1. Beta ntyi’ane mbé môt a binam ase a yiane nyoñ?

 DEN, bôte bese be bili beta ntyi’ane ya nyoñ. Ye bé su’u Yéhôva Zambe, a meme na nnye a ne Njôô a yiane jôé émo minlañ, nge na ye bé su’u beta nsiñe wé, Satan Diable? Môt ase a yiane tobe ngame jé. Ngam éziñ éfe é nji bo. Ntyi’ane ba ye nyoñe wo ye ve be fane ya nyiñe nnôm éto nge momo. (Mt. 25:31-33, 46) Éyoñe ya beta étibila’a, môt ase é bi ndeme ya ényiñe nge nyi ya njañan.​—Nli. 7:14; 14:9-11; Éz. 9:4, 6.

2. (a) Jé Behébreu 10:35-39 a lebe bia na bi bo? (b) Aval avé kalate Nlitan a ne volô bia?

² Lañe’e Behébreu 10:35-39. Nge ô nga tyi’i na wo su’u Éjôé Zambe, wônaa ô nga nyoñe fo’o mbamba ntyi’an. Éyoñe ji, ô ne ôjeja’a ya volô bôte bevo’o na be fe be nyoñe mbamba ntyi’an ate. Asu na ô bo de, ô ne belane miñye’elane mia so kalate Nlitan. Kalate ate a liti jame dé kui bôte ba wosane Yéhôva. A kobô fe ajô bibotan bôte ba su’u Éjôé jé ba ye bi. E ne nya mfii na bi kôme yé’é mejô mete. Nalé é volô bia na bi ke ôsu a bo Yéhôva ésaé teke bili atek, a na bi belane mam bi yé’éya asu na bi volô bôte bevo’o na be fe be kañe Yéhôva nnôm éto.

3. Jé bii yen ayé’é di?

³ Ayé’é di, bii yalane minsili mi: Jé ja ye kui bôte ba su’u Éjôé Zambe? Jé ja ye kui bôte ba su’u tit é ne évele ne zôññ kalate Nlitan a jôô je?

4. Nsamba bôt ôvé nlômane Jean wo yen ô tele fefele Yésus yôp été?

⁴ Nlômane Jean wo yene minsamba mi bôte mibaé mia su’u Éjôé Zambe a bi bibotane nnôm éto. Nsamba ôsu ô bili bôte 144 000. (Nli. 7:4) Be ne bôte Yéhôva a nga tobe si va na be ke jôé ba be Yésus yôp été. Bé jôé si ése. (Nli. 5:9, 10; 14:3, 4) Jean a yen ane bôte bete be tele a Yésus nkôle Sion yôp été.​—Nli. 14:1.

5. Jé ja ye kui miñwo’on mi li’iya si va ana’ana?

⁵ Ataté ntete mimbu ôsu azukui den, Yéhôva a tobe bôte na be be bo ngabe ya nsamba bôte 144 000 ôte. (Luc 12:32; Bero. 8:17) Ve éngele a kate Jean na fo’o ve mon doé bôte ya nsamba ôte ba ye bo be ngenan be vee melu ya asu’ulan. Yéhôva é ve be “ndem” ja su’ulan ôsusua na beta étibila’a a taté. (Nli. 7:2, 3; 12:17) Mon éyoñ mvus atata’a ya beta étibila’a, miñwo’on mi li’iya si va mii ke yôp asu na mi ke fulan a mi mivo’o mi nga wulu ba’aba’a a Yéhôva ényiñe jap ése éyoñe mi mbe si va. Éyoñe te bese bé jôé ba be Yésus Éjôé Zambe yôp été.​—Mt. 24:31; Nli. 5:9, 10.

6-7. (a) Nsamba bôt ôvé ôfe Jean a yen, a jé bia yé’é a lat a nsamba ôte? (b) Amu jé “bizu’u bi bôt” a miñwo’on mi li’iya ba yange a ôjeja’a ôse na nkulan ajô ya Nlitan kabetôlô 7 ô tôéban?

