1-2. Timi’in amu jé miñye’elane miziñ ya Kalate Zambe mia tu’a bo mfi asu Kristen éyoñe mam méziñ ma tyendé ényiñe jé.

 ÉYOÑE mojañ ba sita ba lu’an, mvendé ja bo nkañete ya alu’u dap é wô’ô be ve melebe ma so Kalate Zambe. Nya ajôô a ne na, be jaéya zu ba wô’ô melebe mete. Ve môs ôte, melebe mete ma tu’a bo mfi asu môt ase ya be be. Amu jé? Amu éyoñe ji be nto nlu’an, a e nga sili na bebien be tôñe melebe mete.

² Nne fe é wô’ô kui nalé éyoñe mojañ ba sita ba biaé mon. Be jaéya zu ba wô’ô abui minkañete a abui minlô mejô mia kobô ajô ñyalane bon. Ve môse bebien ba biaé mon, miñye’elane mite mia tu’a bo mfi mise map. Beta mbe’e fo’o, sa nalé? Ôwé! Éyoñ mintyendan miziñ mia kui ényiñe jangan, bifuse biziñ ya Kalate Zambe bia tu’a bia wô’é melo. Jam ete e ne jame da ya mame ma bo na bebo bisaé be Yéhôva be lañe Kalate Zambe mban, avale Yéhôva a nga jô bejô bôte ya ayoñ Israël na be bo be lañe’e Mejô mé a bindi me “melu mese ” ya ényiñe jap.​—Dt. 17:19.

3. Jé bii yen ayé’é di?

³ A bebiaé, mi bili beta mvome wua ya ba Kristen é ne bi: mvome ya ye’ele bon benan Mejô me Zambe. Mia yiane ki su’u ve na mia volô be na be yem Yéhôva. Mia yiane fe volô be na be nye’e Nye a nlem ôse. Jé ñhe mi ne bo asu na mi volô bon benan na be nye’e Yéhôva? Ayé’é di, bii yene miñye’elane ya Kalate Zambe minyin mi ne volô mia mfa’ ôte. (2 Tim. 3:16) Bii  yene fe bibotane bebo bisaé be Yéhôva béziñ be nga bi éyoñe be nga tôñe miñye’elane mite.

4. Ñye’elan ôvé bebiaé ba yiane tôñ asu na be volô bon bap na be nye’e Yéhôva? (Jacques 1:5)

⁴ Ñye’elan 1: Jeñe’e mvolane Yéhôva. Sili’i Yéhôva fek asu na ô yem aval ô ne volô benyo bon na be nye’e nye. (Lañe’e Jacques 1:5.) Teke môt mfe a ne yeme ve meleb ane Yéhôva. Amu jé bia jô nalé? Amu ôsu a ne na, Yéhôva nnye a ne mbiaé ôsu. (Bs. 36:9) Amu baa ki a ne na, mbamba meleb a ve bia ma wum kom ése ve mbamba bibuma.​—És. 48:17.

5. (a) Aval avé ékôane Yéhôva ja volô bebiaé? (b) Jé wo te yé’é éyoñe wo te yene vidéo a liti aval avé Mojañ ba Sita Amorim be nga yale bon bap?

⁵ A zene ya Kalate Zambe a ékôane jé, Yéhôva a ve bebiaé abui melebe e ne liti be avale be ne volô bon bap na be nye’e Yéhôva. (Mt. 24:45) Éve’an é ne na, mi ne koone mbamba melebe minlô mejô mi ne na “De l’aide pour les familles.” Minlô mejô mite mi mbe mi taté’é kui e Vee ôyo! ve éyoñe ji mi nga kui anjeñe mefoé dangan. Mi ne fe ke e jw.org a koon abui bevidéo e ne volô mia na mi tôñe miñye’elane mi Yéhôva asu na mi yeme ye’ele bon benan. *​—Min. 2:4-6.

