1-2. Aval avé mejô me Yéhôva bia koone me Ésaïe 65:16, 17 ma volô bia na bi bo teke bili atek?

BETA étôkan ya mbu 2017 a mbe nlô ajô na: “Te ve’ele bili atek!” Étôkan éte é nga liti bia aval avé bi ne jibi minju’u bia tôbane mie. Beta étokan ate a lôteya den a nto mimbu minyin, ve bi ngenan bi kele’ ôsu a jibi mbia émo nyi.

² Minju’u mivé ô nga tôbane mie mimbu mi ndôme lôte mi? Éko éziñ ébu’a jia ya nda bôte jôé nge ke mvôé jôé é nga wu. Ye ô bili aval ôkon e vo’o saéban, a da sili na ô nyoñe mebiañ ngum nté ényiñ wôé? Ye ényiñ é nto wo ayaé amu ô nga yômbô? Ye ébubua éziñ é nga kui vôme wo nyiñ, bita, nge ke na wo tôban étibila’a? Ye ôkone ba loone na COVID-19 nge ke ôkon ôfe ô nga ve wo ényiñ ayaé? Bi ne ôjeja’a ya yene môse mam mete mese mé li’i bia mvus, teke na bia beta simesane me.​—Lañe’e Ésaïe 65:16, 17.

3. Jé bia yiane bo éyoñe ji, a amu jé?

³ Ényiñ é ne fo’o ayaé émo Satan ji, a éko éziñ beta minju’u mife mia yange bia melu ma zu. (Mt. 24:21) Ajô te, bia yiane tu’a yé’é na bi jibi minjuk. Amu jé? Amu Yésus a nga jô na: “Mia ye nyii [miabebien], amu mia bo mbane ya jibi.” (Luc 21:19) Bia bi ngule ya jibi minju’u miangan éyoñe bia simesane na bobejañ befe ba tôban avale minju’u ete.

4. Amu jé bi ne jô na Yéhôva nnye a ne éve’ela ja dañ mfa’a ya yeme jibi?

⁴ Za a ne éve’ela ja dañ mfa’a ya liti fulu mbane ya  jibi? Yéhôva Zambe. Éko éziñ jam ete da bo na ô kam. Ve nge wo kôme fas, wé tu’a wô’ô amu jé bia jô nalé. Satan nnye a ne njôô ya émo ji, jôm te nje minju’u mi ne njalane si nyô ne lut. Yéhôva a ne ngule ya vaa minju’u mite mise ane nkabeke dis, ve a yange môs émien a nga tyi’i na é bo de. (Bero. 9:22) Nté a yange na môs ôte ô kui, Ésaa wongan a ke ôsu a jibi abui mam. Bi tame zu yene mam ébul y’été.

5. Aval avé éyôlé Zambe é nga vebane mvit, a jam ete da bo na ô wô’ôtan aya?

⁵ Éyôlé jé é nga vebane mvit. Yéhôva a nye’e éyôlé jé, a yi fe na môt ase a semé je. (És. 42:8) Den a nto bebé mimbu 6 000, bôte ba ke ôsu a ve nye éyôlé mvit. (Bs. 74:10, 18, 23) Éyôlé Yéhôva é nga taté na ja vebane mvit afube ya Éden, éyoñe Diable (nnye ate a tinane na “Mbo njoñ”) a nga jô na Yéhôva a kaman Adam ba Ève jôm é ne bo na be nyiñe meva’ été. (Met. 3:1-5) Azukui den, bôte be ngenane be bôté’é Yéhôva ajô na a kamane be mam me ne bo na be bi meva’ ényiñ. Yésus a nga wô’ô jam ete ôlun, jôme te nje a nga jô beyé’é bé na be ye’elan avale di: “A Tate wongan a ne yôp, Jôé dôé e bo’ étyi.”​—Mt. 6:9.

