1. Bibotane bivé bia bi éyoñe bia kate bôte bevok avale bi nga yem “benya mejôô”?

 “AVAL avé ô nga yem benya mejôô?” Teke bisô na ô yalaneya nsili ôte abui biyoñ. A ne nsili ôsu Kristen éziñ é ne sili wo éyoñe ja yi na é tu’a yem wo. Bia nye’e bi wô’ô ane bobejañ a besita ba kañete avale be nga yem benya mejôô a nye’e Yéhôva, a bia nye’e bi kate’e be avale bia yene benya mejôô. (Bero. 1:11) Minlañe mite mi wô’ô volô bia na bi yen abim avé benya mejôô be ne édima. Nalé a volô bia na bi tu’a yemete ntyi’ane wongane ya “wulu benya mejôô été,” éyoñ bia bo de bia tobe fatan ényiñe jé soo bia bibotan a ve Yéhôva nlem avak.​—3 Jean 4.

2. Jé bia zu yen ayé’é di?

² Ayé’é di, bia zu yene beamu béziñe ba bo na bi nye’e benya mejôô. Mvuse ya valé, bii yen aval avé bi ne ke ôsu a liti na bia nye’e beta das ate. Teke bisô na mam mete mese mé volô bia na bi tu’a ve Yéhôva akiba amu a nga dutu bia benya mejôô. (Jean 6:44) Nalé é yemete fe nkômban wongane ya ye’ele bôte bevo’o benya mejôô.

3. Beta jam mbé a bo na bi nye’e benya mejôô?

³ Bi bili abui beamu ya nye’e benya mejôô. Beta amu a dañ a ne na bia nye’e Yéhôva Zambe, anjeñe ya benya mejôô. A zene ya Kalate wé, Bible, bi nga yé’é na Yéhôva a nji bo ve Zambe a ne ngul ése, Nté ya yôp a si, a ne fe Ésaa a nye’e bia, a nyoñe fe ngab a  bia. (1 P. 5:7) Bia yeme na Zambe wongan a ne nkoon “éngôngo a mvam, ôte’ete’e ya yaa, a bili abui mvam a benya mejôô.” (Nk. 34:6) Yéhôva a nye’e zôsôô. (És. 61:8) A wô’ô angôndô ya mintaé nlem éyoñ a yen bi tôbane minjuk, a ne ôjeja’a ya mane minju’u mise bia tôbane mie mbamba éyoñ. (Jr. 29:11) Bia fe bia yange môs ôte a ôjeja’a ôse! Beta amu wua a bo na bi nye’e Yéhôva abui nnye ñhe le!

4-5. Amu jé nlômane Paul ô nga ve’e ndi nleme jangan a atyi étyé?

⁴ Jam avé afe da bo na bi nye’e benya mejôô? Benya mejôô ba soo bia abui bibotan. Bi tame nyoñ éve’an. Benya mejôô ya Bible ba ve bia ndi nlem asu melu ma zu. Asu na a liti bia abim avé ndi nlem éte é ne édima, nlômane Paul ô nga tili na: “Nje été bi bili ane atyi étyé ya minlem, nje é ne te famé a te bôlé.” (Beh. 6:19) Aval ane atyi étyé da volô sitima na a bo teke feñelan, aval ete fe ndi nleme ya Kalate Zambe ja volô bia na bi tebe ne bip éyoñe bia tôbane minju’u ényiñ.

⁵ Éyoñe Paul a nga kobô mejô mete, a mbe a kobô ajô ya ndi nleme ya ke nyiñe yôp été Bekristen be ne miñwo’on be bili. Ve, mejô mete ma fombô fe Bekristen be bili ndi nleme ya nyiñe si va nnôm éto. (Jean 3:16) Teke bisô na ndi nleme ya nyiñe nnôm éto ja bo na ényiñ jangan é bi ngum nsôñan.

6-7. Bibotane bivé Yvonne a nga bi éyoñ a nga yem benya mejôô a lat a melu ma zu?

⁶ Bi tame zu kobô ajô sita Yvonne. A nji yaé benya mejôô été, nde fe éyoñ a mbe mongô a mbe a koo awu angôndô ya woñ. A jô na, a vo’o ve’ele vuan bifia a nga lañ vôm éziñe bi jô’ô na, “môs éziñe wo ye bo te yene môse ya akiti.” Yvonne a jô na: “Bifia bite bi nga bo na me bo te kee ôyo ngum alu, me fase’ aval ényiñe ja ye bo melu ma zu. Me mbe me jô’ô mamien nlem été na, ‘ényiñ ja yiane bi ngume nsôñan. Nge sa nalé, amu jé me nga tééban? Me nji kômbô wu!”