⁶ Éyoñ a maneya yene nsamba bôte wo ye ke jôé ba be Yésus yôp, Jean a yene “bizu’u bi bôt.” Kalate Zambe a kate ki bia abime bôt nsamba ôte ô bili. (Nli. 7:9, 10) Ve jé Kalate Zambe a ye’ele bia a lat a nsamba bôt ôte? Éngele a kate Jean na: “Bana be ne ba ba so beta [étibila’a] été, a be nga sôpe melô’ô map, a bo me mfuban metyi me Mon ntômba été.” (Nli. 7:14) Éyoñe beta étibila’a é man, “bizu’u bi bôt” bite bii nyiñe si va, a bu’uban angôndô ya abui bibotan.​—Bs. 37:9-11, 27-29; Min. 2:21, 22; Nli. 7:16, 17.

⁷ Nge ô bili ndi nleme ya ke nyiñe yôp nge ke si va nnôm éto, ye mame kalate Nlitan kabetôlô 7 ma nambe fo’o wo nlem? Kôme’e tabe ndi na mame mete mé tôéban. Da ye fo’o bo biyoñ mevak asu minsamba mi bôte mite mibaane. Bii bo mevak amu ntyi’ane bi nga nyoñe na bia su’u Éjôé Zambe. Jam avé afe kalate Nlitan a jô bia a lat a beta étibila’a?​—Mt. 24:21.

8. Aval avé beta étibila’a é taté, a aval avé abui bôte da ye bo?

⁸ Ayé’é ya mvus e nga liti bia na bijôé ya émo ji bia zu wosane Beta Babylone ana’ana, safulu bivuse miñyebe ya si ése. (Nli. 17:16, 17) Jam ete nde dé bo na beta étibila’a a taté. Ve éyoñe bôt abui bé yene nalé, ye bé bi nkômbane ya taté na ba kañe Yéhôva? Momo. Nlitan kabetôlô 6 a kate bia na abui bôt dé viane ke jeñe mvolan be bijôé a bebo makit ya émo ji, mbe bete Kalate Zambe a loone na minkôl. Mbôle ba ye ke su’u Éjôé Zambe éyoñ éte, Yéhôva é yene be ane besiñe bé.​—Luc 11:23; Nli. 6:15-17.

9. Aval avé bebo bisaé be Yéhôva bé liti na ba selan a bôte bevok éyoñe ya beta étibila’a, a jé ja ye boban?

⁹ Teke vaa nge beté, bebo bisaé be Yéhôva  ba ye liti na ba selan a bôte bevok éyoñe ya mbia biyoñe bite. Ba ye ke ôsu a bo susu’a bôte ja kañe Yéhôva si va, a ba ye bene su’u “tit.” (Nli. 13:14-17) Mbôle bé ke ôsu a kabetane Yéhôva, besiñe be Yéhôva bé wô’ô nya ôlunu. Éyoñe te nsamba meyoñ wo ye jeñe na ô wosane bebo bisaé be Yéhôva si se meku’u menyin. Kalate Zambe a loone mewosane mete na mewosane me Gog, môte ya si ya Magog.​—Éz. 38:14-16.

10. Bela’ane Nlitan 19:19-21 asu na ô liti avale Yéhôva é bo éyoñe besiñe bé ba ye ke wosane bebo bisaé bé.

¹⁰ Jé Yéhôva é bo éyoñ é yene mewosan mete me za’ak? Émien a yalane na: “Ayaa dam da ye kui me mimbile mi jôé été.” (Éz. 38:18, 21-23) Nlitan kabetôlô 19 a kate bia jam da ye tôé valé. Yéhôva é lôme Mon wé na a ke kamane bebo bisaé Bé, a na a mane jiane besiñe bap. “Minsamba mi ne yôp été,” beéngele a miñwo’on 144 000, mii fulan a Yésus na be bo mewosane mete. (Nli. 17:14; 19:11-15) Bita bite bii su’ulan aya? Bijôé a bôte bese ba su’u ki Éjôé Zambe ba ye mane jañ ne meññ!​—Lañe’e Nlitan 19:19-21.

