Bii yeme belane ngule jangan éyoñe bi bili minsôñane ya nsisim. (1Bec 9:26) Minsôñane mia volô bia na bi tu’a yeme belane mon éyoñ a li’iya ôsusua na émo ji ja jañ. (Beép 5:15, 16) Nga e ne bo mvo’é na mi fas avale minsôñane mi ne tôé mbu wo zu wu ayé’é ya nda bôte jenan? Minlô mejô ya kalate bisulane nyi mia ngôné abui minsôñane môt ase ya be bia a ne jeñe na a tôé; kôme’e ye’elane Yéhôva éyoñ wé lañe mie.​—Jc 1:5.

Mi ne fas aval avé to’o ve môte wua ya nda bôte jenan a ne nyoñ ésaé nkpwa’a mefan ya éyoñ ése. Nge wo simesane na ô vo’o bo abim mewolo da sili, laan a bekpwa’an mefan be nga tebe aval été éte. (Min 15:22) Éko éziñ ayé’é ya nda bôte jenan, mi ne sili sili nkpwa’a mefan éziñ aval a nga bo. Mvuse ya valé bo’oné nta’ane mam. Nge ô tameya bo nkpwa’a mefan melu mvus, yene’ aval ô ne beta nyoñ ésaé éte éyoñe ji.

Ye môt éziñ ya nda bôt jenan a ne nyoñ ésaé nkpwa’a mefan ya étun éyoñ ja’a ngone jia nge ke bengon abui? To’o ô nji bi abui ngul, wo fe ô ne bo nkpwa’a mefan ya étun éyoñ nge wo nyoñ fo’o ve mon éyoñ môs ôse asu nkañete. Nge wo ki, ô nji bi abui éyoñ ya kañete zañe sondô amu ésaé jôé, nge ke amu na ô ne mongô sikôlô, éko éziñ ô ne tobe ngone wo ke mewo’on, nge ke nyi é bili besondô betan. Ô ne tili môse wo kômbô taté ésaé nkpwa’a mefan ya étun éyoñ calendrier wôé.​—Min 21:5.

YENE’E VIDÉO A NE NLÔ AJÔ NA BO’ANÉ AYO’O NLEM . . . BEKPWA’A MEFAN, MVUSE YA VALÉ YALA’ANE NSILI WU:

• Nlañe Sita Aamand wo ye’ele bia jé a lat a nye’ane Yéhôva a nye’e bôte ba ve ngule ya bo bekpwa’a mefan?