1 Timothée 3:1-16
3 Ajô di é ne été: Nge môt a kômbô bo ntebele, a yi mbamba jam.
2 Da sili ñhe na ntebele a bo te bijô, a too nnôme ya minga wua, a yeme’e jôé mame mese ya ényiñe jé, a bili mbamba ñyenane mam,* a too ngômôtô, anyep, a yeme’e fe ye’ele,
3 a nji yiane bo nso’o meyok, évô,* ve a kañese ôsimesane bôte bevok, teke nye’e môman, nge nye’e moné,
4 môt a yeme tebele* nda bôte jé, a bili bone ba sili bebien éjôé si a éjijin ése
5 (amu nge môt a nji yeme wulu* nda bôte jé, aval avé a ne nyoñe ngap a ékôane Zambe?),*
6 a nji yiane bo môt a ndeme bo kristen, amu mebune me za bete nye nlem a bi ntyi’ane mejô ane wu Diable.
7 Nde fe, bôte ya nseñe ba yiane bo’olô na a ne mbamba môt,* ndemben a ye bo te bijô* a bo te ku ôlame Diable.
8 Bevolô* ya ékôane bekristene fe ba yiane bo éjijin, teke bi ayem abaé,* be nji yiane vibane meyok, be nji yiane bo bôte ba nye’e moné be jeñe’e ve mfi wop bebien,
9 be ba’ale’e nsolane jam ô ne étyi ya mbunan a mone môte ya nlem a ne mfuban.
10 Nde fe, bôte bete, be taté’é ve’ele* ve be ésaé a yen ane ba bo je, mvuse ya valé, be bo’o bevolô nge be ne te bijô.
11 Da sili fe na binga be bo éjijin, be bo teke bôte bôte mejô, be yeme’e jôé mame mese ya binyiñe biap, be too zôsô mame mese.
12 Mvolô ya ékôane bekristen a yiane bo nnôme ya minga wua, a wulu’u bone bé a nda bôte jé avale da yian.
13 Amu bôte ba bo ésaé jap mbamba mboone ba bi mbamba éyôlé, a be bili fili ya kobô teke woñ ajô mbunan ô ne be Krist Yésus.
14 Ma tili wo mame ma, akusa bo ma buni na me mbeme so vôm ô ne,
15 ve nge me bo teke ji’a so, ô yem avale wo yiane bo mame nda Zambe, nje é ne ékôane vevea Zambe, akôn a ésuka’a ya benya mejôô.
16 E nya ajôô, bia yiane fo’o yemelane na, nsolane jame ya nye’ane Zambe ô ne fo’o anen: ‘A* nga yené minsôn, a nga bi mekabe na a ne zôsô nsisim été, a nga yené be beéngele, a nga kañetebane meyoñ, si nyu é nga buni nye, a nga beteban a duma.’
Notes
^ Nge ke, “yeme tebe été bôt.”
^ Nge ke, “môt a bibi.”
^ Nge ke, “wulu.”
^ Nge ke, “tebele.”
^ Nge ke, “akônda Zambe; kirké Zambe.”
^ Nge ke, “a bili mbamba éyôlé.”
^ Nge ke, “te mekua.”
^ Nge ke, “Bediakon.”
^ Nge ke, “te bi nkobô medu’an.”
^ Nge ke, “fase be a.”
^ A ne Yésus.
