AMU JÉ NALÉ A NE MFI? E belane téléfôn asu nkañete a ne mbamba zene ya “kat mbamba foé.” (Mam 20:24) * Nalé a volô bia na bi kañete môt to’o été jé ja bo na bi bo teke bo ngule ya yen émien a mis.

AVALE BI NE BO DE:

• Kômesa’an. Tobe’e mbamba nlô ajô. Mane’e ta’a mame wo kômbô jô. Ô ne fe kômesane mam wo ye jô asu na ô kate môt amu jé wo loone nye, nge da kui na ô kobô a zene ya interphone. Wo yiane tabe si e tebele a bili bekalate bese wo ye belane be a minsini a yoo e JW Library^® nge ke jw.org^®

• Te ko woñ. Kobô’ avale wo jaé zu wo kobô. Muñu’uk a fô’ôsane mo éyoñe wo kobô fo’o ve ane môte mia nye mia kobô a lôô wo. Te bo awo’on éyoñ nalé a nji bo mfi. Nge mia môte mfe mi ne, nalé aye volô wo abui. Nge mmie nda a sili wo nsili, ba’ala’ane nsili ôte yôp été asu na môte mia nye mia kañete a volô wo jeñ éyalan

• Jeñe’e na ô bôé njaé asu njoman. Nge môt a te nye’e minlañ mienan, ô ne li’i nsili wo ye yalan éyoñe wo ye beta loone nye. Ô ne fe tili nye kalate ô kele nye ve, nge ke na ô lôme nye kalate ya lañ. Ô ne lôme nye bevidéo bangan, nge ke nlô ajô éziñ ya bekalate bangan. Nta’ane mam ya bo njoman wo yiane lu’an a metiñe ya vôm mi to. Éyoñe nalé a yian, kate’e nye mam a ne koone me anjeñe mefoé dangan