi ne ve nye nlem avak. Éyoñe bia liti na bia buni ntañ, bia bi mbamba élat a Yéhôva Zambe, a nalé é soo fe bia mvo’é.​—Bero. 5:1.

11. Amu jé bia yiane ye’elane Yéhôva a zene ya be Yésus?

¹¹ Bia ve Yéhôva akiba amu bi ne ye’elane nye a zene ya be Mone wé. Yéhôva a belane Yésus asu na a ve bia mam bia ja’é nye. Yéhôva a vô’ôlô meye’elan bia bo a zene ya jôé Yésus, a yalane fe me. Yésus a nga jô na: “Mam mese mia ye ja’é a jôé dam, ma ye bo me, nalé Mon a ye wumu Ésaa.”​—Jean 14:13, 14.

12. Jam avé afe da ve bia nkômbane ya ve Yéhôva akiba asu Mone wé?

¹² Yéhôva a ne ngule ya jamé mam abé mangan amu ntañ. Kalate Zambe a jô na Yésus a ne bia “beta prêtre [a to] si mbo nnôme ya éto njôô ya Nyô a dañ a to yôp été.” (Beh. 8:1) Yésus a ne fe bia “mvañ be Ésaa.” (1 Jean 2:1) Bia ve fo’o Yéhôva abui akiba amu a nga ve bia Beta prêtre a ne mvam, a yeme’e tebe été jangan, a nyô a “volô ye’elane Zambe ajô dangan”! (Bero. 8:34; Beh. 4:15) Bi be’e metyi ya abé, ajô te nge teke ntañ, bi vo’o subu Yéhôva bebé a zene ya meye’elan. Teke bisô na bi vo’o kôme ve Yéhôva akiba abime da yian asu édima das éte.

13. Aval avé Yésus a nga liti na a nye’e beyé’é bé?

¹³ Alu be nga zu bi Yésus na ba ke wôé nye, a nga ye’elan ayab éyoñ asu beyé’é bé, a sili’i Ésaa wé na a ‘ba’ale be, mbia môt a za nyoñe be.’ (Jean 17:15) Yésus a mbe a nye’e fo’o be angôndô ya abui! A mbe a nga zu tôbane beta meve’ele, ve a mbe a tyelé’é nlem yôp asu dap.

14. Aval avé bi ne liti na bia nye’e bobejañ a besita bangan?

¹⁴ Aval ane Yésus, bia fe bia fombô ki fo’o ve miñyiane miangan, ve bi wô’ô fe ye’elan asu bobejañ a besita bangan. Éyoñe bia bo nalé, bia tôñ abendé Yésus a nga ve bia na bi nye’esan, a bia liti Yéhôva abim avé bia nye’e bobejañ a besita. (Jean 13:34) Bia jañele ki éyoñ éyoñe bia ye’elan asu bobejañ a besita. Kalate Zambe a kate bia na “meye’elane ya zôsôa môt ma dañ ngu mfa’a ya mam ba bo.”​—Jc. 5:16.

15. Amu jé da sili na bi ye’elan asu bobejañ a besita?

 ¹⁵ Da sili na bi ye’elan asu bobejañ a besita bangan, amu ba tôban abui meve’ele. Bi ne sili Yéhôva na a volô be éyoñe ba kon, éyoñ bibubua nge ke bita bia te kui vôm be too, éyoñe ba tibili be, nge ke éyoñe ba tôban minju’u mife. Bi ne fe ye’elan asu bobejañ a besita ba nyume bebien mam asu na be su’u ba be tele minju’ été. Éko éziñ womien wo yeme bobejañ a besita béziñ ba tôban avale minju’ ete. Nga ô ne ye’elane Yéhôva ô tote’e biyôlé biap? Éyoñe bia sili Yéhôva na a ve be fulu mban ya jibi, bia liti na bia nye’e be.

16. Amu jé bia yiane ye’elan asu bobejañ be tele bia ôsu?

¹⁶ Bobejañ be bili mimbe’e akônda be ne mevak éyoñe bia ye’elan asu dap, a meye’elane mete ma volô be nya abuii. Nlômane Paul ô nga yene mfi ya meye’elan Bekristen bevok. A nga tili be na : “[Ye’ela’an] ajô dame na, ngule ya nkobô ja ye vebane be ma éyoñ ma kui anyu dame na, ma kañete nsolane ya mbamba foé a ayo’o nlem.” (Beép. 6:19) Dene fe, bi bili bobejañ abui ba tebele bia. Bia liti na bia nye’e be éyoñe bia ye’elane Yéhôva na a botan ésaé jap.

17-18. Avale biyoñ avé be ne sili bia na bi ye’elan asu bôte bevok, a jé bia yiane ki vuan?

¹⁷ Biyoñ biziñ be wô’ô bañete bia na bi ye’elan asu bôte bevok. Éve’an é ne na, sita a wulu ayé’é éziñ a ne sili sita a te zu litane nye na a bo meye’elan. Éko éziñ sita a te zu liti nye a kôme ki yeme ñyé’é Bible, ajô te a ne kômbô bo meye’elan memane ya ayé’é. Nalé a ne bo na a kôme yeme mam a ne sili Yéhôva asu ñyé’é Bible ate.

¹⁸ Be ne fe sili mojañ na a ye’elan ésulan asu nkañete nge ke akônda. Bobejañ be bili mbe’e ya bo de ba yiane ki vuane nsôñane ya bisulan biangan. Ba yiane ki belane meye’elan mete asu na be lebe akônda nge ke kalane mefoé. Nta’ane mam asu bisulan biangan ô wô’ô ve fo’o  ve minute mitan asu jia a meye’elan, ajô te, mojañ a yiane ye’elan a yiane ki “jaé kobô,” e dañedañ atata’a ya ésulan.​—Mt. 6:7.

19. Jé é ne volô bia na bi tabe kômesan asu môse Yéhôva é tyi’i si nyi ajô?

¹⁹ Bia yiane dañe ye’elane Yéhôva éyoñe ji, amu môse ya ntyi’ane mejô wé ô nto bebé. Jôme te nje Yésus a nga jô na: “Momba’ane melu mese, a ye’elane Zambe, ajô te nde mia ye bo ngule ya sa’ale mam mete mese ma ye boban.” (Luc 21:36) Ôwé, éyoñe bi ne mbane meye’elan, bia ba’ale ngule mbunan, asu na môse Yéhôva ô bo teke bilane bia.

20. Aval avé bi ne bo na meye’elan mangan me bo ane encens a bili mbamba menyum?

²⁰ Jé bia te yen ayé’é di? Bia nyane beta mvome ya ye’elane Zambe. Bia dañe kômbô ye’elan asu mam ma dañe mfi, mam me tii a nkômbane Yéhôva. Bia ve Yéhôva akiba amu atyi’i Mone dé, a Éjôé jé. Bia ye’elane fe asu bobejañ a besita bangan. Nde fe, bia ye’elan asu miñyiane miangan ya minsôn a mi ya nsisim. Éyoñe bia kôme fase mam bia zu jô meye’elan été, bia liti na bia nyan édima das éte. Éyoñe te meye’elane mangan mé bo mis me Yéhôva ane encens a bili mbamba menyum, mme “a yene mvaé.”​—Min. 15:8.