1 Bethessalonicien 1:1-10
1 Ma Paul, nsamba a Sylvain* a Timothée, ma tili bekristene ya ékôane bekristene* ya Thessalonique kalate, mbe ba wulu ba’aba’a a Zambe Ésa ba Tate Yésus Krist:
Beta mvame Zambe a tabe’e be mia a mvo’é.
2 Éyoñ ése bia ye’elane Zambe ajô denane mia bese, bia ve nye akiba,
3 amu, mise me Tate, bi vo’o vuan ésaé mi nga bo amu mia buni Zambe, ngul ése mi nga ve amu mia nye’e nye, a avale mi nga bo mbane ya jibi minjuk, amu mi too ndi a Tate Yésus Krist.
4 A bobejañe Zambe a nye’e, bia kôme yeme na Zambe a nga tobe mia,
5 amu mbamba foé bia kañete, a nji so be mia a mejô étam, ve a ngul, a mfufube nsisim. Nde fe miabebiene mia yem avale bi mbe bi too ndi na mejô bi mbe bi kate mia me mbe fo’o été. Miabebiene mia kôme fe yeme kane bôte bi mbe zañe jenan amu mia.
6 Ane mi nga taté na mia vu bia, mi nga vu fe Tate, amu mi nga kañese benya mejôô a meva’a mfufube nsisim a ve, akusa bo aval étibila’a ése mia tôbane de,
7 mi nga ve bekristene bese ya Macédoine, a ba bese ya Achaïe mbamba éve’ela ya tôñ.
8 Nya ajôô a ne na, a zene ya ésaé nkañete jenan, foé Yéhôva* é nji katebane fo’o ve Macédoine ba Achaïe, ve vôm ase, bôte ba kañete ajô ya mbunane wônan, aval é ne na, bi nji beta bi jam afe ya jô.
9 Amu, bôte bete bebiene ba ke ôsu a kañete éyoñ ôsu bia be mia bi nga tôban, a aval avé mi nga kôñelan a ke be Zambe, a lume bengulemelane benane mvuse na mi bo nya vevea Zambe ésaé ane alo.
10 Nde fe, mia yange Yésus, Mone wé a ne yôp été, nnye a nga wômô miñwuan a zu kôté bia ayaa Zambe da zu.
