Ajô nsôbane mo é mbe jame da ya mam me nga bo na, besiñe be Yésus, be ve ba beyé’é bé mekua. Metiñe me Moïse me mbe me bili abui metiñ é mbe é fombô’ô mfubane ya nyôl, zam, a avale be mbe be yiane belane mimbim betit, a mi mi bôt. Metiñ mete me mbe fe me liti’i avale be ne vaa mvit éte. Be mbe ngule ya bo de a zene ya mveane metuna’a, mewoban, nge a zene ya mvean avut.​—Lév., kabetôlô 11-​15; Nb., kabetôlô 19.

Betebe ôsu ya ñyebe Bejuif, be mbe be ngôné’é bone be mam bese ya metiñ mete. Kalate éziñ a jô na, éyoñe môt a mbe mvit, betebe ôsu be mbe be “sili’i nye minsili asu na be yem aval avé jame te da te boban, aval a abim avé mvite jé ja te kôéban, biôm bise môt ate a te nambe, a mvuse ya valé nde ñhe be mbe be fase mam be mbe ngule ya bo na be fubu nye.”

Besiñe be Yésus be nga sili nye na: “Amu jé beyé’é bôé be ne te wulu aval ane ñye’elan metume me bô-betôl ô né, ve ba viane di bidi a mvin ése mo?” (Mc. 7:5, Mfefé Nkôñelan) Betebe ôsu bete, be nji be be kobô’ô ajô ya nsôbane mo asu mvo’é ya minsôn. Be mbe be mbili fulu ya tindi bôt a ngule na, be sôé mendim e mo ôsusua na ba di. Kalate bia te jô nye yôbe valé a beta kô’ôlane na: “Be mbe fe be sañeta’an ajô ya avale bisua be mbe be yiane belane de, avale mendim é mbe mvo’é asu jame te, e môt a mbe a yiane sôé bôte mendim e mo, a abime bôt é mbe é yiane sôbe mo a abime memdim éziñ.”

Éyalane Yésus a nga ve bebôndé metiñ é mbe tyi’ibi. A nga jô betebe ôsu Bejuif ya ntete mimbu ôsu na: “Ésaïe a nga kulu mejô mvaé ajô denan, mia bôt mi abo medu’an, éyoñ a nga tili na, ‘Bôte ba be awumu me biyaé, ve minleme miap mi ne me [Yéhôva] ôyap. Be akañe me momo nkañan, amu be aye’ele bôt mejô me ne mejô me bôt.’ Mi ali’i metiñe me Zambe a ba’ale biyem bi bôte betô.”—Mc. 7:​6-8.