Yésus ba beyé’é bé ba suane Bethsaïda. Bôte ba so nye môt a ne ndim, a ye’elane Yésus na a nambe nye asu na a saé nye.

Yésus a bi môt ate wo a ke nye nlame yat. Éyoñ a maneya tui nye mendene mis, Yésus a sili nye na: “Ye wo ayene jôm?” Môt a yalan a jô’ô na: “Me ayene bôt; amu me ayene be ane bilé bi awulu.” (Marc 8:23, 24) Ane Yésus a beté nye mo mis a bo na, a beta yen. Môt ate a nga kôme yen, nde a jô nye na a bulane nda jé, teke beta ke nyiine nlam; môt ate a nga kôme yen.

Mvuse ya valé, Yésus ba beyé’é bé ba ke nord mfa’a ya minlame ya Césarée ya Philippe. Nlam ôte ô ne nkôle yôp. Mvus, be ne ngule ya yene Nkôle Hermon ô to ne lut a neige. Dulu éte da yiane nyoñe melu mebaé.

Éyoñe be ne zen, Yésus a nyoñe mon éyoñ asu na a ke ye’elan étam. É li’iya Yésus ve ngon ébul, nge awôm ôsusua na a wu, a nlem ô tyele nye yôp asu beyé’é bé. Abui ya be be e ndeme tyi’i na da tôñe ki fe nye, bevo’o ba yiane bo fe’e njañan, nge na be tyiliya. Ba yiane sili bebien amu jé a nji kañese na be telé nye njô bôt, nge ki amu jé a nji bo mesimba ma liti teke bisô avale môt a né.

Éyoñe beyé’é bé ba zu koone nye, Yésus a sili na: “Bôt be ajô na Mone môt a ne za?” Ba yalan a jô na: “Bevo’o na, a ne Jean Baptiste; bevo’o na, Élie; a bevo’o na, Jérémie, nge môte wua ya bekulu mejô.” Ôwé, bôte ba buni na Yésus a ne môte wua ya bôte bete ba te wômô miñwuan. Asu na a vaa be ôsimesan ôte nlô, Yésus a sili beyé’é bé na: “Ve mia mi ajô na me ne za?” Pierre a ji’a yalane na: “Ô ne Krist, Mone Zambe, nnye a vee.”​—Matthieu 16:13-16.

Yésus a jô na Pierre a yiane wô’ô mvaé amu na Zambe a te bo na a yemelane de, éyoñ éte a beta jô na: ‘A ma ma jô wo na: Ô ne Pierre, a ako’o te yôp, ma ye lôñ akônda dam, a mimbé ya soñ mia ye bo te dañe je ngu.’ Yésus a liti valé na émien a ye lôñ akônda, a na ja’a Soñ j’aye bo ngule ya ba’ale bôte be n’été nge ba ke ôsu a wulu ba’aba’a a Zambe nté ba nyiñe si va. A ka’ale Pierre na: “Ma ye ve wo bidiba’a ya Éjôé ya yôp.”​—Matthieu 16:18, 19, Mfefé Nkôñelan.

Yésus a nji telé Pierre njôô minlômane mivok, nge jô na nnye a ne mbôka’a ya akônda. Yésus émien nnye a ne Akok, vôm akonda dé da ye lôñeban. (1 Becorinthien 3:11; Beéphésien 2:20) Ve ba zu ve Pierre bidiba’a bila. A ye bi mvome ya yoé nsamba bôte zene ya nyiin Éjôé ya yôp.

Pierre a ye belan édiba’a ôsu môse ya Pentecôte 33 É.J., a liti Bejuif ba jôban, a bôte ya meyoñe mefe be ne Bekristen a mintyi’ibane  metye jame ba yiane bo asu na be bi ényiñ. A ye belane ji baa asu na a yoé Besamaritain ba buni zene ya nyiin Éjôé Zambe. Mvuse ya valé, Pierre a ye belane ji lale mbu 36 É.J., asu na a yoé zen éte asu Begentil, bôte be nji bo mintyi’ibane metye, môt ôsu a to Corneille a nda bôte jé a bemvôé bé.​—Mam Minlôman 2:37, 38; 8:14-17; 10:44-48.

Éyoñe ba laane minlañe mi, minlômane mi Yésus mia wô’ô nleme mintaé éyoñ a kate be na a mbeme zu tôbane minjuk a wu e Jérusalem. Teke kôme wô’ô na Yésus a ye wômô asu ényiñe ya yôp, Pierre a dutu nye fefel a taté na a komekane nye a jô’ô na: “Zambe a kama’ane wo, a Nti! Momo, avale jame te da ye bo te kui be wo!” Ve Yésus a kôñelan a yalane na: “Kôlô’ô! Kele ma mvus, a Satan! Ô ne ma ékolé ôbak, amu avale wo yene mam e nji bo di Zambe, ve di bôt.”​—Matthieu 16:22, 23, Mfefé Nkôñelan.

Éyoñe ji, Yésus a loene jama bôt a minlômane mié a kate be na, da ye ke bo tyi’ibi ya tôñe nye. A jô na: “Nge môt éziñ a kômbô tôñe ma, a taté’é nyum émiene mam, a beke’e [élé jé] a tôñe ma. E môt ase a kômbô nyii ényiñe jé, a ye jañele je; ve nyô ase ki a ye jañele ényiñe jé amu ajô dam a ajô mbamba foé, e nye a ye nyii je.”​—Marc 8:34, 35, Mfefé Nkôñelan.

Ôwé, asu na beyé’é be Yésus be liti na ba yian éto beyé’é éte, ba yiane bo ayo’o nlem a nyume bebiene mam. Yésus a jô na: “Bôte bese môt a wô’ô me ôson a mejô mam vôm bôte ya miaé wu be ne bijabô a mam abé be to, Mone môt a ye wô’ô nye ôson, éyoñ a ye zu étôto’o ya Ésa wé a mbamba beange.” (Marc 8:38) Ôwé, éyoñe Yésus a ye so, “a ye ve bôte bese abim de ayiane mam be nga bo.”​—Matthieu 16:27.