ASU BISOÉ
11: E saé a nlem ôse
JÔME NALÉ A TINAN
Bôte ba saé a nlem ôse be nji tup ésaé. Ba viane nye’e éyoñe ba saé a ngul ése asu na be jalé miñyiane miap a mi mi bôte bevok, ja’a ésaé ba bo e nji bo na bôte be kômbô be.
AMU JÉ É NE MFI
Ja’a bia yi ja’a bi nji yi, ényiñ é ne njalan a mimbe’e. E saé a nlem ôse émo é ne njalan a minleles, a ne wo nya mfii.—Ecclésiaste 3:13.
“Me yeneya na, éyoñe wo saé a nleme wôé ôse, wo wô’ô womiene mvaé a ô bili nya ava’a. Ava’a ete da te volô ma na me taté na ma nye’e ésaé. E bi nkômbane ya saé avale da yian a ye volô wo na ô bi mbamba éyôlé.”—Reyon.
ÑYE’ELANE YA BIBLE: “Ésaé ése é bili nsenge.”—Minkana 14:23.
JAM Ô NE BO
Jeñe’ na ô toñe melebe me ne si valé asu na ô bi mbamba ôsimesane mfa’a ya ésaé.
Bii meva’a ya bo mam avale da yian. Éyoñe wo bo bisaé ba te ve wo nda, e sikôlô, nge ke nda bisaé, kôme’e bie bo a nleme wôé ôse. Éyoñ ô kômeya yem aval ô ne bo ésaé éziñ, tuka’a jeñe na ô bo je avale da dañ abeñ, nge avôl. Abim atyeñ ese ô ne bo ésaé éte, abim ete fe wo ye nye’e je.
ÑYE’ELANE YA BIBLE: “Ye ô lô môt mban ésaé jé? Nnye ate a ye tebe asu bejô bôt; a ye bo te tebe asu ayôme bôt.”—Minkana 22:29.
Yene’ mame mimfa’a mise. Da yené éyoñ ése na, éyoñe wo be’e mimbe’e miôé avale da yiane, bôte befe ba yene mfi ya été. Éve’an é ne na, éyoñe wo kôme bo bisaé ba te ve wo nda, môt ase a ne bu’uban a ésaé jôé.
ÑYE’ELANE YA BIBLE: “Môt a ve, a nyô a nyoñ, nyô a ve a dañe yen ébotan.”—Mam Minlôman 20:35.
Dañe’ minné miôé. A lôte na ô bo ve abim ésaé ba te ve wo, jeñe na ô bo a dañ abime wo too ô bili na wo bo. A mboan ôte, ô ne ngule ya jôé ényiñe jôé: e saé abui sa ke amu ba tindi wo, ve amu womien wo tobe na wo bo je.—Matthieu 5:41.
ÑYE’ELANE YA BIBLE: “Mvame jôé je aye bo te bo ane jame ya ntindan, ve di ya nkañesan.”—Philémon 14.
Bii mbamba ñyenane mam. Bôte ba nye’e ésaé be nji bo minleles, a be nji fe bo alo ya bisaé. Nsôñane wôp ô ne na be yene mam avale da yian, a bi mevak éyoñe ba saé a éyoñe ba wo’on.
ÑYE’ELANE YA BIBLE: “E ne mvaé ya ve womien ôbe awo’on a lôte na ô tu’i nyôle jôé a mboon ésaé é ne teke yeme mfi y’été.”—Ecclésiaste 4:6, Mfefé Nkôñelan.
