1 Bethessalonicien 4:1-18
4 A bobejañ a bekal, ényiñe mia nyiñe ja ve Zambe nleme mvaé, avale bi nga ye’ele mia, ve éyoñe ji, e jôé Tate Yésus, bia ye’elane mia a jô mia na mi ke ôsu a bo nalé ngumba ngumba.
2 Amu mia yeme miñye’elane* bi nga ve mia a zene ya be Tate Yésus.
3 Amu nkômbane Zambe ô ne na, mi bo mfuban, a tyi mvite mame ya bisôk.*
4 Môt ase ya be mia a yiane yeme jôé nyule* jé, asu na é tabe étyi a éjijin,
5 mi bo te bo ane bôte ya si nyu, mbe be ne te yeme Zambe amu ba kate jôé bebien a lat a mame ya bisôk a be ne teke jaé môs éziñ.
6 Môt éziñ a nji yiane dañe minné mfa’a ôte, a du’u mbuni mbok,* amu Yéhôva* a yaa kane mboone mam éte. Avale bi nga taté kate mia, bia beta fe mia kôme ba’alane de.
7 Amu Zambe a nga loone mia, sa ke asu nyé mboone mam, ve asu mame me ne mfuban.*
8 Nde môt ase a biasé minjôane mi, a nji biasé môt, a biasé Zambe, nyu a ve mia mfufube nsisime wé.
9 Ve mfa’a ya nye’an bobenjañ, é nji sili na bi beta tili mia jam éziñe mfa’a ôte, amu Zambe a maneya ye’ele mia na mia yiane nye’esan.
10 É ne été na, mia nye’e fo’o bobejañe bese ya Macédoine ase, ve a bobejañ, bia beta ye’elane mia na mi dañe bo de ngumba ngumba.
11 Avale bi nga ye’ele mia, va’ané ngule ya nyiñe mvo’é a bôte bese, te mia futi menyu éza mam, mi yeme fe saé a mo menan,
12 ndembene mi bi mbamba ntaban a dutu ésemé be bôte ya nseñ a mi bo te jembane jôm éziñ.
13 Bi nji yi na mi bo teke yeme benya mejôô* a lat a bôte be maneya wu, asu na mi bo teke bili ôlune nlem* aval ane bôte be nji bi ndi nlem.
14 Amu nge bia buni na Yésus a nga wu, a beta wômô miñwuan, bia ye fe buni na Zambe a ye ve bôte be nga wu be wulu’u ba’aba’a a Yésus ényiñ, na be tabe nsamba a nye.*
15 Ve bia kate mia avale mejô me Yéhôva* ma jô na bia, bevevee, bia ye nyiñ akekui Tate a ye bo a ntoo valé,* bia ye bo te ke ba be wuya ôsu;
16 amu Tate émien a ye sise si a beta tyiñ, a tyiñe njôô beéngele, a toñe Zambe; éyoñe te nje bôte be nga wu be wulu’u ba’aba’a a Krist ba ye taté wômô.
17 Mvuse ya valé ñhe, bia, bevevee bia ye nyiñ akekui Tate a ye so, bia ye betebane minkut été a ke tôbane Tate miñyem; nde bia ye tabe a Tate kom ése.
18 Nde môt ase a kele’e ôsu a volô nyu mbo’o nlem a mejô mete.
Notes
^ Nge ke, “metiñ.”
^ Éfia Grec, pornéïa. Lañe’e Atinane bifia.
^ Nkobô Grec, “viek.”
^ Nkobô Grec, “a du’u monyañ.”
^ Lañe’e Atinane bifia.
^ Nkobô Grec, “étyi.”
^ Nge ke, “na mi bo ndiman.”
^ Nge ke, “tabe melunga.”
^ Yésus nnye ba jô nye va.
^ Lañe’e Atinane bifia.
^ Éfia Grec, “parousia.” Lañe’e Atinane bifia.
