1, 2. (a) Yésus a nji bo abui ajô môs a nga bôndé Mesimesa’ane ya awu dé; amu jé bi nji vembe de? (b) Mefulu me Yésus mevé bia zu yen ayé’é di?

YE Ô ne kate mam ma bobane Mesimesa’ane ya awu Yésus? Teke bisô na môt ase ya be bia a ne ngule ya bo de. Amu jé? Amu ba bo ki abui ajô Mesimesa’ane. Ve a ne ésulane ja dañe mfi ényiñe jangan. Nde ñhe, amu jé bi nji bo abui ajô éyoñe bia bo je?

² Éyoñ Yésus a mbe si va, a mbe a ye’ele’e bido’o bi mam tene tyi’ibi, avale môt ase a ne wôk. (Mt. 7:28, 29) Aval ete fe, môs a nga bôndé Tawôla Tate, a nji bo abui ajô, ve a nga liti beyé’é bé na Mesimesa’ane me ne angôndô ya mfi. Bi tame zu kobô ajô Tawôla Tate ate, a yene mam méziñ Yésus a nga jô a bo alu ete. Bia zu yene na Yésus a ne angôndô ya éjote nyul, ayo’o nlem, a nye’an, éyoñ éte bia zu fe yen avale bi ne tu’a vu nye.

3. Aval avé Matthieu 26:26-28 a liti na Yésus a nji bo abui ajô éyoñ a nga bôndé Tawôla Tate, fembé a won a nga belane bie bi ne ndeme ya jé?

³ Môs a nga bôndé Mesimesa’ane ya awu dé, Yésus a mbe a benya minlômane mié 11. A nga belane mebuka’a bidi ya Paska asu Tawôla Tate. (Lañe’e Matthieu 26:26-28.) Be nga di ve fembé é mbe te mvusu a nyu mone won a nga li’i éyoñ be maneya di  Paska. Yésus a nga kate beyé’é bé na fembé éte a won be ne ndeme ya nyule jé é ne te nsem a metyi mé, mbie bite a mbe a nga zu ve asu dap. Beyé’é be nji vembe na Yésus a bôndé avale beta ésulan ete teke bo abui mam. Amu jé?

4. Aval avé melebe Yésus a nga ve Marthe ma volô bia na bi wôk amu jé émien a nji bo abui ajô éyoñ a nga bôndé Mesimesa’ane ya awu dé?

⁴ Bi tame bulane bone bengone mvus, a yene jam é nga bobane nda bemvôé be Yésus bela: Lazare, Marthe, a Marie; bi ne valé mbu lale ya ésaé nkañete Yésus. Yésus a nga bi mbamba fane ya kañete môs ôte. Marthe a mbe valé, ve nlô wé ôse ô mbe ve nnam, amu a mbe a kômbô’ô kôme belane Yésus, beta nneñe wop. Ane Yésus a nga lebe Marthe a nye’an ôse na, a bo te wu nju’u na a yam abui bidi, amu sa ke bidi mbie bia dañe mfi. (Luc 10:40-42) Yésus émien a nga tôñe melebe mete éyoñ a nga bôndé Mesimesa’ane ya awu dé. A nji bo abui ajô. Nalé a ye’ele bia na Yésus a ne avale môt avé?

5. Tawôla Tate a ye’ele bia jé a lat a Yésus, a aval avé ñye’elan ôte wo lu’an a mam bia koone me Bephilippien 2:5, 7, 8?

⁵ Minkobô mi Yésus a mimboane mié mise mi mbe mi liti’i na a ne éjote nyul. Ajô te, bi nji semé éyoñ bia yen aval a nga beta liti fulu éte alu a nga kandane nyiñe si va. (Mt. 11:29) A mbe a yeme’e na a mbeme zu ve metuna’a ma dañ metuna’a mese y’ényiñe mona môt, a na, Yéhôva a ye wômôlô nye na a bo Njôô yôp. Ve to’o nalé, a nji jeñe na a ngesebe môs a nga bôndé Tawôla Tate, a nji bo beta abôk. A nga jô beyé’é bé na be bo be simesa’an awu dé éyoñe jia mbu. (Jean 13:15; 1 Bec. 11:23-25) Ésulan éte ja liti fo’o na Yésus a ne éjote nyul. Nga bi ne mevak amu bi bili avale Njôô ete?​—Lañe’e Bephilippien 2:5, 7, 8.

6. Aval avé bi ne vu fulu éjote nyule Yésus éyoñ bia tôbane minjuk?

⁶ Aval avé bi ne vu fulu éjote nyule Yésus? Bia yiane telé miñyiane mi bôte bevo’o ôsu. (Beph. 2:3, 4) Bi tame beta kobô ajô ya alu Yésus a nga kandane  lôte si va. Yésus a mbe a yeme’e na be mbeme vañe wôé nye, ve a mbe a dañe tyelé nleme yôp asu beyé’é bé, amu be nga ye yen abé mvus awu dé. Jôm ete nje a nga lebe be abui, a ve fe be ngule nyul alu ete. (Jean 14:25-31) Miñyiane mi bôte bevok mmie Yésus a mbe a dañe telé ôsu, sa ke émié. Sa mbamba éve’ela ya vu le?