6. Ntyi’ane Yéhôva a nga nyoñe na a jô’é bôte be jôé bebien ôbe nté wé bo mfi ôvé?

⁶ Bôt ba wosan éto Njôô Zambe. Yéhôva nnye étam a yiane jôé yôp a si, a teke éjôé éfe é ne zôsôô a lôt énjé. (Nli. 4:11) Ve Satan a laane beéngele a bone be bôt minsose na Yéhôva a nji yiane jôé be. Da sili éyoñ asu na e kôme yené ne ngeññ mise me bôte bese na Yéhôva étam nnye a ne mbamba Njôô. Mbôle Yéhôva a ne fek, a nga jô’é na éyoñ é lôt asu na mone môt émien a kôme yemelane na a se ngule ya jôé émien. (Jr. 10:23) Ôjibi Yéhôva wé bo na môt ase a meme na Nnye étam a yiane jôé, a na Éjôé Zambe étam nje é ne ngule ya soo nya mvo’é si va.

7. Beza be nga bo Yéhôva éngana’a, a jé é bo be?

⁷ Bone be Yéhôva béziñ be nga bo nye melo. Yéhôva a nga té beéngele a bone be bôt teke ayeñ. Ve éngele be nga su’ulane loone na Satan (nnye ate a tinane na “Nsiñ”) a nga du’u Adam ba Ève na be bo Zambe melo. Beéngele befe a bone be bôte béziñ be nga tôñe Satan. (Jude 6) To’o ayoñ Zambe a nga top, Israël, e nga lume nye mvus a ke kañe bengunemelan. (És. 63:8, 10) Yéhôva a nga wô’ô nleme mintaé, ve a nga jibi. É ke ôsu a jibi akekui môs a nga tyi’i na é mane jiane bebo éngana’a bete. Éyoñe te, Yéhôva ba bebo bisaé bé ba ye vak, amu da ye ke beta sili na be jibi mbia émo nyi.

8-9. Minsos mivé Satan a laan a lat a Yéhôva, a aval avé bi ne kulane minsos mite?

⁸ Minsos mi Satan. Satan a nga bôté Job a bebo bisaé be Yéhôva bevo’o bese ajô na, ba kañe Yéhôva amu ba sôñe ngume jam. (Job 1:8-11; 2:3-5) Satan a ngenan a bo’olô jam ete azukui den. (Nli. 12:10) Bia liti na Satan a ne nlaa minsos éyoñe bia ke ôsu a jibi minju’u mise bia tôbane mie, a éyoñe bia kabetane Yéhôva amu bia nye’e nye. Nge bi kele ôsu a jibi, Yéhôva é botane bia aval a nga botane Job.​—Jc. 5:11.

⁹ Satan a belane betebe ôsu ya miñyebe asu na a liti bôte na Yéhôva a ne  njet, a na Nnye a bo na bôte be tôbane minjuk. Ba bevo’o ba bele kate bôte na éyoñe bongô ba wu, a ne amu Zambe a yi abui beéngele yôp été. Ngo’o abim ébiasé ete! Ve bi bia yeme na Yéhôva a ne Zambe ya nye’an. Éyoñe bia fame ngul ôkon, nge ke éyoñe môte bia nye’e a wu, bi bi ne étyi teke ve Zambe bijô, amu bia yeme na akon da ye man a na bewu ba ye wômô. Ajô te, bia kate bôt abim avé Yéhôva a nye’e bia. Nalé a ve Yéhôva fane ya yalane nyô a kobô nye abé.​—Min. 27:11.

10. Jé Besam 22:23, 24 a jô a lat a Yéhôva?

¹⁰ Minju’u bebo bisaé bé ba tôbane mie. Yéhôva a ne Zambe ya mvam. A wô’ô nlem mintaé éyoñ a wô’ô bi yônô’ amu bia tôban étibila’a, amu bia kon, nge ke amu abé e ne bia metyi. (Lañe’e Besam 22:23, 24.) Yéhôva a kôme yem minju’u bia tôbane mie. A bili nkômbane ya vaa mie, a ye fe bo de. (Fombô’ô fe Nkôlan 3:7, 8; Ésaïe 63:9.) Môse wo zu, ñwô ôte Yéhôva “a ye fimi mili’i mese mise [mangan]; a awu da ye fe bo; nalé fe ôlun via ye fe bo, nge ñyôn, nge mintaé: mame ya ôsu me lôteya.”​—Nli. 21:4.

