1-2. (a) Jé Yéhôva a fombô éyoñ a lôô bôte be ngunu asu Mesimesa’ane? (Fombô’ô fôtô ya ékô’ôla.) (b) Jé bia zu yen ayé’é di?

TAME ve’ele simesan avale Yéhôva a wô’ôtan éyoñ a yen bizu’u bi bôte ya si ése bi za’a tabe Mesimesa’ane. Yéhôva a yene ki ve na nkunda bôte wo te zu tabe Mesimesa’ane, ve a beme mise mé be môt ase ya be be. A yeme ba bese ba bo de mbu ôse. Abui da tôban étibela’a, ve to’o nalé ba bu’i ki Mesimesa’ane. Ba bevo’o ki be nji bo mbane bisulan, ve be ne teke jembane Tawôla Tate. Yéhôva a yene fe ba ba zu tabe ésulan éte éyoñ ôsu.

² Teke bisô na Yéhôva a wô’ô nlem avak éyoñ a yen abui bôt é za’a tabe Mesimesa’ane ya awu Mone wé. (Luc 22:19) Ve sa ke tañe bôte ja tabe Mesimesa’ane nje ja dañe mfi mise me Yéhôva, Yéhôva a fombô fe jame da tindi be na be zu tabe ésulan éte. Bia zu yalane beta nsili nyi ayé’é di: Amu jé bia yiane tabe bisulane bise Yéhôva a bañete bia, sa ke ve Mesimesa’ane ya awu Yésus étam?

3-4. (a) Amu jé bia yiane tabe bisulan? (b) Éyoñ bia tabe bisulan, jé nalé a liti? (c) 1 Becorinthien 11:23-26 a liti na bi nji yiane bu’u bisulan amu jé?

³ Amu jé bia tabe bisulan? Jam ôsu, bisulan bi ne ngabe jia ya ékaña’a bia ve Yéhôva. Jame baa, Yéhôva émiene nnye a jô bia na bi bo de. Bôte be ne mebun be nji yi na môt a ye’ele be jôm. (3 Jean 9)  Ve bi bia nye’e éyoñe Yéhôva a ye’ele bia a zene ya ékôane jé.​—És. 48:17, 18; Jean 6:45.

⁴ Éyoñ bia tabe bisulan bia liti na bi ne éjote nyul. Nge bia tabe Mesimesa’ane, a nji bo ve amu bi ne ntindane ya bo de, a ne fe amu bia kômbô tôñ abendé Yésus di: “Boka mi bo’ane jame di mi simesa’ane me été.” (Lañe’e 1 Becorinthien 11:23-26.) Ésulan éte ja yemete ndi nleme jangan asu melu ma zu, ja liti fe bia abim avé Yéhôva a nye’e bia. Ve Yéhôva a yeme fe na Mesimesa’ane étam me vo’o yian asu na bi ke ôsu a tebe ne bip nsisim. Jôm ete nje a bo na bi bi bisulan sondô ase. Nge bi ne éjote nyul, bia ye tabe bisulane bite bise. Bia ye fe nyoñ éyoñe ya kômesane bie.

5. Amu jé bôte be ne éjote nyule ba kañese éyoñe Yéhôva a bañete be?

⁵ Mbu ôse, bôt abui ba kañese na Yéhôva a ye’ele be, amu be ne éjote nyul. (És. 50:4) Éyoñ be maneya tabe Mesimesa’ane, ba kômbô fe tabe bisulane bise bivok. (Zac. 8:20-23) Bia be be bia wô’ô mvaé éyoñe Yéhôva, ‘mvolô wongan a nyii wongan,’ a ye’ele bia. (Bs. 40:17) Ye jam éziñe da dañe dina na, Yéhôva émien ba Mone wé a nye’e, ba bañete bia na bi zu vô’ôlô be?​—Mt. 17:5; 18:20; 28:20.

6. Aval avé fulu éjote nyul é nga volô môte na a tabe Mesimesa’ane?

⁶ Mbu ôse, bia ve ngul ése na bi bañete bôte Mesimesa’ane. Abui ya be be é wô’ô kañese. Bi tame nyoñ éve’an. Den a ntoo ôbe mimbu, mojañ a nga ve môt éziñ afebe mbañete asu Mesimesa’ane, ve môt ate a nga jô nye na a vo’o tabe. Ve môse Mesimesa’ane, bobejañe be nga teme nye Aba Éjôé. Be nga yeme nyoñe nye aval é ne na, môt ate a nga tyi’i na a zu taté na a tabe bisulan bise. Mbu ôte a nga bu’i ve bisulane bilal. Jé é nga tindi nye na a zu tabe Mesimesa’ane a too ke na a nga taté jô na a vo’o so? A ne amu a mbe angôndô ya éjote nyul. Mojañ a nga bañete nye a nga bo’olô jam ete. Teke bisô na Yéhôva émien a nga dutu nye, a awolo bia kobô di, a ne Ngaa Yéhôva.​—1 P. 5:5; Jean 6:44.

