1 Bethessalonicien 3:1-13
3 Amu bi nji be ngule ya beta yange mefoé ma so be mia, nde bi nga simesane na, bia ye jibi li’i étam Athènes;
2 a lôme Timothée monyañe wongan, mbo ésaé Zambe* asu mbamba foé na, a zu ve mia ngule nyul, a wônô mbunane wônan,
3 na, minju’u bia tôbane mie mi bo teke te’e môt éziñ. Amu miabebiene mia kôme yeme na, bi vo’o sa’ale avale minjuk éte.
4 Amu éyoñe bi mbe a mia, bi nga jaé kate mia na, mia ye tôban étibila’a. Avale miabebiene mia yeme na é nga bobane nalé.
5 Jôme te nje, amu me nji be ke ôsu a yange mefoé ma so be mia, me nga lôme môte be mia na a zu fase nge mia ke ôsu a yeme mbunan été. Éko éziñe na, a zen éziñ, Mve’ele bôt a nga ve’ele mia, a ésaé bi nga bo be mia é za bo teke mfi.
6 Ve Timothée a ndeme suan a so’o be mia, a te soo bia mbamba mefoé, a te kate bia ajô ya nye’ane wônan, a na, mia ke ôsu a wulu ba’aba’a a Zambe, a jô fe na mia ke ôsu a simesane bia kom ése, a na, mi ne ôjeja’a ya yene bia avale bia fe bi ne ôjeja’a ya yene mia.
7 Amu ajô éte, a bobejañ, éyoñe bi nga wô’ô mefoé ma so be mia, na mia ke ôsu a wulu ba’aba’a a Zambe, akusa bo minju’u miangan* a étibila’a bia tôbane je, minleme mi nga bômbô bia si.
8 Amu bia wô’ôtan ve ane bia beta nyiñ* éyoñe bia wô’ô na mia kabetane Tate.
9 Nde aval avé bi ne liti na bia ve Zambe akiba, amu beta meva’a bia wô’ô mise me Zambe wongan ajô denan?
10 Bia bo meye’elane me nja’an abime bi ne ngule ya bo alu ba môse na, bi bo ngule ya beta yenan,* a kô’ôlane mame ma jembane mbunane wônan.
11 Zambe Ésa émiene ba Tate Yésus be yoé bia zene ya zu yene mia.
12 Nde fe, Tate a bo’o na nye’ane mia nye’esan ô yaé, wua a nye’e nyu mbok, yaa nye’ane wônan ô fuluku’u, aval ane nye’ane bia nye’e mia wo fuluku,
13 asu na minleme mienane mi yeme ne zeñ, teke bijô a mfubane mise me Zambe Ésa wongan éyoñe Tate Yésus a ye bo a ntoo valé* a mintobane mié.
Notes
^ Be ne fe jô na, “ébe mbo ésaé Zambe.”
^ Nkobô Grec, “mame ma jembane bia.”
^ Nkobô Grec, “bia nyiñ.”
^ Nkobô Grec, “e yene mesu menan.”
^ Éfia Grec, “parousia.” Lañe’e Atinane bifia.
