1. Amu jé bia yiane kañe ve Yéhôva étam?

YÉHÔVA étam nnye bia yiane kañ amu nnye a nga té bia, nnye fe a ve bia ényiñ. (Nli. 4:11) Ve jam ete é ne bo ayaé biyoñ biziñ. To’o bia nye’e Yéhôva a semé nye, bi ne bo te tu’a ve nye ékaña’a a yiane je, amu bia telé mam mefe ôsu ényiñe jangan. Da sili ñhe na bi yem aval avé jam ete é ne kui. Ve, é ne mfi na bi taté yem jôme ja tinane na e kañe ve Yéhôva étam.

2. Nkôlan 34:14 a liti na jé bia yiane bo asu na bi liti na bia kañe ve Yéhôva étam?

² Éyoñ Bible a jô na bi kañe ve Yéhôva étam, nalé a tinane fe na bia yiane nye nye’e édo’o nye’an. Bi vo’o nye’e môte mfe nge jôm éziñ éfe abime bia nye’e nye.​—Lañe’e Nkôlan 34:14.

3. Amu jé be vo’o jô na bi ne mekut amu bia jô na bia zu kañe ve Yéhôva étam?

³ Bi nji bo mekut amu bia tyi’i na bia kañe ve Yéhôva étam. Nge bia bo de, a ne mbôle bi nga kôme yé’é yem avale Môt a né. Mbamba mefulu mé me nga nambe bia. Bia yem mam a nye’e a ma a vini, a bi ne tyiñe jia a nye. Bia yeme nsôñane wé a lat a môta binam, a bia su’u wô a nlem ôse. Bia wô’ô mvaé amu a ve zezé bôt ane bia fane ya bo bemvôé bé. (Bs. 25:14) Mone jam ase bia  yé’é a lat a Yéhôva a tindi bia na bi tu’a kômbô subu nye bebé.​—Jc. 4:8.

4. (a) Aval avé Satan a tindi bia na bi bo te dañe nye’e Yéhôva? (b) Jé bia zu yen ayé’é di?

⁴ Satan nnye a jôé émo ji, a belane je na a tindi bia na bi ku Zambe. (Beép. 2:1-3; 1 Jean 5:19) A yi na bi dañe nye’e biôme bife asu na ékaña’a jangan é bo teke bo ngumba. Bi tame yene mam mebaé a wô’ô jaé belane me. Jam ôsu, a kômbô tindi bia na bi tôñesan akum, di baa, a kômbô tindi bia na bi tobe mbia mimvôman.

5. Amu jé bia yiane tabe ôzañ akume ntyel?

⁵ E nji bo abé na môt a jeñe jôme ya di, a bi mbamba mengômesan a mbamba étaba’a. Ve bia yiane tabe ntyel a ôzañ akum. Abui bôte ya émo Satan da nye’e moné a biôm bise moné a ne kus a lôte nné. (2 Tim. 3:2) Yésus a mbe a yeme’e na beyé’é bé fe be ne ku ôlam ôte. Ane a nga jô be na: “Teke môt a ne ngule ya wô’ô [bemasa] bebaé: amu a ye vini wua a nye’e nyô mbok; nge sa nalé, wônaa a ye wô’ô wua a biasé nyô mbok. Mi nji bo ngule ya tôñe Zambe a akum.” (Mt. 6:24) Nge môt a bo na, a kañe Yéhôva mfa’a wua, ve mfa’a ôvo’o ki a tôñesa’an akum a ngule jé ése, wônaa a jeñe na a saane bemasa bebaé. Môt ate a nji kañe ve Yéhôva étam.