7. Aval avé mam bia yé’é bisulan a mam bia lañe Bible ma volô bia na bi bo éjote nyul?

⁷ Mam bia yé’é bisulan a mam bia lañe Bible été me ne volô bia na bi bo éjote nyul. Besondô ba bômane Mesimesa’ane, be wô’ô dañe kobô ajô ntañ, a liti aval avé wo ngôné fulu éjote nyule Yésus. Be wô’ô fe lebe bia na bi lañe mam me nga bôman awu Yésus a ñwômane wé miñwuan. Mam mete mese ma tindi bia na bi tu’a nyane ntañ. Ma tindi fe bia na bi vu fulu éjote nyule Yésus, a na bi bo Yéhôva mewôk to’o éyoñ bi tele minju’u été.​—Luc 22:41, 42.

8. Aval avé Yésus a nga liti fulu ayo’o nlem?

⁸ Bia jeñe fe na bi vu fulu ayo’o nleme Yésus. Tame simesan aval a nga liti fulu éte bone melu ôsusua na a wu. A mbe a kôme’ yeme na besiñe bé be mbeme  samele nye, a bôme nye, a su’ulane wôé nye. (Mt. 20:17-19) Ve a nga tebe ne bip. Éyoñ awolo dé é nga kpwaan, a nga jô beyé’é ba be nye be mbe Gethsémané na: “Kôla’ane si, bi ke: mi lôô, môt a koñe ma a soya.” (Mt. 26:36, 46) Éyoñ a nga yene bôte be nga zuu mimbeñ a minkpwaté mekône na ba zu bi nye, a nga tebe beyé’é bé ôsu a jô na: ‘Me nyi, jô’ané beyé’é bam be ke.’ (Jean 18:3-8) Yésus a mbe fo’o ayo’o nlem, sa nalé? Dene fe, miñwo’an a mintômba mife mia jeñe na mi vu fulu ayo’o nleme Yésus. Aval avé?

9. (a) Amu jé da sili ayo’o nleme na bi tabe bisulan? (b) Aval avé éve’ela jangan é ne volô bobejañ be ne mimbôk?

⁹ Da sili ayo’o nleme na bi tabe bisulan éyoñe bia tôbane minjuk. Abui bobejañ da tabe bisulan a too ke na nlem ô ne be ntya’an nge ke na be ne mintutuñ. Ba bevo’o ki ba tôban étibela’a menda me bôte map, nge ke amu ngovina a tyili ésaé jangane si be too. Ye wo yeme fo’o na mbamba éve’ela wôé a ne yemete mbunane bobejañe be ne mimbô’ô nga? (Beh. 13:3) Éyoñ ba wô’ô na bia ke ôsu a kañe Yéhôva akusa bo minjuk, nalé a volô be na be bo teke feñelan, a na be jibi mimbô’ô a ayo’o ese. Jam ete e nga yené be Paul. Éyoñ a mbe mimbôk, a nga wô’ô mevak éyoñ be nga kate nye na bobejañ ba ke ôsu a tebe ne bip mbunan été. (Beph. 1:3-5, 12-14) Nné ane a nga kui mimbôk, a nga tili Behébreu kalate a jô’ô be na be ke ôsu a nye’esan, a na, be bo te jô’é nsula’ane wobe ya vôme wua.​—Beh. 10:24, 25; 13:1.

10-11. (a) Za bia yiane bañete Mesimesa’ane? (b) Beéphésien 1:7 a jô na bia yiane de bo amu jé?

¹⁰ Bia liti fo’o na bi ne ayo’o nlem éyoñ bia bañete bivuvumane biangan, bôte bia be be bia saé, a bôte bia be be bi too vôme wua Mesimesa’ane. Amu jé bia bañete bañete be? Amu bia nye’e jame Yéhôva ba Yésus be nga bo asu dañ, ajô te bi vo’o bo te bañete bôte bevok. Bia yi na be’e fe be wô’ôtane mvame Yéhôva ane bia, a yene mfi ya ntañ.​—Lañe’e Beéphésien 1:7; Nli. 22:17.

¹¹ Ve bia liti fe fulu fe éyoñ bia tabe bisulan, fulu éte é ne angôndô ya mfi, Yéhôva ba Yésus be bili je aka’a abui.

