Amu jé Yésus a nga jô mejô me David a nga tili Besam 22:1 ôsusua na a wu?

Yésus a nga jô abui mam ôsusua na a wu. Jame da y’été e ne ntilan Kalate Matthieu 27:46: “[A] Zambe wom, [A] Zambe wom, ô li’iya ma [amu] jé?” Yésus a nga tôé mejô David a nga tili Besam 22:1. (Marc 15:34) Bi vo’o jô na Yésus a nga jô mejô mete amu a mbe a wô’ô Yéhôva ôlun, nge ke amu a mbe a jemba’ane mbunan. Ve Yésus a mbe a kôme’e yem amu jé a mbe a yiane wu, ane a nga yebe de. (Mt. 16:21; 20:28) A mbe fe a yeme’e na éyoñ awolo ete dé kui, Ésaa wé a ye ke beta ke ôsu a kamane nye. (Job 1:10) Yéhôva a nga bo nalé asu na a ve Yésus fane ya liti na a ne ngule ya ba’ale mbunane wé, to’o a jibi avale mintaé avé éyoñ ya awu dé.​—Marc 14:35, 36.

Nde amu jé Yésus a nga jô mejô ya Sam ate? Bi nji tu’a yem, ve bia zu ke bia fase beamu be mbe ve tindi nye na a kobô nalé. *

Éyoñ a nga jô mejô mete, ye Yésus a mbe a kômbô’ô liti na Yéhôva a ye ke kamane nye na a wu? Yésus a mbe na a ya’ane ntañ teke na Yéhôva a volô nye. Mbôle Yésus a mbe môt a binam éyoñ éte, e mbe e sili’i na a “tye’ awu [éjiane] môt.”​—Beh. 2:9.

Éyoñe Yésus a tote’e bifia biziñ ya Sam ate, ye nsôñane wé ô mbe na bôt be simesane Sam ate ase? Bejuif ya éyoñ éte be  mbe be bili fulu ya ba’ale Besam nlô. Nalé a mbe a bo’o na éyoñ ba wô’ éfuse jia ya Sam éziñ, ba beta mane simesane Sam ate ase. Nge jam ete nde Yesus a mbe a sôñe’e, wôna a nga yiane volô abui Bejuif na be simesane minkulane mejô mise mi ne Sam ate a lat a awu dé. (Bs. 22:7, 8, 15, 16, 18, 24) Nde fe na, éfuse ya memane ya Sam ate ja lu’u Yéhôva, a liti na nnye a ne Njôô ya si ése.​—Bs. 22:27-31.

Éyoñe Yésus a nga jô mejô mete, ye a mbe a kômbô’ô ngôné zôsô wé? Ôsusua na ba wôé nye, besiñ be Yésus be nga bôte nye ajô na a nga biasé Zambe. (Mt. 26:65, 66) Bôte ya Sanhedrin be nga sulan alu ete avôl avô, a taté na ba nyoñ mintyi’an, teke tôñ Atiñe Moise a lat a mintyi’ane mejô. (Mt. 26:59; Marc 14:56-59) Éyoñe Yésus a nga sili Yéhôva amu jé a nga li’i nye, a mbe a kômbô’ô liti na a nji bo jam éziñ da yian awu.

Ye Yésus a mbe a kômbô’ô liti bôte na nge David a nga tôbane minjuk, a nji mbe amu Yéhôva a nga lume nye mvus? Nsili David a nga sili ô nji be ô tina’ane na a jembane mbunan. Amu éyoñ a maneya sili nsili ôte, a nga ke ôsu a tabe Yéhôva ndi, a Yéhôva a nga ke fe ôsu a botane nye. (Bs. 22:23, 24, 27) Aval ete da da, akusa bo Yésus, “mone David”, a nga jibi élé mintaé, nalé a nji tinane na Yéhôva a nga lume nye mvus.​—Mt. 21:9.

Ye Yésus a mbe a wô’ô nlem mintaé amu a mbe a yeme’e na Yéhôva é li’i nye étam mone nté asu na a ve nye fane ya kamane mbunane wé akekui awu? Atata’a, nsôñane Yéhôva asu Mone wé ô nji mbe na a jibi mintaé a wu. Ve nsôñane ôte ô nga tyendé mvus éngana’a Adam ba Ève be nga bo afup ya Éden. Yésus a nji bo jam e ne abé, ve é mbe é sili’i na a jibi mintaé a na a wu asu na a yalane minsili Satan a nga li’i mi bôô, a asu na a kôté môt a binam. (Marc 8:31; 1 P. 2:21-24) Jam ete e nji be ve bobane nge Yéhôva a nga ye kamane na Mone wé a tôbane meve’ele. Yéhôva a mbe a ngenane teke tame bo avale jam ete môs éziñ.

Ye Yésus a mbe a kômbô’ô volô beyé’é bé na be simesan amu jé Yéhôva a nga kañese na Mone wé a wu aval ete? * Yésus a mbe a yeme’e na mbôle be mbe na ba wôé nye aval ane mbia môt, jam ete dé kolé abui bôt ôbak. (1 Bec. 1:23) Ve nge beyé’é bé be tu’a yemelan amu jé a nga wu, bé kui na be yene bibotan awu dé e nga soo bie. (Beg. 3:13, 14) Éyoñe te nje fe bé yene nye ane Nnyii bôt, sake ane mbia môt.

Akusa bo bi nji tu’a yem amu jé Yésus a nga jô mejô mete, jam e ne été e ne na, a nga su’ulane yeme na awu dé da jalé nkômbane Yéhôva. Éyoñe Yésus a maneya tote bifia ya Sam ate, ane a nga jô na: “E maneya [tôéban].” (Jean 19:30; Luc 22:37) Mbôle Yéhôva a nga li’i Yésus étam mone nté, nalé a nga ve Yesus fane ya bo mam mese a mbe a yiane zu bo si va. Nalé a nga bo fe na Yésus a tôé mam mese me ne ntilane ajô dé “metiñe me Moïse, a bekulu mejô a bepsaume.”​—Luc 24:44.