Mbôle beta étibela’a a nto bebé, ésaé nkañete jangan ja yiane boban avôl avôl. (Min 24:11, 12, 20) Asu na bi volô bôt, bi ne belane mefebe me njoman asu na be yeme Mejô me Zambe, a dutu be anjeñe mefoé dangan. Afebe njoman é bili code a volô be na be yene vidéo a ne nlô ajô na, Amu jé bia yiane yé’é Kalate Zambe?, a mbañetane ya yeme mam mefe a zene ya ayé’é Kalate Zambe. Bôte béziñe be wô’ô bene bekalate bangan, ve be wô’ô yebe na ba ke anjeñe mefoé. Nde ñhe, bi nji yiane ko woñe ya ve be afebe njoman. Ve bi nji yiane ve me bôte be nji liti na ba nye’e Mejô me Zambe mefebe me njoman.

Éyoñe wo kui môs ôse asu bisaé biôé, ô ne jô môte tyi’ibi na: “Ma kômbô wo ve jôm éziñ. Afebe di da liti wo anjeñe mefoé é ne volô wo na, ô yem abui mam e zezé; da liti fe wo bevidéo a da yalan abui minsili mife.” (Jean 4:7) Mbôle mefebe me mbañete me ne tyôtyoé, bi ne nyoñe abim éziñ éyoñe bia kui, asu na bi ve me bôte bia tôbane be éyoñ ése.