⁷ Éyoñ Yvonne a nga bo ésoé, a nga laan a Bengaa be Yéhôva. A jô na: “Minlañ mite mi nga bo na me bi ndi nleme ya nyiñ nnôm éto si va.” Bibotane bivé sita wongan a nga bi amu a nga yem benya mejôô? A ke ôsu a jô’ô na: “Éyoñe ji ma ke ôyo mvo’é, teke beta koo awu a melu ma zu woñ.” Teke bisô na Yvonne a nye’e benya mejôô angôndô ya abui, a nye’e fe a kañete bôte bevok ndi nleme a bili asu melu ma zu.​—1 Tim. 4:16.

8-9. (a) Aval avé môte ya nkana Yésus a nga liti na a nyan édima jôm a nga som? (b) Aval avé wo yen benya mejôô?

⁸ Benya mejôô ya Kalate Zambe me tii fe a mbamba foé ya Éjôé Zambe. Yésus a nga ve’e Éjôé Zambe a señ é ne édima. E kalate Matthieu 13:44, Yésus a jô na: “Éjôé Zambe ja funan jôm é ne édima é solô afup: nje môt a nga yen, ane a nga solé je; amu a nga wô’ avak, ajô te a nga kuan akume dé se, ve kus afup ete.” Bia kôme yen valé na môt ate a nji ke a jeñe señ é ne édima. Ve éyoñ a nga yene je, a nga nyum émien abui mam asu na a bi je. A nga kuane biôm bise a mbe a bili. Amu jé? Amu a mbe a yeme’ abim avé señ éte é mbe édima. É mbe mfi a dañe biôm bise a nga mane jañele.

⁹ Ye nde wo fe wo yene benya mejôô nalé? Teke bisô na ôwé! Bia yeme na émo ji ja vo’o bia ve jôm éziñ bi ne ve’e  a meva’a bia bi éyoñ bia bo Yéhôva ésaé, a ndi nlem bi bili na bia ye nyiñ nnôm éto Éjôé Zambe si. Mvome ya bi mbamba élat a Yéhôva é ne anen adañe mam mese bi ne nyume biabebien. Jam da dañe mfi e ne na bi bo mam “aval ese [Yéhôva] a nye’e.”​—Beco. 1:10.

10-11. Jé é nga tindi Michael na a bo beta mintyendan ényiñe jé?

¹⁰ Abui ya be bia e nga nyum ébien abui mam asu na be ve Yéhôva nlem avak. Bôte béziñe be nga li’i beta mesu m’ésaé be mbe be bili émo ji. Bevo’o ki be nga tyendé nsôñane ya bi abui akum. Bevo’o ki be nga tyendé fatan ényiñe jap éyoñe be nga yem benya mejôô. Michael a ne môte wua ya été. A nji yaé benya mejôô été. Éyoñ a mbe ésoé a nga yé’é karaté. A jô na: “Asu dam, me mbe me yene na é ne mfi na me bo ngul a mvo’é minsôn. Biyoñe biziñ me mbe me simesane na môt éziñ a vo’o bôme ma.” Ve éyoñ a nga taté na a yé’é Kalate Zambe, Michael a nga yem ôsimesane Yéhôva a lat a évô. (Bs. 11:5) A kobô ajô mojañ a mbe a bo’o nye ayé’é ba ngal a jô’ô na: “Teke môs éziñ be nga jô ma na me jô’é karaté, be nga ke fo’o ve ôsu a ye’ele ma benya mejôô.”

¹¹ Nté Michael a nga ke ôsu a yé’é mejô me Zambe, a nga tu’a nye’e Yéhôva. Jam e nga tu’a nye nambe e mbe avale Yéhôva a mvamane bebo bisaé bé. Ane éyoñ é nga lôt, Michael a nga yene na a yiane nyoñe beta ntyi’an ényiñe jé. A jô na: “Me mbe me yeme’e na da ye ke bo tyi’ibi na me jô’é karaté.” “Ve me mbe me yeme’e na nge me bo de Yéhôva é wô’ô ma mvaé, a me mbe fe me yeme’e na e kañe Yéhôva a dañ mam mese me ne lume mvus.” Michael a mbe a nyane’e benya mejôô a nga yé’é, a jam ete e nga tindi nye na a bo beta mintyendan ényiñe jé.​—Jc. 1:25.

12-13. Aval avé benya mejôô ya Kalate Zambe be nga volô Mayli?

¹² Kalate Zambe a ve’e benya mejôô a éfufube ja faé jibi si, asu na a liti bia abim avé me ne édima. (Bs. 119:105; Beép. 5:8) Mayli, a nyiñ Azerbaijan, a nye’e mvolan a nga bi a zene ya Kalate Zambe. Ésaa ba nyia be nji be ñyebe wua. Ésaa a mbe mone Musulman, nyia ki a too ñyebe Bejuif. A jô na: “Me nji sôô môs éziñe na Zambe a ne, ve me mbe me sili’i mamien abui minsili. Me mbe me sili’i mamiene na, ‘Amu jé Zambe a nga téé bia, a amu jé môt a tôbane minju’u ngum ényiñe wé ôse, mvuse ya valé a nga beta ke di’i nduan kom?’ Mbôle bôte be mbe be jô’ô na jam ése ja kui e ne nkômbane Zambe, nde me mbe me sili’i na, avale Zambe avé e ne nye’e é yene’ ane bôte ba tôbane minjuk?’”