11. Yéhôva a wô’ôtan aya éyoñ a simesane bebo bisaé bé be maneya wu?

¹¹ Awu bemvôé bé. Yéhôva a wô’ôtan aya éyoñ a simesane bebo bisaé bé be maneya wu? A ne ôjeja’a ya beta yene be. (Job 14:15) Tame ve’ele simesan abim avé mvôé jé, Abraham, ja jembane nye? (Jc. 2:23) Simesa’ane fe Moïse, nnye ate ba Nye be mbe be la’ane “be lôane mesu.” (Nk. 33:11) Simesa’ane ke aval a kômbô beta wô’ô David, ba betili besam bevo’o be yi’a Nye  bia ya ékaña’a. (Bs. 104:33) Akusa bo bemvôé bé bete bese be maneya wu, Yéhôva a vuane ke be. (És. 49:15) A vuane ki mefulu map, a avale bôte be mbe. Bible a jô na a ne ve ane “bese be vee mfa’a wé.” (Luc 20:38) Ana’ana, Yéhôva é beta wômôlô be mesoñ, éyoñe te nje é beta wô’ô mvaé ya vô’ôlô meye’elane map, a kañese ékaña’a jap. Ngo’o nge mejô ma me ne ve wo ngule nyul a volô wo nlem nge wo fe ô nga yen ane môte wo nye’e a wu.

12. Jé ja dañe bo Yéhôva nlem mintaé melu ma?

¹² Mbia be bôt ba tibili bôte bevok. Éyoñ éngana’a é nga taté afub Éden, Yéhôva a nga yeme na mam ma ye bo ve abé abé akekui éyoñ émien é soo mvo’é si nyi. Yéhôva a vini mbia be mam, ékotekot, a évô bi ne njalan émo ji. A wô’ô bôte be nji bi ba ba kamane be mintaé, aval ane bobenyui a minkus. (Zac. 7:9, 10) A dañe wô’ô nlem mintaé éyoñ a yen ane ba tibili bebo bisaé bé, a wua be mimbôk. Tabe’e ndi na Yéhôva a nye’e môt ase a yeme jibi ane nye.

13. Aval mam avé Yéhôva a yen e boba’ane den, a jé a ye bo?

¹³ Émo é ne njalan a mvine mame ya bisôk. Zambe a nga té bôt éve’ela jé, ve Satan a yi na be bo mbia be mam. Melu me Noé, Yéhôva a nga yene na “abé ya môt e nto anen,” ane “a nga jôban amu a nga té môt si nyô, ane a nga wô’ô jam ete ôlun nlem.” (Met. 6:5, 6, 11) Ye mam me tyendéya éyoñe ji? Teke jôm! Satan a ne wu a mvaé éyoñ a yen aval avé abui bôt da bo mvine mame ya bisô’ den, aval ane éyoñ befam befam, a binga binga ba ke binoñ. (Beph. 4:18, 19) Meva’a mé ma tu’a nenenen éyoñ a kui na a bi bebo bisaé be Yéhôva ôlam wé ôte. Éyoñ awolo da ye kpwaan, Yéhôva é liti na a vini mvine mame ya bisôk éyoñ é mane jiane bôte bese ba bo avale mam ete teke na ba tyendé.

14. Aval avé bôte ba belane biôme Yéhôva a nga té?

¹⁴ Bôte ba mane ndamane si a nga té. Bôte ba su’u ke ve na ba ‘jôé bôt bevok njôane ya tibili be,’ ba ndamane fe si a betit Yéhôva a nga jô be na be ba’ale. (Éc. 8:9; Met. 1:28) Beyeme mam béziñ ba jô na ézezam bôte ba bo si nyu é ne bo na, mvoñe * betit million jia é jañ mimbu mia zu mi. Bia tu’a wô’ô amu jé abui bôte da ko woñe na si é ne tyamban. Mbamba jam a ne na, Yéhôva é “jiane ba ba jiane si,” a ye fe mane kôme si nyi na é bo paradis.​—Nli. 11:18; És. 35:1.