12. (a) Aval avé bisulan bia nene nye’ane wongan asu Yéhôva ba Yésus? (b) Aval avé kalate 2 Becorinthien 5:14, 15 a liti bia na bia yiane vu Krist?

¹² Bia tabe bisulan amu bia nye’e Yéhôva ba Yésus. A mam bia yé’é  bisulan ma bo na nye’an ôte ô yaé. Amu éyoñ ése ba ba’alane bia mame Yéhôva ba Yésus be nga bo asu dangan. (Bero. 5:8) Mesimesa’ane ma volô bôte bese na be tu’a wô’ôtane nye’ane Yéhôva ba Yésus, to’o ba be nji bo Bengaa. Mbôle nye’an ôte wo nambe bia abui, bia jeñ a ngul ése na bi vu Krist môs ôse ya ényiñe jangan. (Lañe’e 2 Becorinthien 5:14, 15.) Nleme wo tindi fe bia na bi ve Yéhôva duma amu ntañ. Bia bo de éyoñ bia ve mbamba biyalan ésulan.

13. Aval avé bia liti nye’ane wongan asu Yéhôva? Timi’in.

¹³ Bia fe bia liti Yéhôva ba Mone wé na bia nye’e be éyoñ bia nyume biabebiene mam asu dap. Bia bibane na bi tabe bisulan to’o éyoñ nalé a ne ayaé. Abui mekônda da bo bisulane zañe sondô éyoñ bôte be te’eya a bisaé. Bisulane bivo’o ki bia bobane memane me sondô éyoñ bôte ba kômbô wo’on. Ye Yéhôva a yene fo’o mengule mese bia ve na bi ke bisulane nga? Ôwé! Ke Yéhôva a tu’a wô’ô wô’ô mvaé éyoñe môt a sutane ke bisulan a too ke na jam ete e ne nye ayaé!​—Marc 12:41-44.

14. Aval avé Yésus a nga liti mbamba éve’ela mfa’a ya nyume biabebiene mam?

¹⁴ Yésus a ne mbamba éve’ela mfa’a ya nyume biabebiene mam. A nji su’u ve na a wu asu beyé’é bé, ve a nga telé fe miñyiane miab ôsu ényiñe jé ése. Môs éziñ, a mbe nte’an a nlem ô mbe ô tyele nye yôp, ve a nga nyoñ éyoñe ya lebe be. (Luc 22:39-46) A mbe a dañe simesane mam a ne ve bôt, sa ke mam a ne nyoñe be be. (Mt. 20:28) Nge nne bia fe bia nye’e Yéhôva a bobejañ nalé, bia ye jeñ a ngul ése na bi tabe Mesimesa’ane a bisulane bise bivok.

15. Beza bia yiane dañe volô?

¹⁵ Teke ékôane bôt éfe é ne nlatane si nyi ane ji Bengaa be Yéhôva, ajô te bia ve ngul ése na bi volô bôte befe na be zu kañe Yéhôva a bia. Ve  bia dañe jeñe na bi volô bobejañ be maneya voé nsisim. (Beg. 6:10) Bia liti be na bia nye’e be éyoñ bia jeñe mezene ya volô be na be tabe bisulan, e dañedañe Mesimesa’ane. Ane Yéhôva ba Yésus, nlem ô ne bia njalan a mevak éyoñe bia yene mojañ a beta bulane be mbamba Mba’ale mintômba, a Ésaa wongane ya nye’an.​—Mt. 18:14.

16. (a) Aval avé bi ne veane ngule nyul, a aval avé bisulan bia ye volô bia mfa’a ôte? (b) Amu jé éyoñ ji nje bia yiane dañe simesane mejô me Yésus ya Jean 3:16?

¹⁶ Va’a ngul ése na ô bañete bôte Mesimesa’ane ya mbu wu; a ye bobane môse nkul éwônga ya Ngone nyini é too melu 19. (Fombô’ô nka’ale ô ne nlô ajô na “ Ye wo ye fo’o bañete be?”) Mbu wo taté wu, emva’ané ngul ése na bi bo mbane bisulan, ndemben bia ye veane ngule nyul. Harmaguédon nnye a ntele nseñe nyi! Nge bi teke tabe bisulan, jé fo’o ja ye kôme volô bia na bi bo éjote nyul, ayo’o nlem, a na bi bi fulu nye’an? (1 Bet. 5:8-11) Ajô te, a nleme wongan ôse, enlitané Yéhôva ba Mone wé na bia ve be akiba amu beta jam be nga bo asu dangan!​—Lañe’e Jean 3:16.