1 Becorinthien 1:1-31
1 Ma Paul, nyu a nga loobane na a bo nlômane Krist Yésus, avale nkômbane Zambe ô ne, a Sosthène monyañe wongan,
2 ma tili ékôane* Zambe é ne Corinthe, ba be ne mimfufup e Krist Yésus été, ba be nga loobane na be bo mimfufup, a ba bese be ne vôm ase ba loon éyôlé Tate wongane Yésus Krist a buni nye, éñwoba a éñwongan:
3 Ngo’o nge beta mvam a mvo’é bia tabe be mia, bi so’o be Zambe Ésa wongan a be Tate Yésus Krist.
4 Ma ve Zambe wom akiba éyoñ ése ajô denan, amu beta mvame Zambe a nga vebane be mia a zene ya Krist Yésus.
5 Amu mfa’a ya biôme bise, mi nga bi abui mame mfa’a ya ngul ése ya kobô a mfa’a ya ñyeman ôse be nye,
6 fo’o ve avale nkañete ya ajô Krist ô nga yeme be mia.
7 Ndembene mi ne bo te jembane jôm éziñ, nté mia yange a nlem ôse na Tate wongane Yésus Krist a yené.
8 A ye fe wônô mia akekui memane, ndembene môt éziñ a ne bo te ve mia mekua môse Tate wongane Yésus Krist.
9 Zambe a tôé mejô mé a zene jé, nje mi nga loobane na mi bo jôme jia* a Mone wé, Yésus Krist Tate wongan.
10 Éyoñe ji a bobejañ, ma ye’elane mia a zene ya jôé Tate wongane Yésus Krist, na mi bo tyiñe jia, a na nkandane mengam ô bo te bo ézezañe jenan, ve na mi bo fo’o ve nleme wua a ôsimesane wua, a mi bi avale mfasane da.
11 Amu, a bobejañ, bôte béziñe ya nda Chloé be nga kate ma mame méziñe me fombô’ô mia, na zô’é é ne zañe jenan.
12 Jame ma jô nde di, môt ase ya be mia a jô na: “Ma me ne môte Paul,” “Ve ma, me ne môt Apollos,” “Ve ma me ne môte Céphas,”* “Ve ma me ne môte Krist.”
13 Ye Krist a ntoo mengame mengam? Paul a nji tyebe élé asu denan, nga? Nge ke na, ye mi nga dubane jôé Paul?
14 Ma ve Zambe akiba amu me nji du môt éziñe ya be mia, nge ô vaa ve Crispus a Gaïus,
15 ndembene môt éziñ a ne bo te jô na mi nga duban éyôlé jam.
16 Ôwé, me nga du fe bôte ya nda Stéphanas. Ve mfa’a ya ba bevok, me nji yem, nge me nga du môte mfe éziñ.
17 Amu Krist a nji lôme ma na me du bôt, ve na me kañete mbamba foé; sa ke a atyeñe nkobô* ndemben élé mintaé* Krist é ne bo te bo jôm é ne zezé.
18 Amu nkobô ya élé mintaé* ô ne akute jame mfa’a ba ba ke njañan, ve mfa’a bia bia nyiiban, ô ne ngule Zambe.
19 Amu é ne ntilane na: “Ma ye bo fe’e ya mimfefe’e na é jañ, a atyeñe ya bôte be ne mintyetyeñ, ma ye wua de fé.”*
20 Nne mfefek ô ne vé? Nne scribe* a ne vé? Nne môt a sañetane mame ya émo* ji a ne vé? Ye Zambe a nji bo na fe’e ya émo ji, é bo jôm é ne momo?
21 Amu, mbôle si nyu é nga belane fe’e jé é nji kui na é yeme Zambe, ane Zambe a nga yene mvaé ya belane fe’e jé, asu na akute ya jame ba kañete é nyii ba ba buni.
22 Amu, bejuif ba jeñe mesimba a begrec ba jeñe fek;
23 ve bia, bia kañete na Krist a nga wu élé mintaé. Mfa’a bejuif, a ne jame da kolé be ôbak, ve mfa’a bôte ya meyoñ, a ne akute jam.
24 Ve, asu bôte be nga looban, bejuif a begrec bebaane, Krist a ne ngule Zambe a fe’e Zambe.
25 Amu jôm é ne akut é so’o be Zambe, é ne fek abui a dañe bôt, a jôm é ne nte’an é so’o be Zambe, é ne ngul abui a dañe bôt.
26 Amu, a bobejañ, mia kôme yene na, éyoñe Zambe a nga loone mia, abui mimfefe’e mi bôt é nji be nsamba wônan, nge mingungule mi bôt, nge bôte be nga bialé mimfañe menda me bôt.*
27 Ve Zambe a nga tobe biôme bi ne mekute ya émo, na mimfefe’e mi wôk ôson, a Zambe a nga tobe biôme ya émo bi ne nte’an, na biôme bi ne ngule bi wôk ôson;
28 a Zambe a nga tobe biôme ya émo ji bi ne zezé a biôme ba biasé, bi bi nji bo a bi bi ne na bi bo momo,
29 mfa’a ya na môt* éziñ a bo te bo éngeleze’e mise me Zambe.
30 Ve a ne amu nye, nde bi ne jôme jia a Krist Yésus, nnye a nga bo fe’e ja so be Zambe a fe zôsô a mfuban a éto fili a zene ya ntañ,
31 asu na é bo fo’o ve aval é ne ntilane na: “Nyu a bo éngelezek, a bo’o je be Yéhôva.”*
Notes
^ Nge ke, “akônda; kirké.”
^ Nge ke, “benyoñe ngap.”
^ Nnye fe ba loone na Pierre.
^ Nkobô Grec, “fe’e ya nkobô.”
^ Lañe’e Atinane bifia.
^ Lañe’e Atinane bifia.
^ Nge ke, “fefel.”
^ A ne beta ñyeme Metiñe me Moïse.
^ Lañe’e Atinane bifia, “Émo.”
^ Nge ke, “beta menda me bôt.”
^ Nkobô Grec, “nsôn.”
^ Lañe’e Atinane bifia.