¹³ Mayli a nga ke ôsu a jeñe biyalane ya minsili mié. Ane éyoñ é nga lôt, a nga kañese ayé’é Bible a bo Ngaa Yéhôva. Mayli a jô na: “Mbôle Kalate Zambe a ye’ele mam ma wô’é melo ne sañesañ, nalé a nga volô ma na me bi meva’a ényiñ. “Benya mejôô me nga yé’é Kalate Zambe be nga volô na nlem ô bômbô ma si ne mieññ.” Aval ane Mayli, bia bese bia kañe Yéhôva, “nyô a nga loene [bia] na, [bi] kôlô dibi a zu vôm étua éfufup jé é né.”​—1 P. 2:9.

14. Jé bi ne bo asu ya na bi tu’a nye’e benya mejôô? (Fombô’ô fe nka’ale ô ne na “ Bive’an bife.”)

¹⁴ Ayé’é di da te kobô ajô bive’an biziñ bia liti abim avé benya mejôô be ne nya  mfii. Éko éziñ ô ne simesan abui bôt afe benya mejôô be nga volô. Nga ô ne jeñe beamu befe ba liti amu jé bia yiane nye’e benya mejôô éyoñe wo bo ayé’é étam dôé? Nté bii ke ôsu a nye’e benya mejôô, nde fe bii jeñe na bi liti na bia nye’e be nalé.

15. Aval avé bi ne liti na bia nye’e benya mejôô?

¹⁵ Bi ne liti na bia nye’e benya mejôô éyoñ bia yé’é Kalate Zambe mban a bekalate bangan. To’o bi tabeya benya mejôô abui mimbu, nya ajô a ne na bi ngenane bi bili abui mam ya yé’é. Nkume mmombô a bete a nga taté kui a nga jô na, benya mejôô be ne ane “mone sam a ke faa nkôte si, a too mbômane a mbia bilok. Nge wo kômbô bi je, wo yiane ve ngul. . . . Nge ki ô biya je, te koé ve same jijia. . . . Kele’ ôsu a kôane benya mejôô befe, jeñe’e na ô bi abui.” Ayé’é é ne fo’o beta ésaé, ve bibotane bia bi été bia dañ ngul ése bia te ve.

16. Fatane ñyé’ane Kalate Zambe fé wo yene tyi’ibi? (Minkana 2:4-6)

¹⁶ Sake môt ase nnye a jibi ayé’é nge  ke nye’e a lañe’e bekalate. Ve Yéhôva a jô bia na bi “jeñe” a “tu’a jeñe” na bi wô’ô bido’o bi mam ya Kalate Zambe. (Lañe’e Minkana 2:4-6.) Nge bi bo de, bii bi abui bibotan. Corey a jô na éyoñ a lañe Kalate Zambe, a wô’ô jeñe na a tu’a wôk éfuse jia. A jô na: “Me wô’ô lañe benote bese a beréférence bese, mvuse ya valé, me nga lañe bekalate befe ba tu’a timin éfus éte. . . . Nalé a volô ma na me yé’é abui mam.” To’o bia yé’é avale te nge ke aval afe, bia liti na bia nyane benya mejôô éyoñe bia nyoñ éyoñe ya tu’a yé’é be.​—Bs. 1:1-3.

17. Jé ja tinane na e wulu benya mejôô été? (Jacques 1:25)

¹⁷ É ne été na, bi nji yiane su’u ve na bia yé’é benya mejôô. Asu na bi tu’a bu’ubane mam bia yé’é, bia yiane wulu benya mejôô été, nalé a tinane na bia yiane tôñe mam bia yé’é ényiñe jangane ya môs ôse. Jam ete étam nde dé bo na benya mejôô be soo bia benya mevak. (Lañe’e Jacques 1:25.) Aval avé bi ne tabe ndi na bia tôñe benya mejôô bia yé’é? Mojañ éziñ a jô na, môt ase a yiane tu’a fas émien asu na a yemelan nge a tôñ benya mejôô a yé’é, a bevôm a yiane beta ve ngul. To’o bi yaéya nsisim abim avé, nlômane Paul ô nga jô na: “ñwula’an a ñyemane ya été.”​—Beph. 3:16.

18. Amu jé bia yiane ve ngule ya “wulu benya mejôô été”?

¹⁸ Tame ve’ele simesane bibotan bia bi éyoñe bia ve ngule jangan ése na bi “wulu benya mejôô été!” Ane ô vaa na ényiñe jangan biabebien ja tu’a bo mvaé, bia ve fe Yéhôva nlem avak a bobejañ a besita bangan. (Min. 27:11; 3 Jean 4) Teke bisô na bi bili benya beamu ya nye’e benya mejôô a wulu benya mejôô été.