Kalate Zambe a nga jô na Satan a ye tibili bia, a jeñe na, a te’elan ésaé nkañete jangan. (Jn 15:20; Nli 12:17) Aval avé bi ne volô Bekristene bevok ba tôban étibela’a mesi map? Bi ne ye’elan asu dap. “Meye’elane ya zôsôa môt me adañ ngu mfa’a ya mam me abo.”—Jc 5:16.

Bi ne ye’elan asu jé? Bi ne sili Yéhôva na, a ve bobejañ a besista ngule nlem, a volô be na be bo te ko woñ. (És 41:10-13) Bi ne fe ye’elan asu na, bôte ya éjôé be bi mbamba nleme mfa’a ya avale ba yen ésaé nkañete bia bo, “nde bi aye wulu ényiñ é ne te éndeñela’a a é ne évôvoé.”—1Tim 2:1, 2.

Éyoñe Paul ba Pierre be nga tôban étibela’a, Bekristene ya ntete mimbu ôsu be nga ye’elan ajô dap, be tote biyôlé biap. (Mam 12:5; Bero 15:30, 31) To’o bi nji yeme biyôlé Bekristene bese ba tôban étibela’a den, bi ne tote biyôlé mekônda map nge mesi map, nge minlam miap.