Nge mongô nnye a zu bia yooé mbé, bia yiane nye sili bebiaé bé. Nalé a liti na bia semen éto bebiaé be bili. (Min 6:20) Nge mongô a bañete bia na bi nyiin, bi nji yiane kañese. Nge bebiaé bé be nji bo valé, bia yiane beta lôt éyoñ éfe.

Ja’a mongô a nto ôbe nya môtô, éko éziñ a ne zañe mimbu 15 akekui 19, é ne mvo’é na bi sili bebiaé bé. Nge be nji bo valé, bi ne nye sili nge bebiaé bé ba kañese na a lañe bekalate a yi. Nge a yalane na ôwé, bi ne nye ve nsoé kalate, nge ke liti nye aval a ne ke e jw.org.

Éyoñe bia zu bo mongô a nga liti na a nye’e mejô me Zambe njoman, bia yiane jeñe na bi yene bebiaé bé. Nalé a ye ve bia fane ya timine be amu jé bia jome mone wop, a fane ya liti be mbamba melebe Kalate Zambe a ve menda me bôt. (Bs 119:86, 138) Éyoñe bia liti bebiaé ésemé, nalé a bo na be bo teke ve ésaé nkañete jangan bijô, nalé a ve fe bia fane ya kañete nda bôt ése.—1P 2:12.