Amu jé bia nye’e beta bitôkan biangan ya mbu? Aval e mbe e boba’an ayoñ Israël, dene fe beta bitôkan bi wô’ô ve bia fane ya kañe Yéhôva fufulu a mintet nge betoyini be bobejañ. Bia bu’ubane mbamba miñye’elan bi wô’ô nyoñe bitôkane bite. Bia volô bia na bi yemete élate jangan a Yéhôva. Bia nye’e fe mbamba éyoñ bi wô’ô lôt a bemvôé bangan a nda bôte jangan. Mbôle bia nye’e beta bitôkane biangan bite nya abuii, bi nji kômbô bu’i to’o ve môse wua ya mimmôse milal mite.

Éyoñ bia bi fane ya tôkane vôme wua, bi nji jeñe ve mvaé jangan, ve bia jeñe mezene ya liti bôte bevo’o nye’an. (Beg 6:10; Beh 10:24, 25) Éyoñ bia yoé mojañ nge sita mbé, nge ke naane ve abime bitô da sili bia, bia liti na bia nyoñe ngap a bôte bevok. (Beph 2:3, 4) Beta bitôkan bia ve bia fane ya bi mimfefé bemvôé. Ôsusua na étôkan ja taté, e zañe môs, a mame ngôé éyoñ étôkan é maneya, bi ne jeñe na bi laan a môte bi nji yem. (2Bec 6:13) Memvôé bia te bôndé a zene ya beta étôkan me ne libi nnôm éto! Jam da dañ e ne na, éyoñ bôte bia bañete beta bitôkan ba yen ane bia nye’esan, be ne nyoñe ntyi’an ya zu kañe Yéhôva.​—Jn 13:35.

YENE’E VIDÉO A NE NLÔ AJÔ NA, “NYE’AN Ô VO’O MAN”! BETA BITÔKAN BI NE NGUM AVAL, MVUSE YA VALÉ, YALA’ANE MINSILI MI:

• Aval avé bobejañ be nga liti nye’an asu beyeñ be nga so beta bitôkane bi ne ngum avale ya mbu 2019?

• Amu jé nye’an a beta élat bi ne zañe bebo bisaé be Yéhôva bi ne fo’o jame ya kute kôp?

• Mam mevé bibu’a ya Tin ékôan bi nga ngôné a lat a nye’an ô ne zañe bebo bisaé be Yéhôva?

• Aval avé nye’an wo late bobejañ Allemagne a e Corée du Sud?

• Ntyi’an ôvé bia yiane nyoñ?