11. Kalate Nlitan a kobô ajô beta jam mbé?

¹¹ Tame ve’ele simesan aval avé bezôsô be bôte ba ye wô’ôtan éyoñ besiñe be Zambe bese be maneya wu! Bé bo mevak été si se meku’u menyin! Akusa bo bôte bese be ne yôp ba ye bi mevak éyoñe Beta Babylone é tyamban, ve jam afe dé soo be angôndô ya abui mevak. (Rev. 19:1-3) A ne beta jam a dañe mam mese me ne ntilane kalate Nlitan: “Alu’u ya Mon ntômba.”​—Nli. 19:6-9.

12. Nlitan 21:1, 2 a jô na alu’u ya Mon ntômba da ye boban éyoñ évé?

¹² Éyoñ évé nje alu’u ete da ye boban? Miñwo’on 144 000 mise mia ye bo mi nto yôp ôsusua na bita ya Harmaguédon bia taté. Ve sa ke éyoñ éte nje alu’u ya Mon ntômba da ye boban. (Lañe’e Nlitan 21:1, 2.) Alu’u ete da ye boban mvuse bita ya Harmaguédon, éyoñe besiñe be Zambe bese be ne si va be maneya wu, a Satan a mimbia minsisim mié be wuabaneya édo’o ébé été.​—Bs. 45:3, 4, 13-17.

13. Jé ja ye boban alu’u ya Mon ntômba?

¹³ Alu’u ya Mon ntômba da ye soo bia bibotan bivé? Aval ane alu’u da late fam ba minga, alu’u ya Mon ntômba da late Njô bôt, Yésus Krist, a “mbom” wé, miñwo’on 144 000. Beta alu’u ate é soo bia mfefé éjôé wo ye jôé si ése mimbu 1 000.​—Nli. 20:6.

14-15. Nlitan kabetôlô 21 a ve’e miñwo’on 144 000 a jé? (Fombô’ô fôtô ya ékô’ôla.)

¹⁴ Éyoñ alu’u ya Mon ntômba e maneya boban, Nlitan kabetôlô 21 a ve’e miñwo’on 144 000 a angôndô ya abeñe tison ba loone na “Mfefé Jérusalem.” (Nli. 21:2, 9) Meko’o 12 mme me ne mbôka’a ya tison éte, a me bili “môé awôm a mebaé ya minlôman mi Mon ntômba awôm a mibaé” mi too ntilan été. Amu jé jam ete da nambe nlômane Jean abui? A ne amu a yen éyôlé jé é too ntilan ako’o da ya été. Ngo’o abime mvom ete!​—Nli. 21:10-14; Beép. 2:20.

 ¹⁵ Teke tison éfe ja funane nyili. É bili beta njoñ a too nkôman a gôlôt, é bili fe mimbé 12 mi too nkôman a señ é ne édima, mimfine a mimbôka’a mi too nkôman a bidima meko’o meval meval, biôm bite bise bi bili fe mbamba éyeka’a. (Nli. 21:15-21) Ve Jean a yene na jôm éziñ ja jemban été! Jean a jô na: “Me nji yene temple nlam ôte, amu Tate Zambe nyô a ne ngul ése, a Mon ntômba ate, be ne temple ya été. A nlam ôte ô ne te yi jôp, nge yi ngone na, bi faé wô, amu étôto’o Zambe é nga faé wô, a lambe ya été a ne Mon ntômba ate.” (Nli. 21:22, 23) Nalé a tinane na bôte Kalate Zambe a loone na Mfefé Jérusalem ba ye tabe vôme Yéhôva émien a too. (Beh. 7:27; Nli. 22:3, 4) Ajô te, Yéhôva ba Yésus mbe be ne temple ya tison éte.

16. Jé ja ye kui bôte bese bé nyiñe si va éyoñe ya Éjôé ya toyini mimbu?

¹⁶ Miñwo’on mi ne fo’o mevak éyoñe mia simesane tison éte. Ve Bekristen be bili ndi nlem ya nyiñe nnôm éto si va be fe be bili beamu ya vak. Éyoñe ya Éjôé ya toyini mimbu, Mfefé Jérusalem wo ye soo angôndô ya abui bibotane si va. Jean a yen ane bibotane bite bia len aval ane “ôsôé mendime ya ényiñ.” Mfôm ôse ya ôsôé ôte ô bili ‘bilé ya ényiñ’ bi bili mekaé asu “mvo’é ya meyoñe me bôt.” (Nli. 22:1, 2) Nalé a liti na, bôte bese bé nyiñe si éyoñ éte bé bi fane ya bu’uban abui mam. Ôte’ete’ ôte’etek, metyi ya abé mé mane vase bezôsô be bôte menyul. Akon, minjuk, a mili’i mintaé, bia ye fe bo.​—Nli. 21:3-5.

