MÉTÉOROLOGUE (môt a fas nge mveñe ja ye noñ nge momo) a belane minsini asu na a yem avale môse wo ye bo. Éyoñ éte a yene beta ôkôs a subu’u fefele beta nlam. Mbôl a kômbô nyii bôte ya nlam ôte, a jaé bendé be na be ji’a tup.

Aval ete fe, melu ma, Yéhôva a bendé bôte ya si na mbia “ôkôs” a zu, avale môt a ngenane te tame yen ane si é nga téban. Aval avé a bo de? Jé ja liti na a ve bôt éyoñe ya kômesan asu na ôkôs ôte ô bo te wôé be? Bi tame taté yene mebendé méziñe Yéhôva a nga ve bôte melu mvus.

Melu mvus, Yéhôva a nga jaé bendé bôte na a zu soo “ôkôs,” nge ke ntyi’ane mejô asu ba bese ba bene tôñe memvinda mé. (Min. 10:25; Jr. 30:23) A mbe a ba’alane bôte bete jam da yange be ayab éyoñ ôsusua na a yaa, a liti’i fe be avale be ne bo nye mewôk. (2 Bb. 17:12-15; Néh. 9:29, 30) Asu na a volô be, a mbe a lôme’e bebo bisaé bé na be ke liti be mfi ya ji’a tyendé.​—Amos 3:7.

Noé a ne môte wua Yéhôva a nga belane nye. A nga bo mimbu a jô’ô mbia be bôte ya éyoñe jé a ayo’ ése na ndône mendim ja zu. (Met. 6:9-13, 17) A nga kate fe be jôm ba yiane bo asu na be bo teke wu; mbôl a mbe a bo’o jam ete mban, be nga su’ulane loone nye Bible na “nkate foé ya mame ya zôsôô.”​—2 P. 2:5.

Akusa bo nju’u ôse Noé a nga nyoñ, bôte ya éyoñe jé be nji bisi foé a mbe a kate’e be. Be mbe te mbunan. Jôm ete nje bese be nga wu éyoñe “ndôn é nga kui.” (Mt. 24:39; Beh. 11:7) Teke môte ya be be a mbe ve jô éyoñ éte na Zambe a nji bemene nye.

Biyoñe biziñe fe, Yéhôva a nji be a ji’a bemene bôt aval a nga bo éyoñe ya ndône mendim. Ve to’o nalé, a mbe a va’a be éyoñe na be kômesan asu ntyi’ane mejô wé. A nga bo de a bôte ya Égypte ôsusua na a lôme Bibubua awôm. Éyoñe ya ébubua zangbwale, a nga jô Moïse ba Aaron na be ke kate Pharaon a bebo bisaé bé na a zu noo mbia meta’a si ya Égypte. Mbôle jam ete e mbe na da bobane tyé kpwaa, ye be nga bi fo’o éyoñe ya kamane binyiñe biaba nga? Bible a yalane na: “Bebo bisaé be Pharaon, nyô ya été a nga ko njôane Yéhôva woñ, nnye a nga tindi bebo bisaé bé a biyeme bié bi mate a ke menda été: a nyô a nji semé njôane Yéhôva, a nga jô’é bebo bisaé bé a biyeme bié mefé.” (Nk. 9:18-21) Nalé a liti na éyoñe Yéhôva a nga ve be é nga yian, ndembene bôte be nga ji’a vô’ôlô abendé be nga sa’ale minju’u ba be nga bo melo be nga tôbane mie.

A ne ve ane Pharaon ba be bebo bisaé bé mbe be mbe bôte b’ôsu be nga bi foé a lat a ébubua awômô. Ve mekute mete me nji bisi foé éte. (Nk. 4:22, 23) Ane mintôle mi bobefame bap mi nga mane wu. Ngo’o éngôngol ajô! (Nk. 11:4-10; 12:29) Ye bi ne jô na éyoñ é nga jembane be nga? Momo. Amu Moïse a nga ji’a fe kate bone b’Israël jam ete, a kate fe be avale be ne bo asu na be nyii  menda me bôte map. (Nk. 12:21-28) Bôte tañ aya be nga bo Moïse mewôk? Bekalate béziñe ba jô na bôte be nga vô’ôlô abendé Moïse be mbe ve kui million éla, été bia lañe fe “jama bôt mevale meva,” b’Israëlite a bôte ya Égypte fufulu, be nga vô’ôlô njôane Yéhôva ya kôlô Égypte.​—Nk. 12:38.

Bone bive’ane bite bibaé bia liti na, ôsusua na Yéhôva a yaa, a wô’ô taté ve bôt abim éyoñ da sili na be tyendé. (Dt. 32:4) Jé ja tindi nye na a bo nalé? Nlômane Pierre wo yalane na Zambe “a ne te kômbô na môt éziñ a . . . jañ, ve na bese be zu kôñelane minlem.” (2 P. 3:9) Yéhôva a wô’ô fo’o bôte mintaé. A yi na be tyendé a bo nye mewôk ôsusua na a zu jian émo.​—És. 48:17, 18; Bero. 2:4.

Dene fe, da sili na bôte be liti été jab a lat a foé ja katebane si se. Éyoñ a mbe si va, Yésus a nga jô na émo ji ja ye tyamban éyoñe ya ‘beta étibela’a.’ (Mt. 24:21) A nga kate beyé’é bé mam ba yiane taté yen a wô’ôtan ôsusua na jam ete da boban. A nga kobô ajô bibubua bi mam bia ye bobane si se, den mam mete mese ma bobane mise mangan.​—Mt. 24:3-12; Luc 21:10-13.

Ajô te, Yéhôva a bendé môt ase ya be bia na a suk éto njôane jé. A yi na bôte ba bo nye mewôk be nyiñe mvo’é den, a na be bu’uban abui bibotane mfefé émo melu ma zu. (2 P. 3:13) Mbôl a yi na bôte be tabe bengaka’a bé ndi, a bo na be bi fane ya wô’ô foé é ne nyii be; foé éte é ne “mbamba foé ya [Éjôé] Zambe,” Yésus a nga jô na ja “ye katebane si se, a . . . bo meyoñ mese ndem.” (Mt. 24:14) Zambe a volôya bebo bisaé bé na be kañete foé éte den mesi ve kui 240. Yéhôva a yi na bizu’u bi bôt bi vô’ôlô abendé dé, ndemben bi sa’ale beta ôkôs a zu bia ôsu nyi.​—Soph. 1:14, 15; 2:2, 3.

Bi vo’o ñhe vañe beta wu nju’u na bia sili nge Zambe a ve fo’o bôt éyoñe ya tyendé. Bi maneya yene na a bo de éyoñ ése. Nsili ô mbôô ñhe na: Ye bôte ba ye fo’o vô’ôlô abendé Yéhôva a tyendé nté éyoñ é nga’an? Ngo’o nge bia ke ôsu a volô abime bôt ese bi ne volô na e bi ényiñe môse Zambe é zu tyame mbia émo nyi.