Tame bo ve ane wo nyiñe Galilée éyoñe Yésus a mbe si va. Wo ke Jérusalem asu Abô’ô Bibem. Tison é ne njalan a bôte ba so ôyabe na, ba zu kañe Zambe. Wo kômbô ve Yéhôva metuna’a. Ô be’eya ntômba wôé, ô tatéya dulu zañe nkunda bôt, wo jeñe na ô ke temple. Akui wo kui temple, éyoñ éte wo koone na, a ne njalan a bôte ba kômbô bo mimvean, ô nga yange. Éyoñe ya ve beprêtre ntômba wôé é kuiya. Éyoñ éte nje wo simesane na, mia monyoñ éziñ mi bili ajô, monyoñ ate a ne fe tison été. Yésus a kate wo jam wo yiane bo. (Lañe’e Matthieu 5:24.) Aval avé mia monyoñ mi ne tôñe melebe me Yésus? Jé wo yiane bo? Tobek éyalane ja yian, futi’i ndem.

WO YIANE . . .

• ke laan a monyoñ fo’o ve nge wo simesane na, ôlun a wô’ô wo wo yian

• jeñe na ô komekane nye amu a ji’a wôk ôlun, nge ke jô na mia bese mia ku mfa’ éziñ

• nyoñ éyoñe ya vô’ôlô nye nté ôse a kobô, to’o ô nji kôme wô’ô jôm a jô; ô sili nye njaman amu a wô’ô mintaé nlem, nge ke amu jam wo te bo, da te balé nye, ja’a ô nji vañe bo de

MONYOÑ A YIANE . . .

• ke a kañete ajô ete akônda été asu ya na, bobejañe bevo’o be su’u nye

• vini wo, nge ke la’ase mone jam ase ô nga bo nye, a yemete na ô mem

• yeme na, wo te sili womiene si, a na ô ne ayo’o nlem, jôm éte nje wo te zu yene nye, a jamé nye a nlem ôse

E ne été na, den, bi nji beta bo metuna’a betit, ve aval avé Yésus a nga ye’ele bia na, ékaña’a bia ve Yéhôva é tii a mvo’é é ne zañe bia be bobejañ?