Éyoñe bia bo minjoman nge ke meyé’é, da sili na bi kôme volô bôte ba vô’ôlô bia na be wô’ô mintene miñye’elan. A zene ya bive’an, bi ne nambe be minlem a volô be na be ba’ale mam ba yé’é.

Éyoñe wo kômesane njoman nge ke ayé’é, sili’i womiene na: ‘Mintene miñye’elane mi ne mivé? Bive’ane bivé me ne belane bie asu na me ngôné mie?’ Mvuse ya valé, jeñe’e bive’ane bi ne tyi’ibi ya wôk. (Mt 5:14-16; Mc 2:21; Lc 14:7-11) Bive’ane bite bia yiane lu’an a été bôte bé vô’ôlô wo. (Lc 5:2-11; Jn 4:7-15) Éyoñe môt a ve wo akiba amu a kôme wô’ô mame wo ye’ele nye, wo bi abui mevak.

YENE’E VIDÉO A NE NLÔ AJÔ NA, YENE’E AVA’A YA BO BÔTE BEYÉ’É​—BO’O ATYEÑ ÉSAÉ NKAÑETE​—BELA’ANE BIVE’AN, MVUSE YA VALÉ YALA’ANE MINSILI MI:

• Amu jé da sili na ñyé’é Bible a kôme wô’ô bifuse bia lañe nye?

• Éve’an évé Neeta a te belane je asu na a timine Beromain 5:12?

• Éyoñe bia yeme belane bive’an, nalé a ne bo na bôte ba vô’ôlô bia be bo aya?

• Amu jé bia yiane belane bevidéo a bikpwelé bife ékôane Yéhôva ja  kuli éyoñ bi ne ésaé nkañete?