17. Bibotan bivé Nlitan 20:11-13 a jô na bii bi éyoñe ya Éjôé ya toyini mimbu?

¹⁷ Za é bu’ubane bibotane bite? Bôte b’ôsu be ne bizu’u bi bôte bii dañe beta étibila’a, a fe bon bese bé bialé mfefé émo. Ve Nlitan kabetôlô 20 a ka’ale fe na bewu ba ye wômô. (Lañe’e Nlitan 20:11-13.) ‘Bezôsô’ be bôte be nga wu melu mvus, a “bikotekot”, mbie bi ne bôte be nji kôme bi fane ya yé’é Mejô me Zambe, bé beta wômô asu na be nyiñe si va. (Mam. 24:15; Jean 5:28, 29) Ye nalé a tinane na, bôte bese  be nga wu melu mvus a ba bese ba wu melu ma ba ye beta wômô éyoñe ya Éjôé ya toyini mimbu? Momo. Bôte bese be nga vañe bene kañe Yéhôva éyoñe be nga bi fane ya bo de ôsusua na ba wu, ba ye ke wômô. Yéhôva a nga ve be fane ya bo nye ésaé a bi ényiñe ya nnôm éto, ve be nga liti na be nji bo avale bôt e ne nyiñe paradis si va.​—Mt. 25:46; 2 Bet. 1:9; Nli. 17:8; 20:15.

18. Jé ja ye boban éyoñ toyini mimbu é lôteya?

¹⁸ Éyoñ toyini mimbu é lôteya, bôte bese ba ye nyiñe si va ba ye bo zôsô ne tiññ. Teke môt éziñ é beta bi metyi ya abé Adam a nga kôé bia. Biyo’é bise bi nga bi amu nsem Adam bii mane vas. (Bero. 5:12) Nalé é bo na bôte bese be ne si va be kôme bo ‘vevee’ mise me Zambe, amu bé bo teke ayeñ memane ya toyini mimbu éte.​—Nli. 20:5.

19. Meve’ele ma su’ulan me ne mfi ôvé?

¹⁹ Bia yeme na Yésus a nga tebe ne bip éyoñe Satan a nga telé nye meve’ele été. A nga ke ôsu a wulu ba’aba’a a Yéhôva. Ve ye bôte ba ye bo zôsô ne tiññ be fe ba ye bo nalé éyoñ Satan é bi fane ya telé be meve’ele été? Môt ase é bo ngule ya yalane nsili ôte éyoñe bé vaa Satan édo’o ébé été éyoñe toyini mimbu é lôteya. (Nli. 20:7) Bôte bese bé tebe ne bip éyoñe ya meve’ele mete bé bi ényiñe ya nnôm éto, a kôme bu’uban nya éto fili. (Bero. 8:21) Ve bôte bese bé bo éngana’a, bé jañ nnôm éto a Satan a mimbia minsisim mise.​—Nli. 20:8-10.

20. Aval avé wo wô’ôtan éyoñe wo yene minkulane mejô mi ne kalate Nlitan?

²⁰ Aval avé wo wô’ôtan éyoñe bi maneya la’ase miñye’elane miziñ ya kalate Nlitan avale di? Ye ô nji bo ôjeja’a ya yen a mise môé ane minkulane mejô mite mise mia tôéban? Ye nalé a tu’a ke wo ve nkômbane ya bañete bôte bevo’o na be zu kañe Yéhôva a bia? (Nli. 22:17) Mbôle bi maneya yene mam mese mé boban melu ma zu, bia fe bi bili éva’a ya jô ane nlômane Jean na: “Amen! Za’ak, A Tate Yésus.”​—Nli. 22:20.