Momo. Teke jôm éziñe ja liti nalé Bible. To’o nkañete ya bôte be nga nyiñ éyoñ éte ô nji su’u ôsimesan ôte.

Minkôñelane mi Bible miziñ mmie mi nga bo na bôte be buni na, melu me Paul, bôte be mbe be duba’an asu bewu. Ane nkôñelane wu: “Nge e nga ye bo aval afe, bôte ba duban asu mimbim be nga ye bo aya?”​—Mfefé Nkôñelan.

Ve tame yene jame befase Bible bebaé be nga jô. Dr. Gregory Lockwood a nga jô na teke atañe ndem da liti na môt éziñe ya éyoñe Paul a nga duban asu bewu. Professeur Gordon Donald Fee ki a jô na: “Bia koone ki avale mbaptizô ete Bible nge ke nkañete bôte ya éyoñ éte. Nouveau Testament a tote ki ve môte wua a nga duban aval ete, to’o ñyebe Bekristene ya ntete mimbu ôsu, to’o miñyebe mi nga tééban éyoñe minlômane mise mi maneya wu.”

Bible a jô na Bekristene ba yiane bo bôte ya “meyoñe mese beyé’é, a baptizô be . . . , a ye’ele be be ba’ale mejô mese” a nga jô. (Mt. 28:19, 20) Nde, ye môt a ne ñhe bo ñyé’é Yésus a duban nge a nji taté bi ñye’elan, a buni nye, a bo ba Ésaa wé mewôk? Môt a wuya a vo’o de bo, môte mfe ki a vo’o de bo asu dé.​—Ec. 9:5, 10; Jean 4:1; 1 Bec. 1:14-16.

Jé Paul a kômbô ñhe jô?

Bekristene béziñe be mbe be jô’ô éyoñ éte na bewu ba ye ke wômô. (1 Bec. 15:12) Ve Paul a nga liti be na ba kop. A nga kate be na a ne nkômesane ya wu môs ôse. E ne été na a mbe a nga’an a vee. Ve akusa bo a mbe a yeme’e na besiñe bé be ne wôé nye, Paul a mbe a too ndi na, fo’o ve ane Yésus, nye’e fe é wômô a ke nyiñe yôp.​—1 Bec. 15:30-32, 42-44.

E mbe e sili’i na Becorinthien be kôme yeme na, Kristen é ne ñwo’on é bili na ja tôbane minju’u môs ôse, a wu ôsusua na ja zu wômô. Be mbe be yiane wô’ô na, “ba bese be nga baptizôbane Krist Yésus été, be nga baptizôbane fe awu dé été.” (Bero. 6:3) Nalé a tinane na be’efe be mbe be yiane taté tôbane minjuk a wu ôsusua na ba wômô.

Mimbu mibaé a mvuk mvuse mbaptizô wé, Yésus a nga jô beyé’é bé na: “Nduan mamiene ma ye duban, mia ye dubane wô.” (Marc 10:38, 39, Mfefé Nkôñelan) Yésus a nji be na a beta dubane mendim éyoñ a kobô’ô mam mete. Ve a liti valé na a ye tôbane minjuk fo’o ve amu a kômbô wulu ba’aba’a a Zambe. Paul a nga jô na miñwo’on ‘ba be Yésus’ ba ye ‘jibi mintaé, nde mia ye fe wum ba be nye.’ (Bero. 8:16, 17; 2 Bec. 4:17) Ajô te e mbe e sili’i na be’efe be wu a wômô miñwuan a ke nyiñe yôp.

Bi ne ñhe kôñelane mejô me Paul avale di: “Ve amu jé ba dubane ñhe na be bo miñwuan? Nge bewu ba ye ke wômô, mfi ôvé ñhe na be duban aval ete?”