6. Mejô Yésus a nga jô akônda ya Laodicée me ne ye’ele bia jé?

⁶ Memane ya ntete mimbu ôsu É.J., bôte béziñe ya akônda ya Laodicée be mbe be tameta’ane na be ne minkukum, a na be nji jembane jôm éziñ. Ve mise me Yéhôva ba Yésus, be mbe  “éngôngo ôsame a azoé a ndim a soé.” Ve Yésus a nji lebe be amu be mbe be bili abui akum, ve amu be mbe be viane jô’é na akume dab é ndaman élate jab a Yéhôva. (Nli. 3:14-17) Nge bia yene na ôzañ akum ô nga kômbô nyiine bia nlem, bia yiane sôan ôsimesane wongan avôl avôl. (1 Tim. 6:7, 8) Amu nge bi bo fianga, bi ne taté na bia nye’e akum, Yéhôva ki a vo’o beta kañese ékaña’a jangan éyoñ éte. Amu jé? Amu a ne “Zambe ya aban.” (Dt. 4:24) Aval avé môt a ne fo’o kôme bo bo ôzañ akum?

7-9. Jé nkañete mvendé éziñe ya Amelka wo ye’ele bia?

⁷ Tame yenané jam e nga kui David, mvendé éziñe ya Amelka. A jô na a mbe éwôlô mbo ésaé. Be nga bete nye minkôñe vôm a mbe a saé’, ngovina ya nlam a jalé jalé fe nye begalon. David a jô na: “Me mbe me jô’ô na Yéhôva nnye a nga bo na be bete ma minkôñ aval ete.” Ve ye a mbe a bele nga?

⁸ Mvuse mon éyoñ, David a nga viane yé’ane na ésaé éte ja ndeñele amvôé dé a Yéhôva. A jô na: “E mbe e kui biyoñe biziñe na me too Aba Éjôé nge ke nkañete, ve asimesane dam ése é too nda bisaé. Ésaé jam é mbe é va’a fo’o ma abui moné, ve nlem ô nji be ô bôô ma si; alu’u dam é nga ye fe ndamane ndaman étom ésaé éte.”

⁹ Ane David a nga yemelane na a yiane kôme fas mam a telé ôsu ényiñe jé. A jô na: “Me nga tyi’i fo’o na mam ma zu tyendé.” David nye’e na a zu taté sé’é mewolo a lôt ésaé, ane a nga ke  laan a masa wé. Be viane vaa nye bisaé. David a zu ñhe bo aya? A jô na: “Môs ôbien ô nga tôé valé, me nga nyoñ ésaé nkpwa’a mefane ya étun éyoñ tañ abui bengon.” David ba minga wé be nga taté na ba bo mfumbane menda asu na be bi mone dolé. David a nga su’ulane fe nyoñ ésaé nkpwa’a mefane ya éyoñ ése, mvuse ya valé minga wé a nga bo ve avale da da. Abui bôt da vini fatan asu ésaé ba ngal ba bo, ve ésaé éte é nji ndeñele bebien, amu sa ke asu ésaé dap nde da dañe mfi ényiñe jap. To’o be nji beta bi abui moné, amane ngon ése, David ba ngal be bili abime da sili asu na be jalé miñyiane miap. Mbôle Yéhôva nnye ba kômbô telé ôsu ényiñe jap, bebiene be yeneya a mise maba na, a ne Zambe a su’u bôte bese be too nye mebun.​—Mt. 6:31-33.

10. Aval avé bi ne ba’ale minlem miangan?

¹⁰ Bia bese, bi kusa bi abui akum nge momo, bia yiane kôme tabe ntyele ya bo te nyiñili ôzañ akume minleme miangan été. Bi nji yiane kañese na asu ésaé dangan nde é tebe ôsu, ésaé bia bo Yéhôva ki mvus. Aval avé ô ne yeme na ô biliya ôlame ya ôzañ akum? Sili’i womiene na: ‘Ye me wô’ô bo na me too nkañete nge ke ésulan, ve nleme wom ôse ô too asu ésaé dam? Ye ma bôndé mefe’e éyoñ ése na me bi abui moné melu ma zu? Ye bia minga wom nge ke nnôme wom bi ne kom ése ve mejô étome moné a biôm bi mo? Ye me ne fo’o bo aval ésaé ése, to’o bôte ba biasé je, amu ma kômbô bi éyoñe ya kôme bo Yéhôva ésaé? (1 Tim. 6:9-12) Nté bia sili biabebiene minsili mite, te bia vuane na Yéhôva a nye’e bia, a na a ka’ale môt ase a nye’e nye a nlem ôse na: “Ma ye bo te suu wo étam mfa’a éziñ, nalé fe ma ye bo te li’i wo zezé mfa’a éziñ.” Jôm ete nje Paul a nga ve bia melebe ma: “[Bo’ane] nti mfa’a ya nye’an akum.”​—Beh. 13:5, 6.