7. Aval avé Yésus a nga liti fulu ayo’o nlem mvuse Mesimesa’ane ya awu dé?

⁷ Éyoñ éte a ndeme mane bôndé Tawôla Tate, Yésus a nga liti fulu ayo’o nlem. Aval avé? A nga kañese na nkômban Ésaa ô boban, to’o a mbe a yeme’e na ba ye wôé nye teke étom, amu ba ye vañe bôte nye ajô na a biasé Zambe. (Mt. 26:65, 66; Luc 22:41, 42) Yésus a nga tebe ne bip amu a mbe a kômbô’ ve Yéhôva duma, a su’u Éjôé jé, a ve fe bôte ba kôñelane minlem fane ya nyiñe nnôm éto. A nga ve fe beyé’é bé mbamba éve’ela amu beta meve’ele me mbe me yange’e fe be.

8. (a) Jé Yésus a nga jô beyé’é bé? (b) Aval avé beyé’é be nga ke ôsu a vu nye mvus awu dé?

⁸ Yésus a nga liti fe fulu ayo’o nlem amu a nji bem ôsimesane wé minju’u a mbe ve tôbane mie, ve a nga dañe simesane beyé’é bé. Éyoñ a titaneya Judas, Yésus a nga bôndé ésulan é nga ye volô miñwo’an ba be nye be nga bo mfefé élat. (1 Bec. 10:16, 17) A nga liti fe be jam ba Ésaa ba yi na be bo asu na te ba jañele ndi nleme  jabe ya ke nyiñe yôp. (Jean 15:12-15) Yésus a nga kate fe be na ba ye tôbane minjuk. A nga jô be na be bo ‘ayo’o nlem’ ane émien. (Jean 16:1-4a, 33) Mimbu mi nga lôt, ve beyé’é be Yésus be nga ke ôsu a vu nye mfa’a ya nyume bebiene mam, a bo ayo’o nlem. Môt ase ya be be a mbe ngule ya wu a jibi minjuk asu nyô mbok.​—Beh. 10:33, 34.

9. Aval avé bi ne vu fulu ayo’o nleme Yésus?

⁹ Bia fe bia vu fulu ayo’o nleme Yésus den. Da sili ayo’o nleme na bi su’u bobejañ ba tôban étibela’a. E wô’ô kui na be vañe futi bobejañe mimbôk. Éyoñ da kui, bia yiane jeñe mezene mese na bi volô be, ja’a da sili na bi ke kamane be meba mejô. (Beph. 1:14; Beh. 13:19) Bia liti fe na bi ne ayo’o nlem éyoñ bia ke ôsu a kañete ‘teke ko woñ.’ (Mam. 14:3) Ane Yésus, bia ke ôsu a kañete to’o bôte ba wosane bia a tibili bia. Ve é ne kui na woñ ô bi fe bia. Jé bi ne bo avale biyoñ ete?

10. Jé bia yiane bo bone besondô ôsusua môse Mesimesa’ane ya awu Krist, a amu jé?

¹⁰ Nge bia simesane bibotane ntañ wo soo bia, nalé a ye volô bia na bi tu’a bo ayo’o nlem. (Jean 3:16; Beép. 1:7) Bone besondô ôsusua na Mesimesa’ane ya awu Yésus ma boban, bi bili fane ya tu’a liti na bia nyane ntañ. Melu mete, nyoñe’ éyoñe ya bo nlañane Kalate Zambe asu Mesimesa’ane a bindi mam me nga boban ôsusua na Yésus a wu. Nalé a ye bo na, mame ngô’é ya Mesimesa’ane, ô  tu’a wô’ô mfi ya ntañ, a atinane ya fembé a won. Éyoñ bia tu’a wô’ô mfi ya jame Yéhôva ba Yésus be nga bo asu biabebien a bôte bia nye’e, bia yemete ndi nleme jangan, a bia bi ngule ya jibi minju’u a ayo’o ése akekui asu’ulan.​—Beh. 12:3.

11-12. Jé bi maneya yene mvus?

¹¹ Mesimesa’ane ya awu Yésus me nji ye’ele bia ve mfi ya ntañ, ve me ye’eleya fe bia beta mefulu me Yésus mebaé: éjote nyul a ayo’o nlem. Nlem ô ne bia njalan a mevak amu Beta prêtre wongane ya yôb a ke ôsu a liti mbamba mefulu mete. (Beh. 7:24, 25) Bia liti na bia ve Yéhôva akiba asu ntañ éyoñ bia bo Mesimesa’ane ya awu Yésus aval a nga jô. (Luc 22:19, 20) Bia bo Mesimesa’ane Ngone Nisan é too melu 14.

¹² Tawôla Tate a ngôné fe beta fulu Yésus mfe, fulu éte nje é nga tindi nye na a wu asu dangan. Éyoñ a mbe si va, bôt bese be mbe be yeme’ fulu jé éte. Fulu fé?

