2 Timothée 4:1-22
4 Ôsu be Zambe a Krist Yésus, nnye a yiane tyi’i miñwuan a bevevee mejô éyoñ a ye yené ane Njôô ya Éjôé, ma ve wo atiñe na:
2 Kañete’e mejô me Zambe; bo’o de a mban ôse mbamba biyoñ a mbia biyoñ; lebek, komeka’an, va’a bôte ngule nyul a ôjibi ôse a mbamba ñye’elan.
3 Amu éyoñe ja ye bo éyoñe ba ye bo te jibi ñye’elan ô ne mfi,* ve avale minkômbane miap mi ne, bebiene ba ye jeñe beye’ele ba kate be mame ba kômbô wôk.*
4 Ba ye bo te beta vô’ôlô benya mejôô, a kee melo map minkañete minsos.
5 Ve wo, kele’e ôsu a ba’ale mbamba mfasane wôé mfa’a ya mame mese, jibi’i minjuk, kañete’e mbamba foé,* bo’o ésaé nkañete jôé nya mboone.
6 Amu me ntoo nsôan aval ane mveane ba sôé ane ba sôé woon, a éyoñe ya nkôtane wom é ntoo bebé.
7 Me nga wosane mbamba mewosan, me nga mate akekui memane, me nga ba’ale mbunan.
8 Ataté éyoñe ji, couronne ya zôsô ja yange ma, nje éte Tate, ntyi’i mejô a ne zôsô a ye ve ma ane ma’ane môs ôte, ve sa ke ve ma étam, a ye fe ve ba bese be nga nye’e éyoñ a nga yené.
9 Jeñe’e a ngul ése na ô ji’a zu koone ma.
10 Amu Démas a nga li’i ma amu a nga nye’e émo* ji, ane a nga ke Thessalonique, Crescens a nga ke Galatie, Tite a nga ke Dalmatie.
11 Luc étame nnye a ne a ma, mia Marc mi za’a nsamba amu a ne ma mfi ésaé nkañete.
12 Ve me nga lôme Tychique Éphèse.
13 Éyoñe wo ye so, ô za’a ma alô’ô me nga li’i Troas be Carpus, ô za’a fe ma mimvulekane bekalate, e dañedañe mi mi ne nkôman a ékôbe tit.
14 Alexandre, nlui minkole mi mvot a nga bo ma abé nya abuii, Yéhôva* a ye ya’ane nye avale mimboone mié mi ne.
15 Wo fe wo yiane tabe ntyel a nye amu a nga wosane foé jangan a lôte nné.
16 Éyoñ ôsu be nga kee ma ôsu bijôé, môt éziñ a nji be a tele ma fefel, ve bese be nga tube ma, jam éte é bo’o te lañebane mfa’a wop.
17 Ve Tate a mbe a tele ma fefel ane a nga ve ma ngul, ndemben a zene jam ésaé nkañete é boba’ane nya mboone a meyoñe mese me ne wô’ô foé éte; a me nga nyiiban anyu ngbwengbwem.
18 Tate a ye nyii ma be mbia jam ase, a a ye nyii ma asu Éjôé jé ya yôp. Duma é bo’o be nye nnôm éto a nnôm éto. Amen.
19 Ô bata’ane ma Prisca ba Aquilas a bôte ya nda bôt Onésiphore.
20 Éraste a nga li’i Corinthe, me nga li’i Trophime a konô’ô e Milet.
21 Jeñe’e a ngul ése na ô ji’a so ôsusua éyoñe ya avep.
Eubule a batane wo, Pudens fe a Linus a Claudia a bobejañe bese.
22 Tate a tabe’e a nsisime wo liti. Beta mvame wé a tabe’e be mia.
Notes
^ Nge ke, “mbamba ñye’elan.”
^ Nge ke, “ma nyamele be melo.”
^ Nge ke, “kele’e ôsu a kañete mbamba foé.”
^ Lañe’e Atinane bifia, “Émo.”
^ Lañe’e Atinane bifia.
