Beyé’é Bible ba yiane bi ngule mbunan nge ba kômbô ve Zambe nlem avak. (Beh 11:6) Bi ne volô be mfa’a ôte éyoñ bia belane kalate Bu’uban ényiñ nnôm éto! Kalate ate a bili angôndô ya abeñ bifus, mbamba b’asimesan, minsili mi ne édok, bevidéo ba nambe nlem, a étua abeñe befôtô. Éyoñ bia volô ñyé’é Bible na a bi mefulu Yéhôva a nye’e, a na a bi mbamba élat a Zambe, a ne ve ane bia lôñ a bikpwelé bi vo’o dik, ja’a nduan été ja yôñ aya.​—1Bec 3:12-15.

Bôte béziñ ba kate wôk aval avé bi ne bo bemvôé be Zambe a too ke na bia yene ke nye. Jôm ete nje bia yiane volô be na be kôme yem mbamba mefulu me Yéhôva a tabe nye mebun.

YENE’E VIDÉO A NE NLÔ AJÔ NA BO’O NA ÑYÉ’É BIBLE A KABETANE YÉHÔVA ÉYOÑ WO BELANE “BU’UBAN ÉNYIÑ NNÔM ÉTO!” MVUSE YA VALÉ, YALA’ANE MINSILI MI:

• Jé ja liti na sita a te kôme kômesan asu ayé’é?

• Aval avé a te belane mbamba minsili mife asu na a yem avale ñyé’é Bible a yene mejô ya kalate Ésaïe 41:10, 13?

• Vidéo a bifuse ya Bible bia te bo na ñyé’é Bible a wô’ôtan aya?

Abui bôt da kôme ke wôk ñye’elan ô tii a ntañ, nge ke na be nji tu’a yene wô ane dase Yéhôva. (Beg 2:20) Bia yiane volô be na be buni ntañe Yésus a nga ya’an.

YENE’E VIDÉO A NE NLÔ AJÔ NA BO’O NA ÑYÉ’É BIBLE A KABETANE YÉSUS ÉYOÑ WO BELANE “BU’UBAN ÉNYIÑ NNÔM ÉTO!” MVUSE YA VALÉ, YALA’ANE MINSILI MI:

• Jé ja liti na mojañ a te kôme kômesan ayé’é?

• Aval avé a te belan ngab é ne na “Mam mefe me ne volô wo” asu na a volô ñyé’é Bible wé?

• Amu jé meye’elan me ne nya mfii asu ñyé’é Bible?