13. Aval avé Jean 15:19 a 1 Jean 4:8-10 a liti bia abim avé Yéhôva ba Yésus be nga nyeʼe bia, a beza be ne yene mfi ya nyeʼan ôte?

¹³ Mam mese Yésus a nga bo ma liti na a nye’e bia abui ane Ésaa. (Lañe’e Jean 15:9; 1 Jean 4:8-10.) A nga kañese na a zu ve ényiñe jé asu dangan. To’o bi ne miñwo’an, to’o bi ne “mintômba mife,” bia bese bia bu’ubane bibotane bia so ntañ Yéhôva ba Yésus be nga ve amu beta nye’an ba nye’e bia. (Jean 10:16; 1 Jean 2:2) Bone be biôm Yésus a nga belane bie asu Tawôla Tate, ba liti fo’o na a mbe a nye’e beyé’é bé, a semene fe be angôndô ya abui. Aval avé?

14. Aval avé Yésus a nga liti beyé’é bé nye’an?

¹⁴ Amu a nye’e miñwo’an, Yésus a nga ve mie ésaé tyi’ibi éyoñ a nga bôndé Tawôla Tate. Bekristen be ne miñwo’an be nga yiane ke ôsu a simesan awu dé mbu ôse, to’o be telé été évé, to’o be ne nda mimbôk. (Nli. 2:10) Ye be mbe ngule ya bo de? Ôwé!

15, 16. Aval avé bobejañ béziñ be nga kui na be bo Mesimesa’ane to’o minju’u été?

¹⁵ Azukui den, benya Bekristen ba ve ngule ya bo Mesimesa’ane ya awu Yésus. Ba jeñe na be bo avale Yésus a nga ye’ele to’o éyoñ mam me nji bo tyi’ibi. Bi tame nyoñe ve bone bive’ane bibaé. Éyoñ Mojañ Harold King a mbe nda mimbôk Chine, é nga sili na a bôndé bone mefek asu na a bo Mesimesa’ane ya awu Yésus. A nga belane biôm a mbe a bili na a kômesane fembé a won asoé. A nga bo fe metañ na a yeme môse Mesimesa’ane ma ye boban. Éyoñ môs ôte ô nga kpwaan, a nga bo Mesimesa’ane ve nye ve ke nye, a nga yia bia, a ye’elan, a bo émiene nkañete.

¹⁶ Éve’an éfe é ne ji besita be nga fet mimbô’ô Benazi éyoñe ya Beta bita bi baa. Be nga fam awu na ba bo Tawôla Tate. Ve mbôl e nji sili abui mam asu na be bo Mesimesa’ane, be nga kui na be bo nye asoé. Be nga jô na: “Mone tebele a mbe a tele bia zañ, éfumulu éndelé é buti’i nye, bi  nga beté fembé a wone tebele yôp. Bi nga belane bougie asu na te beba’ale mimbôk ba yeme jam bia bo. . . . Bi nga beta bo Yéhôva ngaka’a na, bia zu ve ngule jangan ése na bi fubu éyôlé Jé é ne étyi.” Za avale ngule mbunane di! Nye’ane Yésus wo yené fe valé, amu a nga ve Mesimesa’ane ya awu dé avale tyi’ibi é ne na, bi ne ngule ya bo nye été ése bi tele.

17. Minsili mivé bia yiane sili biabebien?

¹⁷ Nté Mesimesa’ane ma subu, môt ase ya be bia a yiane sili émiene minsili mi: ‘Aval avé me ne vu nye’ane Yésus? Ye ma telé fo’o miñyiane mi bôte bevo’ ôsu? Ye ma sili bobejañ mam ma lôte be nkôñ, nge na ye ma nyoñe fo’o ngap a minné miap?’ Ngo’o nge bia fe bia vu nye’ane Yésus a wô’ane mintaé!​—1 P. 3:8.

18, 19. (a) Jé bi ne tabe je ndi? (b) Ntyi’an ôvé wo nyoñ?

¹⁸ Bia ye ke bo Mesimesa’ane ya awu Yésus nnôm éto. Éyoñ ya beta étibela’a, Yésus a ye zu tôkane “bôte Zambe a nga top” a kee be yôp; ataté éyoñ éte, bia ye ke beta bo Mesimesa’ane.​—1 Bec. 11:26; Mt. 24:31.

¹⁹ Ve to’o nalé, bebo bisaé be Yéhôva ba ye ke ôsu a simesane beta mefulu me Yésus Tawôla Tate a nga ye’ele be. Ye mi ngenane fo’o mi tyô’ô mefulu mete? Bia te yene na mefulu mete me ne éjote nyul, ayo’o nlem, a nye’an. Ba bese be nga bo Mesimesa’ane nnôm émo ba ye kañete bôte ya mfefé émo avale be mbe be bo’ ésulan éte. Ve asu na bi tabe valé môs ôte, bia yiane jeñ a ngul ése na bi vu fulu éjote nyule Yésus, ayo’o nleme dé, a nye’ane wé. Nge bia bo de, bi ne tabe ndi na Yéhôva a ye ya’ane bia.​—2 P. 1:10, 11.