Ana’ana, Éjôé Zambe bi jaéya yange ja ye so mvo’é si se. Aval Zambe a nga ka’ale kalate Besam 72:7, ‘mvo’é ja ye bo abui.’ Éjôé Zambe ja ye ñhe jôé si ése éyoñ évé? Jé Éjôé Zambe ja ye bo? Aval avé ô ne bu’ubane bibotan Éjôé éte ja ye so bie?

Kalate Zambe a nga kobô ajô “ndem” ja ye liti na Éjôé Zambe é nto bebé. Ndem éte é ne bibubua bi mam bia ye bobane si se ane bita, bemfumbale ya zaé, akon, mimfô’ôsane mi si, a jo’ojo’o.​—Matthieu 24:3, 7, 12; Luc 21:11; Nlitan 6:2-8.

Nkulan ajô ôfe wo jô na: “Melu me asu’ulan mbia biyoñ bi aye bo. Amu na, bôt be aye nye’e bebien, be aye bo ôzañ akum, . . . A bo bebiaé bap melo, a bo bikalak, te nye’e mame ya mbunan, te nye’e bivuvumane biap, minziziñ, bebo bibôta, te jôô bebien, ayok, te nye’e mam me ne mvaé, . . . mebun, benye’e mame ya mevak, adañe nye’an be anye’e Zambe.” (2 Timothée 3:1-4) Bôte be jaéya zu ba liti aval mefulu ete. Ve den, be nga dañe beté ôdo’é.

Minkulan mejô mite mi nga taté na mia tôéban mbu 1914. Bôte ba kañete minlañe ya émo, bejôô bôt a betili bekalate be nga liti abim avé émo é nga tyendé mvuse mbu ôte. Éve’an é ne na, ñyeme mam éziñe ya Danemark ba loene na Peter Munch a nga tili na: “Ényiñ é nga tyendé angôndô ya abui mvuse bita bi nga boban mbu 1914. Ôsusua na bita bia boban, bôte be mbe be simesane na ényiñe ja ye bo abeñ ane mimbu mia lôt, . . . ve mvuse ya valé, jo’ojo’o a mbia be mam meval mese bi nga jaé si ne lut.”

Ve mvuse ya valé, mvo’é ja ye bo si. Bibubua bi mam bite bi ne ndeme ja liti na Éjôé Zambe é mbeme zu jôé si se. Yésus a nga liti fe mbamba jam a ye bo ndeme ya asu’ulan: “Mbamba foé ya [Éjôé] Zambe nyô a ye katebane si se, a ye bo meyoñe mese ndem; wôna asu’ulan de aye bo.”​—Matthieu 24:14.

Mbamba foé ate a ne nten nlô ajô Bengaa be Yéhôva ba kañete. Jôm ete nje ba loene kalate mefoé ba dañe kuli na, Nkume mmombô a bete a yôtan Éjôé Yéhôva. A kuiya minkobô a lôte 338; a liti mbamba be mam Éjôé Zambe ja ye bo asu si a bone be bôt.

Mame menyine ma ma ve éyalane ya nsili ôte:

1. Éjôé éte ja ye ke belane bijôé bi pôlitik ya émo ji.

2. Mbôle bijôé bi pôlitik bia ye bene kôlô bito biap, bia ye wosan Éjôé Zambe; akute jame fo’o!​—Besam 2:2-9.

3. Éjôé Zambe ja ye tyame bijôé bi pôlitik bise bia ke ôsu a tibili bone be bôt. (Daniel 2:44; Nlitan 19:17-21) Ba loene mewosan ma ye su’ulane bobane na, Harmaguédon.​—Nlitan 16:14, 16.

4. Bôte bese ba su’ Éjôé Zambe ba ye nyiñ éyoñe bita ya Harmaguédon bia ye boban, mvuse ya valé, ba ye nyiñe mfefé émo vôm mvo’é ja ye bo. Mbe ba ye bo “bizu’u bi bôt” Bible a jô bie.​—Nlitan 7:9, 10, 13, 14.

Jam ôsu ô ne bo asu na ô bo nyoñe ngape ya Éjôé Zambe é ne na, ô yé’é Mejô me Zambe. Yésus a nga ye’elane Zambe a jô’ô na: “Ényiñe ya melu mese é ne na, be aye [yé’é] yeme wo wo étam ô ne nya Zambe, be aye yeme fe nyô ô nga lôm, nnye a ne Yésus Krist.”​—Jean 17:3.

Éyoñe bôt ba tu’a yeme Yéhôva Zambe, ba bi abui bibotan. Bi tame yene mam mebaé y’été: jam ôsu, ba wônô mbunane wop be Zambe. Mbunan ôte wo yemete ndi nlem be bili na Éjôé Zambe é tebeya fo’o a na, é mbeme zu jôé si se. (Behébreu 11:1) Jame baa, ba tu’a nye’e Zambe a bôte bevok. Nye’an ba nye’e Zambe wo tindi be na be bo nye mewôk a nlem ôse. Nye’an ba nye’e bôte bevok wo tindi be na be tôñe mejô me Yésus ma: “Ane mi anye’e bôt be bo’o mia, bo’ane fe be aval ete.”​—Luc 6:31.

Aval ane Ésa a nye’e bone bé, Nté wongan a yi mvo’é jangan. A yi na bi bi jôm Bible a loone na, “ényiñ é ne fo’o ényiñ.” (1 Timothée 6:19) Sa ke aval ényiñ ete nje bi bili den. Ényiñe bemillion be bôt é ne jalan a mintaé a ba yiane biban asu na be nyiñ. Asu na ô yeme bibotan bia yange bia éyoñe bia ye bi nya ényiñ ate, yene’e mbamba be mam Éjôé Zambe ja ye bo asu bôte ba su’u je.