1 Bethessalonicien 5:1-28
5 A bobejañ, é nji sili na bi tili mia jam éziñ a lat a biyoñ a mimbu.*
2 Amu miabebiene mia kôme yeme na, môse Yéhôva* wo ye so aval ane ñwuwube wo so alu.
3 Éyoñe ba ye jô na, “Mvo’é a teke jame ya ko woñ!” Éyoñ éte ébien, njañane wo ye so be be atemetem aval ane mintaé mi abiaé mia bi minga a ne abum, ba ye ke bi fane ya tup.
4 Ve mia a bobejañ, mi nji bo dibi si, na môs ôte ô zu dilane mia aval ane ñwuwup,
5 amu mia bese mi ne bone ya éfufup, a bone ya môs. Bi nji bo bôte ya alu, nge ke ba ya dibi.
6 Ajô te nde, bi nji yiane ke ôyo aval ane bôte bevo’o ba ke ôyo, ve bi mombô a nyiñ ane mimfefek.
7 Amu bôte ba ke ôyo, ba ke wô alu a ba ba so’o meyok, ba so’o me alu.
8 Ve asu dangan, bia bi ne bôte ya amôs, bia yiane nyiñ a fek a jaé mbunan a nye’an ane ébene ba jaé tôé, bi jaé fe ndi nleme ya kôtéban ane ékôngô.
9 Amu Zambe a nji tobe bia na bi tôban ayaa dé, ve na, bi bi ényiñ a zene ya be Yésus Krist.
10 Krist a nga wu asu dangan, nde to’o bia tabe évevé, to’o bia ke ôyo,* bia ye nyiñ a nye kom ése.
11 Nde, môt ase a kele’e ôsu a ve nyu mbo’o ngule nyul,* a ke fe ôsu a lôñe nyu mbo’o fo’o ve avale mia bo.
12 A bobejañ, éyoñe ji bia jô mia na, mi semé bôte ba saé a ngule jap ése, ba ba tebele, a lebe mia be Tate;
13 a na, mi semé be nya abuii a nye’an amu ésaé ba bo. Taba’ané mvo’é, wua a nyu mbok.
14 Nde fe a bobejañ, bia jô mia na mi komekane bôte be ne teke wulu avale da yian, mi kobô bôte ba bili atek a bifia ya volô be minlem, mi suk bôte be ne ate’e nsisim, mi jibi bôte bese.
15 Mi ve ngule na, môt éziñ a bo teke bulan abé ba abé, ve mi ke ôsu a bo bôte bevo’o mvaé, mi bo fe nalé asu bôte bese bevok.
16 Va’ané kom ése.
17 Bo’ané mbane meye’elan.
18 Va’ané Zambe akiba asu jôm ése. Nkômbane Zambe asu denane ñwô le, mia mia wulu ba’aba’a a Krist Yésus.
19 Te dimané nduane ya nsisim.*
20 Te biasané minkulane mejô.
21 Tuka’a fasané mame mese; kabeta’ané mame me ne mvaé.
22 Tyiané aval abé ése.
23 Zambe ya mvo’é émien a fubu’u mia. A bobejañ, ntabane wônan, ényiñe* jenan, nyule jenan, bi bo mvo’é a teke bijô mimfa’a mise nté bia yange éyoñe Tate wongane Yésus Krist a ye bo a ntoo valé.*
24 Nyu a loone mia a yeme tôé bengaka’a bé; teke vaa nge beté a ye bo de.
25 A bobejañ, kelané ôsu a ye’elan asu dangan.
26 Mojañ ase a wuba’ane nyu mbok* a ôsesa.
27 Ma ve mia abendé mise me Tate na, mi lañe bobejañe bese kalate nyi.
28 Beta mvame Tate wongane Yésus Krist a tabe’e be mia.
Notes
^ Nge ke, “saison.”
^ Lañe’e Atinane bifia.
^ Nge ke, “to’o bia wu.”
^ Nge ke, “wônô nyu mbok.”
^ Nge ke, “Te mia kamane na nsisime Zambe ô bo ésaé.”
^ Éfia Grec, psukhê. Lañe’e Atinane bifia, “Ényiñ.”
^ Éfia Grec, “parousia.” Lañe’e Atinane bifia.
^ Nkobô Grec, “Môt ase a bata’ane nyu mbo’o mebatane ya étyi a anyu.”
