1 Pierre 1:1-25
1 Ma Pierre, nlômane Yésus Krist, ma tili mintoban a mintabe mi nga mane mialane mfa’a ya Pont, e Galatie, e Cappadoce, Asie a e Bithynie,
2 aval ane Zambe Ésa a nga taté yem a ntunan a zene ya nsisim, amu nsôñane ya bo mewôk, a mmiamane metyi me Yésus Krist:
Beta mvam a mvo’é bi tu’a ñhe nene be mia.
3 Duma é bo’o be Zambe a Ésa Tate wongane Yésus Krist, aval ane beta mvame wé a ne, a nga ve bia mfefé abialé mfa’a ya vevee ndi nlem a zene ya ñwômane Yésus Krist a nga wômô miñwuan,
4 asu élik é vo’o ndamane nge ke mvite nge selan. É nga naaban e yôp été asu denan,
5 mia mi ne mba’alan a zene ya ngule Zambe a mbunan a nkôtan, nkômesane ya yené éyoñe ja su’ulan.
6 Amu jam éte mia vak abui, akusa bo é ne sili na mi tabe éyôé amu mia tôbane meve’ele mevale mevale tañ étun éyoñ,
7 asu na mbunane wônan ô tebeya meve’ele été, ñwô ôte wo dañe dia a lôte gôlôt a ndaman, akusa bo na gôlôt ate a nga tebe meve’ele été* a zene ya nduan, na ô bo ajô ya duma a ékaña’a a ésemé éyoñe Yésus Krist a ye yené.
8 To’o mi ngenane te tame yene nye, mia nye’e nye. To’o mi nji yene nye éyoñe ji, mia liti na mi bili mbunane be nye a mia vak abui a avale meva’a bi vo’o ke kañete a duma,
9 amu mia tôé nsôñane ya mbunane wônan, ñwô ôte ô ne nkôtane wônan.*
10 Mfa’a ya nkôtane wu, bekulu mejô be nga kuli mejô ajô ya beta mvam a mbe a yange’e mia, be nga jeñe nya njeñane a kôme fak.
11 Be nga ve ngule na be yemelane biyoñ a mimbu, nsisim ô mbe be be ô nga liti ajô Krist, amu nsisim ôte ô nga bo’olô mimbu ayabe mvus ajô ya minju’u mi mbe mi yange’e Krist a duma da ye tôñ.
12 Zambe a nga liti bekulu mejô na be nji be be bo’o ésaé asu dap bebien, ve asu denan. Bekulu mejô be nga tili ajô ya mame me nga katebane be mia, a mi nga wô’ô mame mete a zene ya bôte be nga kañete mia mbamba foé a ngule ya mfufube nsisim a nga so yôp. Mame mete mme beéngele ba kômbô tu’a fombô.
13 Nde, mi kômesa’an asimesane denan asu ésaé; ba’alané mbamba mfasane wônan; futa’ané ndi nleme jenane beta mvam a ye so be mia éyoñe Yésus Krist a ye yené.
14 Aval ane bone be ne mewôk, te keané ôsu a kañese na, minkômbane mi mbe mi bili éyoñe mi mbe ndiman été mi mé* mia,
15 ve aval ane Nyu a ne Mfufup a nga loone mia, mia fe bo’ané mfuban, ntabane wônan ôse.
16 Amu é ne ntilane na: “Mia yiane bo étyi, amu me ne étyi.”
17 A nge mia ye’elan Ésa a tyi’i bôte mejô teke bo ôbangam aval ésaé môt ase é ne, nyiñané a woñ ôse nté mi ne mintabe si va.
18 Amu mia yeme na, a nji be a biôme bi ne ndaman, a argent nge gôlôt nnye mi nga kôtébane* mfa’a ya zezé ényiñe bemvamba benane* be nga ye’ele mia.
19 Ve a mbe a metyi me ne dia, aval ane ma me mone ntômba a ne te bijô nge ayeñ, ma me Krist.
20 É ne été na, a nga toban ôsusua na bone ba taté na ba bialé si, ve a nga yené e memane ya biyoñ asu denan.
21 A ne a zene jé, nje mi ne bebuni be Zambe, nyu a nga wômôlô nye miñwuan a a nga ve nye duma, ndembene mbunane wônan a ndi nleme jenane bia ye bo be Zambe.
22 Éyoñe ji, amu mi maneya tuneban* a mewô’ô mia bo benya mejôô, jam éte é nga kuli nye’ane mia nye’esan ane bibu’a ya nda bôte jia te medu’an, môt ase a nyeke’e nyu mbo’o nya nye’ane a nlem ôse.
23 Amu mi nga bi mfefé abialé, sa ke a jôm é ne ndaman, ve a mvoñ* é vo’o ndaman a zene ya mejô me Zambe, nnye ate a ne vevee a mbane ya jibi.
24 Amu “bôte bese* be ne ane élok, a duma ése ya été é ne ane same ya afup; élo’o ja kôt, a same ja kutan,
25 ve njôane* Yéhôva* wo tabe nnôm éto.” A “njôane” wu ô ne* mbamba foé a nga katebane be mia.
Notes
^ Nge ke, “fup.”
^ Nge ke, “nkôtane ya binyiñe bienan.”
^ Nge ke, “jôé.”
^ Nkobô Grec, “mi nga tañeban; mi nga kuseban.”
^ Nge ke, “metume menan.”
^ Éfia Grec, psukhê. Lañe’e Atinane bifia, “Ényiñ.”
^ Nalé a tinane na, mvoñ é ne wume bibuma, nge ke ve bibuma.
^ Nkobô Grec, “nsôn.”
^ Nge ke, “mejô me.”
^ Lañe’e Atinane bifia.
^ Nge ke, “A mejô ma me ne.”
