Yéhôva a mbeme ngbwe’e a émo ji. Évuse ñyebe jé tyamban, nsamba meyoñ wé wosane bebo bisaé be Zambe, Yéhôva é wôé mbia be bôt bita ya Harmaguédon. Bekristen be ne ôjeja’a ya yen ane bitua bi mam bite bia boban.

E ne été na, bi nji mane yem bone be mam bese be tii a beta étibela’a. Bi nji yem awolo ébien beta étibela’a é taté. Bi nji yem amu jé bijôé bi pôlitik bii tebe ñyebe ngame yat. Bi nji tu’a yem abim éyoñ meyoñ mé wosane bia, nge ke aval mé bo de. A fe na, bia kôme ki yem avale Yéhôva é bo asu na a mane jiane mbia be bôt Harmaguédon.

Ve Bible a kate bia mam mese bia yiane yem asu na bi bo teke ko mam ma zu ôsu woñ. Jame da ya été é ne na, bia nyiñ ‘melu ya asu’ulan.’ (2Tim 3:1) Bia yeme na melu ya bejôô bé wosane ñyebe “mé ji’a man,” asu na nya ñyebee a bo te jañ. (Mt 24:22) Bia yeme na Yéhôva é nyii bebo bisaé bé. (2P 2:9) Bia yeme fe na Môte Yéhôva a nga tobe na a jiane mbia be bôt a nyii bizu’u bi bôt, a ne zôsôô a ngul.​—Nli 19:11, 15, 16.

Teke vaa nge beté, mam ma zu ôsu mé bo na bôt be “ku som amu woñ.” Ve nge bia lañ a bindi minkañete mia liti avale Yéhôva a nga nyii bebo bisaé bé melu mvus, a mam a ka’ale bia asu melu ma zu, bi ne tebe ne bip a ‘bete minlô yôp,’ amu bia yeme na nyiane wongan ô nto bebé.​—Lc 21:26, 28.