Ye e ne fo’o été na Yésus a nga wu asu dame nga?
BIBLE a ne njalan a minkobô mi bôte be mbe “mbialan ane bia.” (Jc. 5:17) Mejô Paul a nga jô kalate Beromain 7:21-24 (Mfefé Nkôñelan) ma nyiine bia melo ne sañesañ; éfus éte ja jô na: “Ma kômbô bo mvaé, ve abé nde e ne be ma. . . . Aka’a éngôngole môte me né!” Avale minkobô ete da bôé bia nleme si amu bia fe bi ne mbialan a metyi ya abé a bia bo bikop.
Paul a nga beta jô mam mefe me ne nambe bia abui. E kalate Begalate 2:20 (nwt-F), da kôme yené na a too ndi na Yésus “a nga nye’e [nye] a ve émien amu ajô [dé].” Ye nne bia fe bia wô’ôtane nalé? Éko éziñe bi wô’ô bi bone biyebe.
Nge wo buni na ô ne momo amu minsem ô nga bo melu mvus, e ne bo ayaé na ô buni na Yéhôva a nye’e wo, a na a jaméya wo, a éko éziñ wo kate yebe na Yésus a nga wu asu dôé. Yésus ki? Ye a yi fo’o na ô yene ntañ ane beta das a nga bo wo? Nge e ne nalé, jé é ne volô wo na ô yene mam ane nye? Mam mebaé.
AVALE YÉSUS ÉMIEN A YENE NTAÑ
Yésus a yi na môt ase ya be bia a yeme na a nga ve ntañ asu dé. Jé ja bo’olô de? Tame yooé Kalate Zambe wôé e Luc 23:39-43 (nwt-F). Môt a tyele élé mintaé fefele Yésus. A meme na a nga nsem. A nji be zezé nsem, amu fonos ba te ve nye é ne nyi ba bo be va’a bewôé bôt. Nlem ô tyele nye yôb angôndô, éyoñ éte a ye’elane Yésus a jô’ô nye na: “Te vuane ma éyoñe wo ye kui Ejôé jôé.”
Yésus a zu bo aya? Tame ve’ele bo ane wo yen ane a kôñelane nlô na a fombô mbia môt ate asu. Akusa bo a mbe a wô’ô mintaé, Yésus a nga ve ngule na a muñ a môt ate, ane a nga ka’ale nye na: “Ma bele ane ma jô wo dene na, bia wo bia ye tabe Paradis.” A mbe ngule ya jô nye tyi’ibi na: “Mone môt a nga zu ve ényiñe jé ntañe bôt abui.” (Mt. 20:28) Ve ye wo te yen aval Yésus a jibi bo? A yi na môt ate a wô’ô na a zu fe wu asu dé. Tyiñe nkobô jé ja liti na a kobô nye ane mvôé jé, a belan éfia “wo” a “ma.” Éyoñ éte a ka’ale môt ate na a ye nyiñe paradis si va.
Teke bisô na Yésus a yi na môt ate a kañese na Krist a zu wu asu dé. Nge Yésus a nga bôône môt ate nleme si a too ki na a nji bi éyoñe ya kañe Zambe, nguma’ane ki wo ô baptizôbaneya, a kañe Zambe! Jé nje ñhe é ne volo wo na ô yene mam ane Yésus akusa bo minsem ô nga bo melu mvus?
JAM E NGA VOLÔ PAUL
Ésaé nkañete é nga volô Paul na a yeme na Yésus a nga wu a butane nye. A jô na: “Ma ve nyô a nga ve me ngu akéva, nnye a ne Krist Yésus Tate wongan, amu na a nga yene na ma yian, ane a nga telé ma mfa’a ya ésaé jé; akôsa bo me mbe mbiasé melu mvus, a nkpwe’ele, a mbo évô.” (1 Tim. 1:12-14) Mbe’e Yésus a nga ve Paul ô nga volô nye na a tu’a wô’ô na Mone Zambe a mvamane nye, na a nye’e nye, a na a too nye ndi. Aval ete da da, Yésus a nga ve fe môt ase ya be bia mbe’e ya kañete. (Mt. 28:19, 20) Ye wo fe wo yene fo’o ésaé nkañete ane ndeme ja liti na Yésus a nga wu asu dôé?
Albert a ndeme bulane be Yéhôva, valé a boya mimbu zia 34 a tele feñ, a jô na: “Ma simesane minsem miam éyoñ ése. Ve éyoñ me ne nkañete, ma wô’ôtane na Yésus a nga ve ma beta mbe’e ya bo nye ésaé. Nalé a ve me ngule nyul a volô ma na me yene mam ane da yian, na me bo te tyelé nleme yôbe den, a na me ba’ale ndi nleme jam asu melu ma zu.”—Bs. 51:3.
Éyoñ wo bo môt ayé’é, to’o wo yen a too aya, liti’i nye na Yésus a mvamane nye, a na a nye’e nye
Allan nye a nga taté be évô a ñwôé bôt ôsusua na a yeme benya mejôô, a jô na: “Me vo’o vuane mbia be mam bese me nga bo bôt. Biyoñ biziñ, nleme wo kone ma. Ve ma ve fo’o Yéhôva akéva amu a kañese na mbo minsem ane ma a kañete bôte bevo’o mbamba foé. Éyoñ ma yen avale bôte ba nyoñe ma nkañete, ma tu’a yemelan abim avé Yéhôva a ne nye’an a mbamba nlem. Ma yene na a belane ma na me ke volô bôte be tele été mamien me mbe me tele.”
Éyoñ bi ne nkañete, bia volô bôt, a bia bem ôsimesane ve mbamba be mam. Nkañete wo bo’olô fo’o na Yésus a ne mvam, na a ne nye’an, a na a too ndi a bia.
YÉHÔVA A DAÑE MINLEM MIANGAN
Nté bia yange asu’ulane ya mbia émo nyi, minlem miangan mi ne ke ôsu a ve bia mekua asu minseme bi nga bo melu mvus. Jé é ne volô bia na bi juan a mbia b’asimesane bete?
Jane a ngenan a jôban amu e nga kui na a bo mbia be mam asoé éyoñ a mbe ésoé, ve a jô na: “Ma nye’e éfuse ja jô na Yéhôva a dañe minlem miangan.” (1 Jean 3:19, 20) Bia fe bia bi mvolane nlem éyoñ bia yeme na Yéhôva ba Yésus ba yeme na bi ne mbialan a metyi ya abé. Te vuane na be nji ya’ane ntañ asu bôte be ne zôsôô ne tiññ, ve asu ba ba jôban abé dap.—1 Tim. 1:15.
Benya mejôô mete me ne kôme nyiine bia nlem nge bia ye’elane Yéhôva a fas avale Yésus a mbe a nyoñe’e bebo mam abé, a nge bia ve ngule na bi kañete a ayôñ ése. Nge bi bo de, wônaa ane nlômane Paul, bia ye bo ngule ya jô na: Yésus “a nga nye’e ma a ve émien amu ajô dam.”
