Ôbangam wo ye man
Bemillion be bôt be nga tôñe melebe bia te yene minlô mejô ya mvus, be nga ve ngul ése na be vaa fulu ôbangam minleme miap. E ne été na bi se ngule ya mane vaa mone jam ase a tii a fulu ôbangam minleme miangan été. Ajô te, ye mbia fulu ôbangam aye fo’o kui na a mane môs éziñ?
Éjôé ja yian
Bijôé ya émo bi boya abui mam mfa’a ya wosane fulu ôbangam. Ve ye nalé a tinane na, teke éjôé éziñ é ne ngule ya mane mbia fulu ate nga?
Éjôé ja kômbô vaa fulu ôbangam ja yiane:
1. Tindi bôte na be tyendé asimesane dap a lat a avale ba yene bôte bevok.
2. Tindi bôte na be bo teke jeñe beamu ya bo bôte bevok ôbangam.
3. Bi betebe ôsu be nji bi fulu ôbangam minleme miap été.
4. Late meyoñe mese me bo jôme jia.
Kalate Zambe a jô na, Zambe a téléya aval éjôé éte. Ba loon éjôé éte na, ‘Éjôé Zambe.’—Luc 4:43.
Tame yene mam Éjôé Zambe ja ye bo.
1. Éjôé Zambe ja ye ve mbamba miñye’elan
“Bôte be to si nyô ba [ye] yé’é zôsô.”—ÉSAÏE 26:9.
“Ésaé zôsô a bo j’aye bo na, mvo’é; a jôm zôsô a ve na, évôvoé a mbamba mebune nlem nnôm éto.”—ÉSAÏE 32:17.
Jé bifuse bi bia ye’ele bia? Éjôé Zambe ja ye ye’ele bôte zôsô. Éyoñe bôte ba yé’é nsela’ane a ne zañe jam e ne zôsô a di e ne ékotekot, jam e ne mvo’é a di e ne abé, avale ba yene bôte bevo’o da tyendé. Bôte bese ba ye yeme na, jam e ne zôsô e ne na, be nye’e avale bôt ese.
2. Éjôé Zambe ja ye mane vaa ékotekot
Zambe “a ye fimi mili’i mese mise map, a awu de aye fe bo, nge ñyôn, nge mintaé: mame ya ôsu me lôteya.”—NLITAN 21:4.
Jé éfuse ji ja ye’ele bia? Éjôé Zambe ja ye vaa minju’u mise ékotekot é nga soo mie. Bôte be nga tôban ékotekot, ba ye ke beta wôk ôlun amu mbia be mam bôte bevo’o be nga bo be.
3 Éjôé Zambe e bili mbamba Njô
“A ye bo te tyi’i mejô a ñyenane ya mis, nge tyi’i mam a ñwôane ya melo; ve a ye tyi’i minzôzoé mejô a zôsô, a kôm mejô me bôte be ne nje’ebane minleme si nyô.”—ÉSAÏE 11:3, 4.
Jé éfuse ji ja ye’ele bia? Yésus Krist, Njô ya Éjôé Zambe a ye jôé si ése e zôsô été. Yésus a ye ke nye’e ngum ayoñ a dañe da avok, a ye fe bo na bôte bese ya si be tôñe bezôsô metiñe bé.
4 Éjôé Zambe si, bôte ba ye bo nlatan jôme jia
Éjôé Zambe ja ye’ele bôte na be bo “ba ya ôsimesane via, a bi aval nye’ane da; a aval nkañesane da, a aval nleme da.”—BEPHILIPPIEN 2:2.
Jé éfuse ji ja ye’ele bia? Benyoñe ngabe ya Éjôé Zambe ba ye ke jô ve anyu anyu na be ne nlatan. Da ye kôme yené na be bili “aval nleme da” amu nya nye’ane aye bo zañe jap.
