Môt a yeme yemban a ji’a yet éyoñ minju’u mia kui nye. A bili fulu éte amu a jaéya zu a tôbane mam ényiñe jé. Fo’o ve ane mone mongô a vo’o yeme wulu teke taté ku, aval ete fe, a vo’o yeme dañe minju’u y’ényiñ nge a nji tôbane mie.

Abui bongô e wô’ô bili atek éyoñe ba kpwe’ele be a éyoñe ba tôbane minjuk. Bevo’o be wô’ô jibi ba’a mo. Ve, é ne mfi na be yeme mame ma tôñe ma:

• Bia bese bia kop.​—Jacques 3:2.

• Minju’u mia kui be môt ase ya be bia.​—Écclésiaste 9:11.

• E ne mfi na be ve wo melep nge wo kômbô bo môt.​—Minkana 9:9.

Fulu ya yeme yemban ja ye volô nyo mone na, a yeme dañe minju’u mié.

Éyoñe nyo mon a ku.

ÑYE’ELANE YA BIBLE: “Amu na zôsôa môt a ne ku biyoñe zangbwal a beta fe kôlô si.”​—Minkana 24:16.

Volô’ô nyo mone na a yemelane nge nju’u a bili ô ne ngul, nge momo. Bi ne nyoñ éve’an. Nge a te ku meve’ele e sikôlô, a ne ve émiene bijô a jô na, “Me ne fo’o mbia asuk!”

Asu na ô ye’ele nyo mon fulu ya yeme yemban, volô’ô nye na a fas jam a ne bo asu na a yeme saé éyoñ éfe. Nalé a ye volô nye na a kôm ajô ébien, a lôte na a ke ôsu a ve émiene bijô.

Ô sa’ale fe fulu ya kôm ajô señe jé. Volô’ô nye na émien a fas aval a ne kôm ajô ete. Ô ne nye sili na, “Jé ô ne bo asu na ô kôme wô’ô ñye’elane ba te ve?”

Éyoñe minju’u mia kui.

ÑYE’ELANE YA BIBLE: “Ve mi ne te yeme jam de aye bo akiti.”​—Jacques 4:14.

Minju’u mi wô’ô kui bia atemetem. Môt a ne bo nkukume den, akiti a nto azoé; a ne bo mvo’é minsône den, akiti a mbô énoñ ôkon. Kalate Zambe a jô na: “Ndañan mbi ô nji bo jôme ya beke mimbi, a ndañane bita ô nji bo jôme ya  mingungu, . . . [amu] éyoñ a ndôba’ane bi akui be be bese.”​—Écclésiaste 9:11.

Mbôl ô ne mbiaé, wo bo mam mese ô ne ngule ya bo asu na ô ba’ale bone bôé. Ve, nya ajôô a ne na, ô vo’o bo na nyo mon a sa’ale minju’u y’ényiñ.

E ne été na, nyo mon a ngenane teke kui ôkala môt a ne jañele bisaé, nge ku azoé. Ve, ô ne volô nye na a dañe minju’u mife ane éyoñe mvôé jé ja lume nye mvus, nge éyoñ ébu’a jia ya nda bôte ja wu. *

Éyoñe ba ve nyo mone melep.

ÑYE’ELANE YA BIBLE: “Wô’ô meleb . . . asu’ulan, wo ye bo fek.”​—Minkana 19:20, Mfefé Nkôñelan.

Éyoñe môt a ve nyo mone melep, a nji bo na a vini nye nge amu a kômbô balé nye. Melebe mete ma liti na a kômbô volô nye na a tyendé mbia fulu éziñ a bili.

Éyoñe wo ye’ele nyo mon na a kañese melep, mia bebaane mia ye yene mfi y’été. John a jô na: “Nge wo jeñ éyoñ ése na ô kôme minju’u mi bone bôé señe jap, ba ye ke nyoñe ñye’elan éziñ. Wo ye lôt ényiñe jôé ése na wo ke wo kôme mejô mese ba te ke ba té. Mboan ôte wo ye viane bo na, mia benyo bon mi bo kom ése ve minju’u été.”

Aval avé ô ne volô nyo mone na a kañese melep? Éyoñe ba ve nye melep e sikôlô nge vôme mfe, te ji’a jô nye na melebe mete me nji yian. Ô ne viane sili nye na:

• “Wo simesane na môt ate a te ve wo melep amu jé?”

• “Ô ne bo aya asu na ô tyendé?”

• “Wo ye bo aya nge wo beta tebe aval été éte?”

Ba’ale’ na, melebe ma ye volô nyo mon saa ve den, ja’a éyoñ a ye bo nya môtô.