11. Mimvôman môt a top mi ne soo nye jé?

¹¹ Yéhôva a yi na bi bu’uban ényiñ; a mimvômane mi ne bo bia mfi mfa’a ôte. Kalate Zambe émien a kôme jô na “jam afe e nji bo môte mvaé ve na, a ja’ak a nyu, a tindi nleme [wé] ô wô’ô mvaé ésaé jé.” (Eccl. 2:24) Ve abui  mimvômane ya mbia émo nyi mi ne angôndô ya abé. Mia bo na bôte be bo mbia be mam, a na be nye’e biôme Zambe a vini.

12. Kalate 1 Becorinthien 10:21, 22 a liti na amu jé bia yiane tabe ntyel éyoñ bia tobe mimvômane miangan?

¹² Mbôle bia kômbô kañe ve Yéhôva étam, bi vo’o di “tawôlô Yéhôva” a “tawôlô mimbia minsisim.” (Lañe’e 1 Becorinthien 10:21, 22.) Bia yeme na bemvôé mbe ba bo be ja’a tebele wua. Nge mimvômane wo top mia ngôné évô, njet, mvite mame ya bisôk, mbia minkômban, nge ke mam me tii a mimbia minsisim, wônaa wo di bidi besiñe be Yéhôva ba te yam. Jam ete da ye ke su’u ve na da soo womiene minjuk, da ye fe ndaman élate jôé a Yéhôva.

13-14. Jacques 1:14, 15 a liti na amu jé bia yiane tabe ntyel éyoñ bia tobe mimvôman? Nyoñe’ éve’an.

¹³ Amu jé bia jô na mimvôman mi ne ane bidi? Biababiene bi ne ngule ya tobe jôme ja ke bia anyu. Ve éyoñe bi maneya mine bidi, bi vo’o beta yem avale bia ye ke bo bia nyul été wôé. Nge bia di mbamba bidi, bia ye bo mvo’é minsôn, ve nge bia di mvite bidi, bia ye kon. To’o bi nji fame ôkon été été, bia ye su’ulane kone môs éziñ.

¹⁴ Nne fe mimvômane mi ne nalé, biabebien bia tobe mam bia nyiñili ôsimesane wongan. Éyoñ ke bi maneya nyiñili me, bi vo’o beta jôé mam ma ye so bia ôsimesan a nlem. Mbamba mimvôman mi ne soo bia mbamba be mam, ve mvite mimvôman é ne wôé bia. (Lañe’e Jacques 1:14, 15.) To’o bia yene na mbia jam éziñ a nji kui bia été été, mbia mimvômane mia ye su’ulane bo bia abé, teke vaa nge beté. Jôm ete nje Bible a ve bia abendé di: “Te du’uban; Zambe a ne te jibi ébiasé: amu jôm ése môt a mias, nje éte a ye kôan. Amu na nyô a miase mfa’a ya minsône mié émien, a ye kôane bibole bi mame ya minsôn.” (Beg. 6:7, 8) Nga bia yen amu jé bia yiane kôme sa’ale mimvômane mia ngôné mame Yéhôva a vini?​—Bs. 97:10.