6. Aval avé mojañ éziñ a yene melebe Yéhôva a nga ve ba minga wé a zene ya ékôane Jé?

⁶ Abui bebiaé e nga ve Yéhôva akéva amu mvolan a nga ve be a zene ya ékôane jé. Mojañ éziñ a ne jôé na Joe a jô na: “E nji bo tyi’ibi ya yale bon belal benya mejôô été. Bia minga wom bia ye’elane Yéhôva kom ése na a volô bia. Abui biyoñ, bi nga yen ane nlô ajô nge ke vidéo éziñ a kui fo’o mbamba éyoñ asu na bi dañe nju’u éziñ bi mbe bi tôba’ane wô. Bi mbe bi jeñe’ ôsimesane Yéhôva éyoñ ése.” Joe ba minga wé be nga yene na, minlô mejô a bevidéo be nga bi be nga volô bon bap na be yemete élate jap a Yéhôva.

7. Amu jé e ne mfi na bebiaé be ve ngule ya liti bon bap mbamba éve’ela? (Beromain 2:21)

 ⁷ Ñye’elane 2: Liti’i bon bôé mbamba éve’ela. Bon ba nyoñ éyoñe ya fombô mam bebiaé bap ba bo, a be wô’ô vu mam ba yene be bo’ok. E ne été na, teke mbiaé éziñ a ne zôsô ne tiññ. (Bero. 3:23) Ve to’o nalé, bebiaé be ne fek ba ve ngul ése na be liti bon bap mbamba éve’ela. (Lañe’e Beromain 2:21.) Mojañ éziñ a nga jô na: “Bongô be ne ane éponge ja vili jôm ése.” A ke ôsu a jô’ô na: “Nge be yene na biabebien bia bo ki mame bia ye’ele be, bé kate bia de.” Ajô te, nge bia yi na bon bangan be nye’e Yéhôva, ba yiane kôme yene na biabebien bia nye’e Nye nya abuii.

8-9. Jé mam Andrew ba Emma be nga jô me ne ye’ele wo?

⁸ Bebiaé be ne bo mam méziñ asu na be volô bon bap na be nye’e Yéhôva. Tame yene jame Andrew, ésoé mojañ é bili mimbu 17, a jô: “Bebiaé bam be nga ye’ele ma na meye’elan me ne angôndô ya mfi. Ésaa wom a mbe a za’a ye’elan a ma alu ese, to’o mamien me mbe me maneya ye’elan. Bebiaé bangan be mbe be jô’ô bia éyoñ ése na: ‘Ô ne laan a Yéhôva éyoñ ése wo kômbô.’ Jam ete e nga bo na meye’elan me bo angôndô ya mfi mise mam. Den, é nto tyi’ibi asu dam na me ye’elan Yéhôva, a ma kôme wô’ôtane na A ne Ésaa a nye’e ma.” A mbiaé, ba’ale’e na nye’an wo nye’e Yéhôva ô ne volô bon bôé na be fe be nye’e Nye.

⁹ Bi tame kobô ajô sita éziñ a ne jôé na Emma. Ésaa wé a mbe a bili abui bikôla, nde môs éziñ a nga li’i ba be nyia wop étam a bikôla bite bise. Emma a jô na: “É nga kui abui biyoñe na nyia wom a jembane moné, ve a mbe a kate’e bia éyoñ ése aval avé Yéhôva a nyoñe ngab a bebo bisaé bé. Fatan ényiñe jé é mbe é liti’i ma na émien a too jam ete ndi. Mema a mbe fo’o a tôñe’e mam mese a mbe a ye’ele’e ma.” Ñye’elan ôvé bi ne nyoñ? Bebiaé be ne liti bon bap mbamba éve’ela, to’o éyoñe ba tôbane minjuk.​—Beg. 6:9.

10. Bebiaé ya Israël be mbe ngule ya kobô bon bap ajô Yéhôva éyoñ évé? (Deutéronome 6:6, 7)

¹⁰ Ñye’elan 3: La’an a benyo bon mban. Yéhôva a nga jô bon b’Israël na ba yiane ye’ele bon bap éyoñ ése. (Lañe’e Deutéronome 6:6, 7.) Bebiaé ya Israël ya melu mvus be mbe be bili fane ya laan a bon bap môs ôse, a volô be na be nye’e Yéhôva. Éve’an é ne na, bendôman ya Israël be mbe be lôte’ abui éyoñ bisaé mefup a beésaa bap. Bobebinga ki be mbe be lôte’ abui éyoñ a benyia, be bo’o bisaé ya nda aval ane tila a ntiñan. Nté ôse bebiaé bete be mbe be saek a bone bap fufulu, be mbe ve laan abui mam. Be mbe ve kobô ajô fulu mvame Yéhôva, a yen aval avé fulu éte ja volô nda bôte jap.

