Kalate Zambe a liti bia na, befam ba ba’ale akônda be ne ngab ébaé, ‘bemvendé a bediakon.’ (Bephilippien 1:1) Akônda ése é bili befam ba bo ésaé éte. Ésaé évé bediakone ba bo asu dangan?

Bediakone ba volô nsamba bemvendé. Bediakone be ne bôte be bili ngule mbunan. Bi ne tabe be ndi nlem. Bediakone béziñe be ngenane bendôman, bevo’o ke be ntoo minnôm. Ésaé ba bo ja dañe ke fombô ñye’elan, ja fombô fe bisaé bi mo. Nalé a volô bemvendé na be tu’a bi éyoñe ya ye’ele a ba’ale akônda.

Ba bo ésaé é ne mfi. Mingumba bediakone mi bili na mia nyoñe bôt a ôsesa a ve be bito éyoñe ba zu bisulan. Bevo’o ba futi mezik, ba bevok ba kabe bia bekalate, nge ba’ale moné, a liti bia vôme bia yiane ke kañete. Ba ba’ale Aba Éjôé mfuban. Bemvendé be ne fe be lôme na be ke volô minnôme mi bôt. Bia nye’e a semé bediakone bangan amu ba bo ésaé jap a nlem ôse.​—1 Timothée 3:13.

Ba ve bia mbamba éve’ela. Asu na môt a bo diakon a yiane bi mbamba mefulu. Éyoñe ba ve miñye’elane bisulan, ba yemete mbunane wongan. Mbamba éve’ela ba ve bia nkañete a bo na bi vu be. Mbamba élate be bili a bemvendé a bo na akônda é bo jôme jia e meva’a été. (Beéphésien 4:16) Melu ma zu, be ne fe kui na be fe be bo bemvendé ya akônda.

• Bediakone be ne avale bôt avé?

• Jé ba bo asu na akônda é wulu mvo’é?