15-16. Jé é ne volô bia na bi ke ôsu a jibi ane Yéhôva? Nyoñe’ éve’an.

¹⁵ Tame yene mam mese Ésaa wongan a ke ôsu a jibi den a nto betoyini mimbu. (Fombô’ô fe nka’ale ô ne nlô ajô na “ Mame Yéhôva a jibi.”) Yéhôva a ne ngule ya mane tyame mbia émo nyi éto ébiene ji, ve bia yene na ôjibi wé ô volôya bia nya abuii. Tame ve’ele fas éve’ane di. Ba kate minga éziñ ba nnôm na mon ba zu biaé é bo ntutuñ, a na é ji’a wu. To’o jam ete da bo be mintaé nlem, bebiaé be ne meva’ éyoñe mon ate a bialé. Nye’an ba nye’e mone wop wé bo na be jibi minju’u mise bé tôbane mie asu na be nyoñe ngab a nye.

 ¹⁶ Aval ete da da, bone b’Adam ba Ève bese ba bialé a metyi ya abé, ve Yéhôva a nye’e be, a nyoñe fe ngab a be. (1 Jean 4:19) Ve Yéhôva nye a selan a bebiaé bia te jôô be yôp, amu a ne ngule ya vaa minju’u bone bé ba tôbane mie. A teléya ngume môs é vaa akon ese da nambe bôte den. (Mt. 24:36) Ngo’o nge nye’an bia nye’e Yéhôva wo tindi bia na bi ke ôsu a jibi, aval émien a jibi.

17. Aval avé éve’ela Yésus bia koone je Behébreu 12:2, 3 ja volô bia na bi ke ôsu a jibi minjuk?

¹⁷ Yéhôva a ne mbamba éve’ela ya vu mfa’a ya yeme jibi. Yésus a nga vu Ésaa mfa’a ôte. Éyoñ a mbe si va, a nga jibi ékpwe’ele, ôsame, a élé mintaé, asu bone be bôt. (Lañe’e Behébreu 12:2, 3.) Teke bisô na mbamba éve’ela Yéhôva a nga volô Yésus na a jibi minju’u mite. Éve’ela Yéhôva é ne fe volô bia.

18. Bela’ane 2 Pierre 3:9 na ô liti amu jé ôjibi Yéhôva ô ne mfi.

¹⁸ Lañe’e 2 Pierre 3:9. Yéhôva é tyame mbia émo nyi mbamba éyoñ. Ôjibi wé ô nga bo na abui bôt e yeme nye. Éyoñe ji, bemillion be bôt ba kañe nye. Bôte bete bese be ne mevak, amu Yéhôva a nga jibi na be bialé, be yé’é yeme nye, a na be ve bebiene ngumba be nye. Éyoñe Yéhôva é ve bôte bese be nga jibi akekui asu’ulan ma’ane map, éyoñe te ñhe bôte ba ye kôme wô’ amu jé e mbe mfi na Yéhôva a jibi.

19. Ntyi’an ôvé wo nyoñ, a bibotane bivé wé bi?

¹⁹ Éve’ela Yéhôva ja volô bia na bi jibi minju’ a mevak. Akusa bo mbia be mam bese Satan a boya, Yéhôva a ke ôsu a ba’ale ava’a dé. (1 Tim. 1:11) Bia fe bi ne ke ôsu a ba’ale ava’a dangan nté bia yange na Yéhôva a fubu éyôlé jé. É liti bôte na Nnye a yiane éto njôô a vaa mbia be mam bese ba ndeñele bia den. Nkelan ñhe ôsu a jibi, bi yeme’e na Ésaa wongan fe a ke ôsu a jibi. Nge wo bo de, yeme’e na mejô ma mé tôéban be wo: “Ébotan a môt a jibi meve’ele; amu na, éyoñ a kabeya, a ye nyoñ couronne ya ényiñ, nje éte Tate a nga tiñeti ba ba nye’e nye.”​—Jc. 1:12.