11. Jé é ne ve bebiaé fane ya laan a bon bap?

¹¹ Ényiñe ya den é nji beta bo ane ji ya melu mvus. Abui mesi, bebiaé be vo’o lôt ngumba môs a bone bap. Bebiaé ba yiane ke ésaé, bon bap ki ba yiane ke sikôlô. Ajô te, bebiaé ba yiane jeñ éyoñ asu na be laan a bon bap. (Beép. 5:15, 16; Beph. 1:10) Ayé’é ya nda bôt e ne jame da e ne volô be mfa’ ôte. Alexander, ésoé mojañ éziñ, a jô na: “Ésaa wom a bo éyoñ ése nta’ane mam asu na ayé’é ya nda bôt e boban, a kañese ki na jam éziñ e kamane bia na bi bo de. Éyoñ ayé’é ya nda bôt é maneya, bia laane minlañ.”

12. Jé nlô ya nda bôt wo yiane ve ngule ya bo nté wo bo ayé’é ya nda bôt?

 ¹² Nge ô ne nlô ya nda bôt, jé ô ne bo asu na ayé’é ya nda bôt e soo benyo bon mevak? Nga mi ne yé’é mfefé kalate wongan ô ne nlô ajô na Bu’uban ényiñ nnôm éto! Kalate ate a ne bo na mia benyo bon mi laan mbamba minlañ. Mbôle nsôñane wôé ô ne na bon bôé be kuli mam me ne be nlem été, te komekane be nge ve be bijô éyoñe mia bo ayé’é ya nda bôt. Nde fe, jeñe’e na ô bo teke wô’ ôlun nge mon wôé a jô jame da lu’an ki a miñye’elane ya Kalate Zambe. Ve wo yiane wô’ô mvaé éyoñe ba kate wo mam avale ba wô’ôtane me. Va’a be fane ya bo de éyoñ ése. Ô ne kui na ô kôme volô bon bôé nge wo kôme yem mam me ne be nlem été.

13. Biyoñe bivé bife bebiaé be bili fane ya volô bon bap na be subu Yéhôva bebé?

¹³ A bebiaé, jeña’ané môs ôse na mi bi éyoñe ya volô bon benan na be yemete élat jap a Yéhôva. Mi nji yiane yange bo de ve éyoñ mii tabe na mia yé’é Kalate Zambe a be. Sita Lisa a jô na: “Bia volô bon bangan na be yen nja ô ne zañe mefulu me Yéhôva a bitétéa bié. Éve’an é ne na, éyoñe mvu jangan é mbe é bo’o mam ma wolé bon bangan, bi mbe bi kate’e be na jam ete da liti na Yéhôva fe a nye’e a bo’o fianga biyoñe biziñ, a na nye fe a nye’e ényiñ ane bia.”

14. Amu jé é ne mfi na bebiaé be volô bon bap na be tobe mbamba bemvôé? (Minkana 13:20)

¹⁴ Ñye’elane 4: Volô’ô bon bôé na be bi mbamba bemvôé. Kalate Zambe a liti ne sañesañe na, bemvôé bangan be ne tindi bia na bi bo mbamba be mam nge ke mbia be mam. (Lañe’e Minkana 13:20.) A bebiaé, ye mia yeme bemvôé be bon benan? Ye mi yeneya be, a ye mi tameya lôt éyoñ a be? Aval avé mi ne volô bon benan na be bi bemvôé ba nye’e Yéhôva? (1 Bec. 15:33) Ô ne volô bon bôé na be tobe mbamba bemvôé éyoñe wo bañete bôte be bili ngul élat a Yéhôva na be zu lôt éyoñ a mia.​—Bs. 119:63.

