Éyoñe Paul a nga tili Tite kalate a ngule ya mbamba nsisim, a nga jô na befam be ngenane bisoé, to’o Tite émien, ba yiane ve ngule ya bo “éve’ela’a ya mbamba mimboane mi mam.” (Tt 2:6, 7) A beta jô kabetôlô ate wuwua na, Yéhôva a nga tune bebo bisaé bé asu ya na, be bo ngule ya “bo mam me ne mvaé.” (Tt 2:14) Jame da ya été e ne ésaé ya kañete a ye’ele bôt foé ya Éjôé Zambe. Nge ô ne ésoé, ye ô ne fo’o belane ngule jôé na ô bo nkpwa’a mefane ya étun éyoñ, nge ke nkpwa’a mefane ya éyoñ ése?​—Min 20:29.

Nge wo kômbô bo nkpwa’a mefan, bo’o mbamba nta’ane mam asu ya na ô tôé nsôñan ôte. (Lc 14:28-30) Wo yiane taté sili womiene na, ‘Aval avé ma ye toñe mamien nté ma bo ésaé nkpwa’a mefan? Jé ma ye bo asu ya na me jalé abime mewolo nkpwa’a mefan a yiane ve?’ Futi’i mame mete meye’elane môé. (Bs 37:5) La’an a bebiaé bôé a bobejañe be boya ésaé éte abui mimbu. Bo’o mame mese ma yiane mfa’a ya tôé nsôñane wôé. Teke vaa nge beté, Yéhôva a ye botane ngul ése wo ve asu ésaé jé!

YENE’E VIDÉO BISOÉ BIA VE YÉHÔVA DUMA, MVUSE YA VALÉ, YALA’ANE MINSILI MI:

• Minju’u mivé abui bobejañ da tôbane mie mfa’a ya bo bekpwa’a mefan, a aval avé ba dañe mie?

• Aval avé bebiaé be ne volô bone bap na be bo bekpwa’a mefane ya éyoñ ése?

• Amu jé e ne mfi ya bi nta’ane mam asu ésaé nkañete?

• Aval avé bobejañ be ne ve bekpwa’a mefane ngule nyul a su’u be?

• Bibotane bivé bekpwa’a mefane ba bu’ubane bie?