AMU JÉ NALÉ A NE MFI? Ayé’é étam da volô bia na, bi “bo ngule ya yem ndam a nté a ôyap yôp a édok” ya benya mejôô. (Beép 3:18) Da volô fe bia na bi ke ôsu a bo zôsôô, a te bijô nté bia nyiñe mbia émo nyi, a na bi ‘bi mejô ya ényiñ a mo mebaé.’ (Beph 2:15, 16) Ayé’é étam da ve bia fane ya tobe miñye’elane mi ne asu mfi wongane biabebien. Nde aval avé bi ne kôme belan éyoñ bia lôte na bia lañ a yé’é Bible?

AVALE BI NE BO DE:

• Futi’i ndeme bifuse biziñ ya Bible wo belane nye éyoñe wo yé’é, tili’i mame wo kômbô ba’ale été

• Éyoñ wo lañe Bible sili’i womiene na: ‘Za? Jé? Éyoñ évé? Vôme mbé? Amu jé? Aval avé?’

• Kôme’e yeme jam da boban. Bela’ane bikpwelé bia belane bie asu ayé’é, ô ne jeñe nlô ajô éziñ été nge ke éfuse ya Bible

• Bindi’i mam wo lañ asu na ô tu’a wôk miñye’elan mia fombô wo

• Tôñe’e mame wo yé’é môs ane môs.​—Lc 6:47, 48

YENE’E VIDÉO KELE’ ÔSU A ‘BI MEJÔ Y’ÉNYIÑ A MO MEBAÉ’: A ZENE YA MBAMBA AYÉ’É ÉTAM, MVUSE YA VALÉ YALA’ANE MINSILI MI:

• Aval avé bôt béziñ ba yen ayé’é étam?

• Amu jé bia yiane taté ye’elan ôsusua na bia bo ayé’é étame dangan?

• Jé é ne volô bia na bi tu’a wô’ô éfus éziñe ya Bible?

• Avale mendem avé bi ne futi Bible wongan?

• Amu jé e ne mfi ya bindi éyoñ wo yé’é Bible?

• Jé bia yiane bo éyoñe bia yé’é jam éziñ?