15. Jé bebiaé be ne bo asu na be volô bon bap na be bi mbamba mewoso?

 ¹⁵ Bi tame kobô ajô mojañ éziñ a ne jôé na Tony. A kate jam ba minga wé be nga bo asu na be volô bon bap na be tobe mbamba bemvôé: “Bia minga wom bi nga bo abui mimbu, bi bañete’e bobejañ a besita be so’o bevôm bevôm, bongô akekui benya bôtô, nda jangan. Bi mbe bi bañete’e be na be zu di a bia, a na be zu bo ayé’é ya nda bôt a bia. Nalé a nga volô bia na bi tu’a yeme bobejañ a besita ba nye’e Yéhôva a ba kañe nye a nlem ôse. Bi nga bi mvome ya bañete bejome mekônda, bemissionnaire, a bobejañe befe, na be zu tabe nda jangan. Bon bangan be nga wô’ô minkañete mi bobejañ bete, a yen avale be mbe ayôñ mfa’a ya nsisim, a avale be nga nyume bebien abui mam. Mam mete mese me nga volô bon bangan na be yemete élate jap a Yéhôva.” A bebiaé, nyoña’ané ntyi’ane ya volô bon benan na be bi mbamba mewoso.

16. Jé bebiaé be ne bo nge mone wop a jô na a kômbô ki kañe Yéhôva?

¹⁶ Jé bebiaé be ne bo nge mone wop a tyi’i na a kañe ki Yéhôva, akusa bo ngul ése ba ve? Te mia simesane na mi nji yeme bo ésaé jenan. Yéhôva a nga ve bia bese, to’o nyo mon, fili ya nyoñe mintyi’an. Môt ase a ne ngule ya tyi’i nge é kañe Yéhôva, nge momo. Nge mone wôé a tyi’i na a lume Yéhôva mvus, te bili atek nge simesane na a ye ke bulane mvus môs éziñ. Simesa’ane nkana mon a nga ke si é mbe ôyap. (Luc 15:11-19, 22-24) Mon ate a nga bo angôndô ya mbia be mam, ve a nga su’ulane bulane mvus. Ve bôte béziñ be ne jô na: “Ke a ne fo’o ve nkana. Ye avale jam ete e ne fo’o kôme bobane den nga?” Ôwé, e ne boban! Ésoé éziñ é ne jôé na Élie, é nga tebe aval été ete.

17. Aval avé nkañete Élie wo ve wo ngule nyul?

¹⁷ Élie a kobô ajô bebiaé bé a jô’ô na: “Be nga bo jam ese be mbe ngule ya  bo asu na be volô ma na me nye’e Yéhôva a Mejô mé. Ve éyoñe me nga bi bebé mimbu 15, ane me nga ben benya mejôô.” Élie a nga taté na a bo mbia be mam asoé. Éyoñe bebiaé bé be nga jeñe na be volô nye, a nga sase be. Éyoñ a nga kôlô nda b’ésaa, a nga ke ôsu a bo mbia be mam. Akusa bo nalé, é mbe é kui’i na a kobô ajô Zambe a mvôé jé éziñ. Élie a jô na: “Nté me mbe me la’ane mejô me Zambe a nye, nalé a mbe a bo’o na mamien me simesa’ane Yéhôva. Ôte’ete’ ôte’etek, mefese ya benya mejôô me mbe me kele’ ôyo nlem wom été, ma bebiaé bam be nga ve ngule ya béé, me nga beta taté na ma yaé.” Mvuse ya valé, Élie a nga su’ulane bulane benya mejôô. * Tame ve’ele simesan abime meva’a bebiaé bé be nga wôk, amu be nga nyoñ éyoñe ya ye’ele mone wop mejô me Zambe valé a ngenan mongô!​—2 Tim. 3:14, 15.

18. Aval avé wo yene bebiaé ba ve ngule jap ése na be volô bon bap na be nye’e Yéhôva?

¹⁸ A bebiaé, Yéhôva a nga ve mia beta das: mvome ya volô miaé bôte wo zu na ô kañe nye. (Bs. 78:4-6) Ésaé éte é nji bo tyi’ibi, a bia se’e mia asu ngul ése mia ve na mi volô bon benan! Nge mia ke ôsu a ve ngule jenan ése asu na mi volô bon benan na be nye’e Yéhôva, a nge mia ke ôsu a ye’ele be na be bo Nye mewôk, mi ne tabe ndi na jam ete dé ve Yéhôva, Ésaa wongan, nlem avak.​—Beép. 6:4.