Bibubua bi nto angôndô ya abui melu ma. Éyoñ ébubua ja kui vôm éziñ, da sili na be bo ngume nta’ane mam asu na mam me wulu mvo’é. Jôm éte nje Tin ékôan é nga telé ngum wofis asu bibubua bebéthel ya si se.

Éyoñ bobejañ ya wofis ôte ba wô’ô na ébubua ja te kui vôm éziñ, été été, ba loone bemvendé ya wôé asu na be yem avale be ne volô bobejañ a besita. Nge ébubua éte ja kate bobejañe ya wôé, Béthel a lôme mingum mi bobejañ asu na be ke volô be. Bobejañ bete be ne kuse biôm bia sili a ve bôt ba te tôban ébubua, be ne fe yi na bôte béziñ be zu su’u be, nge ke na be soo biôm bi ne jemban.

Éyoñ mam ma bobane nalé, bobejañ ba wu ki ésaé zezé, ba sa’ale jo’ojo’o a ne kui éyoñ môt ase a tyi’i na a ke volô avale dé. Nalé a volô fe na be yeme belane moné a mimveane mife bôte ba bo.

Bobejañe ya Béthel mbe ba kat abim moné da sili a abime bôt é ne volô vôm ébubua ja te kui. Be ne fe sili bijôé ya wôé mvolan asu na ésaé é ke be avôl. Bia ye’elane mia na mi bo teke tôkane moné a biôm bife, a lôme bie bobejañ ba te tôban ébubua, nge kee bie wôé, nge Béthel a nji jô na mi bo de.

E ne été na bia nye’e bobejañ angôndô, a na bia kômbô su’u be éyoñe ba tôbane bibubua. (Beh 13:16) Nde aval avé bi ne volô be? Jam da dañe mfi é ne na bi ye’elan asu dap a asu bobejañ ba volô be. Moné bia futi nkop asu ésaé nkañete a volô fe bobejañ ba tôbane bibubua. Bobejañe ya Béthel mbe ba kôme yeme vôm moné ate a ne dañe bo mfi. Nge bi bili nkômbane ya ke volô vôm ébubua ja te kui, bi ne jalé DC-50.

YENE’E VIDÉO A NE NLÔ AJÔ NA NDÔNE MENDIM JA NDAMANE BÔTE BIÔM BRÉSIL, MVUSE YA VALÉ YALA’ANE NSILI WU:

Jé ja nambe wo éyoñ wo yen avale Bengaa be Yéhôva be nga su’u bôt mvuse ndône mendim é nga bobane Brésil mbu 2020?