NYE’AN Ô NE NYA MFII ASU MÔTA BINAM. Nge teke nye’an, aluk, nda bôte, nge amvoé bi se ngule ya yem a nen. Nalé a liti na nye’an ô ne nya mfii asu mvo’é jangan, a wo volô bia na bi nyiñe meva’ été. Nde, jé ba loone na “nye’an”?

Nye’an ba jôô wô va, ô nji bo wu fam ba minga be ne bi; nye’an ôte ô ne fe mfi. Ve, nye’ane bia jô wô va, ô ne fatane nye’ane wo tindi môte na, a yeme tebe été bôte bevok a jeñe na a volô be, ja’a da sili na a telé miñyiane miap ôsu. A ne nye’an ô tii a miñye’elane ya Bible, ve ô to fe ayôñ a wo tindi môte na a kabetan a môte mfe nya nkabetane.

Abeñe bifia bia ve atinane ya nye’an: “Nye’an wo ajaé jibi, a ô ne mvam; nye’an ô ne te wumu ôbien, ô ne te bo mebun, ô ne te bo ane e ne te yian, ô ne te jeñe mam mé, ô ne te yaa, ô ne te lañesan abé; ô ne te va’a vôm ya ékotekot, ve wo ava’a a benya mejôô, wo abuti mam mese, . . . wo atabe mam mese ndi nlem, wo ajibi mam mese. Nye’an ô ne te ke man.”​—1 Becorinthien 13:4-8.

Aval nye’an ete e ne “te ke man” mfa’a ya na, wo ye ke jañ môs éziñ. Ô ne viane nenenen ane éyoñe ja lôt. Amu wo ajaé jibi a ô ne mvam, ajô ete ô ne “élat ja dañe mvaé.” (Becolossien 3:14, Mfefé Nkôñelan) Nde ñhe, élat ése é tii a aval nye’an ete, ja ba’ale môt a ja soo mevak, to’o bi ne bebo mam abé. Bi tame nyoñ éve’ane ya bôte be ne nlu’an.

Yésus Krist a nga ve beta miñye’elane ya Kalate Zambe mi ne mfi asu beluk. A nga jô na: “Fam je aye li’i ésa ba nyia, ba nga be aye tabe nlatan; be aye bo nsône wua bebaane . . . Ajô te, jôm Zambe a maneya lat, môt [a nji yiane] kandé je.” (Matthieu 19:5, 6) Bi ne nyoñe miñye’elane mibaé mi ne mfi va.

“BE AYE BO NSÔNE WUA BEBAANE.” Aluk é ne beta élat a boban e zañe bone be bôt, a nye’an ô ne de ba’ale mfa’a ya mboone mejian, amu mejiane ma bo na, ngal nge ke nnôm a bo “nyôle jia” a môte mfe ba nye be nji bo nlu’an. (1 Becorinthien 6:16; Behébreu 13:4) Mejiane ma bo na ndi é ne zañe beluk é ndaman, a me ne bo na aluk e tyamé. Nge mejô mete ma nambe bongô, jam ete e ne ndeñele be abui, be ne wô’ôtan ve ane be nji nye’e be, be ne ko woñ, nge bo éyôé.

“JÔM ZAMBE A MANEYA LAT.” Aluk é ne fe étyi. Éyoñe beluk ba semé ôsimesan ôte, nalé a volô be na be yemete alu’u dap. Éyoñe minju’u mia kui, be nji jeñe na be tyam aluk. Nye’ane be bili ô ne ngul a wo jaé jibi. Avale nye’an ete de “abuti mam mese,” da dañe meve’ele mese me ne kui, a jeñe na mvo’é a évôvoé bi late nda aluk.

Éyoñe bebiaé ba nye’esan a jeñe na môt ase a jalé miñyiane mi nyô mbok, jam ete e ne bo nya mfii asu mongô ase ya nda bôt. Ngone minga é to jôé na Jessica é nga yene jam ete a jô na: “Pepa ba mema ba nye’esane fo’o, a môt ase a semé nyô mbok. Eyoñe ma yen ane nyia wom a semé ésa wom, e dañe dañ éyoñe ba nyoñe ngap a bia, nalé a bo na me kômbô vu nye.”

Nye’an ô ne fulu ja dañe mefulu mese Zambe a bili. Kalate Zambe a jô jô na: “Zambe a ne nye’an.” (1 Jean 4:8) Nde bia kôme wô’ô amu jé ba loene Yéhôva na, ‘Zambe ya mevak.’ (1 Timothée 1:11) Bia fe bia ye bo mevak éyoñe bia jeñe na bi vu mefulu me Nté wongan: e dañ dañ nye’ane wé. Beéphésien 5:1, 2 a jô na: “Bo’ane bevu be Zambe, ane bon be ne nye’an; a [kelan ôsu a] wulu nye’an été.”