15. Mbamba dase mbé Yéhôva a nga bo bia?

¹⁵ Abui Bengaa da nye’e télé wongan. Marylin a jô na: “Télé Bengaa be Yéhôva a nga volô ma na me bi mbamba b’asimesan; mam mese ma yen été me ne mvo’é. Éyoñ ma wô’ô mamien éngôngo, befiliya be ne été ba ve ma ngule nyul. Nalé a bo na me wô’ôtane na me nji bo étam, me ne Yéhôva ba ékôane jé bebé. Mam ma yene télé wongan me nga tyendé ényiñe jam angôndô ya abui.” Ye wo fe wo yene fo’o mfi ya dase Yéhôva éte? Ngon ése, mimfefé mi mam mia kui télé wongan, b’audio, bevidéo, a abeñe bia bi ne vô’ôlô éyoñ ése bia yi.

16-17. Amu jé bia yiane tabe ntyel a abim éyoñ bia lôte na bia vôman, a aval avé bi ne bo de?

¹⁶ Sa ke ve avale mimvômane bia top nde étam é ne ajô, ve bia yiane fe tabe ntyel a abim éyoñ bia lôte na bia vôman. Amu nge bi bo fianga, mimvômane mi ne mane di bia éyoñe bia yiane kañe je Yéhôva. Abui bôte da yen ayaé ya telé mimvôman été ja yiane mie. Abigaïl, sita éziñ a bili mimbu 18 a jô na: “Éyoñ me te’eya ésaé ngume môs, me wô’ô yene télé na me vômane mone jôm.  Ve nge me teke tabe ntyel, me ne lôte mewolo me nkolo me yene’e ve télé.” Samuel a bili mimbu 21 a jô na: “Me wô’ô teme na me yeneya bizu’u bi bone bevidéo internet. Me wô’ô taté a vidéo wua ane fianga, éyoñ éte ma zu teme na me lôteya mewolo me nkolo melal, nge ke menyin me yene’e ve bone bevidéo ba!”

¹⁷ Jé é ne volô wo na ô bo teke dañe lôt éyoñe ve na wo vôman? Taté fas abim éyoñe mimvômane mia nyoñe wo. Tili’i tili’i je ngume vôm. Tili’ abim éyoñe wo zu lôte na wo yene télé sondô nyi calendrier wôé, nge ke abim éyoñ wo zu lôt internet, nge ke na wo lé bejeu video téléfôn nge tablette wôé. Nge ô yene na mimvôman mia di wo abui éyoñ, jeñe’e na ô bo mfefé nta’ane mam. Telé’é mam ma dañe mfi ôsu, a li’i mon éyoñ tyôtyoé asu mimvôman. Mvuse ya valé, ye’elane Yéhôva na a volô wo na ô semé nta’ane mame wôé. Nalé é volô wo na ô bi ngul a éyoñe ya kôme bo ayé’é étame dôé, ayé’é ya nda bôt, a na ô bo ngule ya tabe bisulan, a kañete a ye’ele bôt avale da sili. Nge ô bo nalé, wo ye bu’uban éyoñe wo lôte na wo vôman, mone môte ya nleme teke ndeñele wo, amu wo yeme na mame ya nsisim mme wo telé ôsu.

18-19. Aval avé bi ne liti na bia kañe ve Yéhôva étam?

¹⁸ Éyoñ a maneya kobô ajô asu’ulane ya émo Satan a nzuane ya mfefé émo, nlômane Pierre ô nga jô na: “A bôte ma nye’e, amu mia yange mam mete, va’ane ngule na [mi nyiñe] mvo’é été, [a na mi bo] teke meyeñ . . . a bijô.” (2 P. 3:14) Nge bia tôñe melebe mete, a nyiñ avale Yéhôva a yi, bia ye liti na bia kañe ve Yéhôva étam.

¹⁹ Satan ba émo jé ba ye ke ôsu a jeñe na be kandé bia be Yéhôva. (Luc 4:13) Ve to’o bi tele été évé, bia ye ke ve’ele nye’e môt éziñ nge ke jôm éfe éziñ abime bia nye’e Yéhôva. Yéhôva étam nnye a yian ékaña’a jangan, a bi tyi’iya na bia zu nye je kôme ve!