Ye wo buni na bone be bôt be ne ngule ya kôme minju’u mia kamane bia na bi nyiñe mvo’é été den a melu ma zu? Asu na be bo de, é ne mfi na be taté yem vôm minju’u mite mia so.

Bi tame nyoñ éve’an: Tom a mbe nkôkon, nde a nga su’ulane wu. Jé é nga bo na a wu? Dokita a mbe a saé nda biañ be nga ke Tom a nga jô na: “Éyoñe Tom a nga taté na a juk, teke môt éziñ a nga jeñe na a fas jam ebien é nga bo na a kon.” Bedokita be nga ve nye fo’o ve mebiañ me nga volô nye na a wô’ôtane mone mvo’é.

Ye nne fe bone be bôt ba jeñe na be kôme minju’u y’émo nalé? Éve’an é ne na, asu na mewôé me bôt me sé’éban, bijôé bia té metiñ, bia telé becaméra vôm ase, bia telé fe bezimbi bevôme bevôm. Mezene mete ma volô fo’o abim éziñ, ve me nji kôme jam ébien da soo mewôé me bôt. Nya ajôô a ne na, mam bôt ba bo ma kôme liti asimesane dap a minkômbane miap.

Daniel a nyiñe si éziñe ya Amerique du Sud, vôm azôé da nemban; a jô na: “Ényiñ é mbe abeñ melu mvus. Amu beze mimfaka be nji be. Ve den, mvo’é é nji bo vôm éziñ, to’o minlam mi mvus. Azoé da kôme fo’o kulane mbia mefulu bôte be bili: be ne ôzañ akum, a be nji semé binyiñe bi bôt nge biôm be bili.”

Môt bia zu loone na Elias, a nga tube bita bi nga boban e Moyen-Orient; mvuse ya valé, a nga taté na a yé’é Kalate Zambe. A jô na: “Menda me bôt, bijôé bi pôlitik, a menda me Zambe bi nga tindi abui bisoé ya nlame wome na bi ke bita, ndemben bôte ba ye wumulu bie. Be mbe be tindi’i bisoé ya ngame fok na bi bo avale da. E tabe ndi a bijôé ya émo ji a ne fo’o éngôngole jam!”

Nnôme kalate ô ne njalan a fek wo jô na:

• “Ôsimesane ya nleme môt ô ne abé aso mongô.”​—Metata’a 8:21.

• “Jôm éfe é nji bo medu’an ane nleme môt, a be se ngule ya bo wô mvo’é, nge yeme jame wo kômbô.”​—Jérémie 17:9, Mfefé Nkôñelan.

• “Mam me aso bôte minlem, mme ma: mbia be mam bôt ba simesan, ñwôane bôt, . . . [mvine mame ya bisôk], wup, bibôta.”​—Matthieu 15:19.

Bone be bôte be nji fo’o kui na be tyendé mbia mefulu bôte be bili a ma bo na be tibili bôte bevok. Ane éyoñe ja lôt, ba tu’a fu’u fé; a jam ete da soo abui minjuk, ane mi bia te jô mie nlô ajô ya mvus. (2 Timothée 3:1-5) A to ke na den, bi nto ngule ya bi abui mefoé tyi’ibi; ô ba’a fe abui mezene bi mbili asu na bi laan a bôte bevok! Nde ñhe amu jé bia kate kui na bi nyiñe mvo’é été? Ye é ne bo na jam ete da kate kate mona môt? Nge na nye a kômbô bo jam da lôt nye nkôñ?

To’o mona môt a bo asimba avé, a vo’o kui na a soo mvo’é si nyô. Amu jé? Amu mona môt a bili minné.

Mejô ma me ne mebôm: “Ñyeman ô nji bo nleme môt été, ane a ye wulu zene jé.” (Jérémie 10:23)  Yaa, bi nji téban a ngule ya wulu biabebien. Aval ane bi nji téban na bi nyiñe mendime si, nge ñyeme yôp, aval ete fe bi nji tébane na bi jôé bôte bevok!

Nya ajôô a ne na, teke môt éziñ a nye’e éyoñe ba kate nye aval a yiane wulu ényiñe jé; nge na môte mfe a kate nye aval a yiane yene mam, ane mvaan abum nge avale ba yiane foñôsô môt, nge ke aval a yiane yale bone bé. Mam mete me ne fo’o ve bone minjuk ba so nkanda’ane zañe bôt. To’o jam ete é ne ayaé ya kañese, jame Kalate Zambe a jô e ne été. Bi nji téban a ngule ya jôé bôte bevok. Nde ñhe bi ne yene mvolane vé?

Bi ne yene mvolane be Nté wongan. Ke nnye a nga té bia! A nji vuane bia, aval abui bôt da simesan. Fe’e é ne Kalate Zambe été ja liti abim avé a wô’ô bia mintaé. Éyoñe bia tu’a wô’ô Mejô mé, bi ne ngule ya yem amu jé bone be bôte ba tôban abime minju’u di. Bia wô’ô amu jé ñyeme mam éziñ ya si Jaman a nga jô na: “Bijôé y’émo ji a bone be bôt, be ngenan te nyoñe ñye’elane ya mbia be mam ba bobane si nyô, a be ngenan te tyendé mbia mefulu map.”

Mfefe’e môt éziñ ô nga jô na: “[Fek] ja kabe amu bone bé bese,” nge mimboone mié. (Luc 7:35) Bia koone éve’ane jia kalate Ésaïe 2:22, a jô na: ‘Te taba’ane ndi a môta binam.’ Melep me ne éfus éte ma volô bia na, bi bo te futi ndi jangan mam ma ye ke tôébane môs éziñ. Kenneth a nyiñ si éziñ ya Amérique du Nord, vôm évô é ne; a jô na: “Bijôé bi pôlitik bi ne étyi te tôé bengaka’a bia bo bôt. Mimboone miap mia yemete fo’o na, jame Kalate Zambe a jô é ne totyi.”

Daniel bia te jô nye atata’a a jô na: “Mam ma bobane si nyô môs ôse ma yemete fo’o na, bone be bôt be vo’o soo mvo’é. . . . Sa ke moné môt a bili bank, nge akume dé, nde é ne bo na a bi mbamba ényiñe melu ma zu. Ma yeme bôt abui be nga tôbane abui minjuk amu be nga tabe ndi a akume dap.”

Kalate Zambe a nji su’u ve na, a volô bia na, bi bo te tabe ndi a mam ma ye tôébane môs éziñ. A ve fe bia nya ndi nleme asu melu ma zu, avale bia zu yen nlô ajô wo tôñe le.